Vanram thlen theinak dingah Jesuh lawng hi maw lamzin a si?




Thusuhnak: "Vanram thlen theinak dingah Jesuh lawng hi maw lamzin a si?"

Sannak:
“A tlangpi thuin kei cu mi`ha ka si ko. Vanram khal ka feh ko ding.” “Asile! Thil `ha lo ka tuah tla a si ko ding. Asinan thil `ha ka tuah tam sal a si le cu vanram cu ka ta a si ko.” “ Bibal vekih ka nun lo ruang men ahcun Pathian in hell ahcun in thlak kher lo ding e. Tuhlan tikcu a sin nawn lo pi.” “Nau hngak mi hremtu vek mi `ha lo taktak pawl le mi that pawl lawng si hell cu an feh ding.

Hi thu pawl hi mi zaranih suangtuah mi pawl cu an si. Asinan, thutak ti ahcun hi pawl hmuahhmuah hi thupan hlir an si. Leitlun uktu Setan cun hi thuruahnak pawl hi kan thluakah a ret. Setan, zovek khal an si le, a thluntu cu Pathian ih ral an si (1 Piter 5:8). Setan cu mi`ha bangih a tuah aw ringring (2 Korin 11:14), asinan, Pathian ih kilhim lo mi ruahnak pawl lawng a si a uk thei. “Cu pawl cun an zum duh lo, ziangah tile hi leikhawvel ih khawzing in an thinlung cu thim lakah a ret ringring ruangah a si. Thuthang `ha ih tleunak, Khrih sunlawinak ihsin a rami tleunak cu hmuh hlah haiseh tiah cuih leikhawvel khawzing cun a phen ringring. Cule Khrih cu Pathian hmuihmel a si” (2 Korin 4:4).

Sual fate men tivek cu Pathian in ziangah a siar ngaingai lo pi tiih va zum cu thuphan zum vek a si.Hell ti mi cu misual le mi `ha lo pawl hrangih ret mi a si. Ziangah tile sualnak tinrengin Pathian thawn in `hen ter ih sual fate (thuphan rang khal a tel) men khal a tel thotho. Zokhal an sual thluhih vanram thlen thei ding khopih thil`ha a tuahtu zohman kan um lo (Rom 3:23). Vanram thlen cu kan `hat le kan `hat lonak parah a `hum awmi a si lo. Cutiih a `hum aw a si ahcun kan zaten kan sung thluh sawn ding. “ Hitiih a rak hrilnak cu an hna`uan mi ruangah si loin a zaangfahnak ruangah a si. Ziangah tile Pathian ih a hrilmi pawl hi an `uanmi ruangih hril mi an si ahcun a zaangfahnak timi hi zaangfahnak taktak a si lo ding” (Rom 11:6). Vanram thlen theinak dingah zianghman tuah thei mi kan nei lo (Titas 3:5).

“Lamzin fate lawngin Pathian Uknak ram na lut thei. Ziangah tile hell fehnak kotka cu a kau ih a lamzin khal a ol; curuangah a zawhtu khal an tam a si” (Mathai 7:13). Mi hmuahhmuah sualnak thawn nung thluh khal sehla Pathian in an zaten an si thluh aw tiin a ngaidam cuang lo ding.“Hlan ahcun nan `hatlonak le na sualnak ruangah thlarau lamin mithi nan si. Culai ahcun khawvel daan sia siseh, van tlolak le lei khawvel karlakih thlarau lam huham neitu, Pathian thu ngai duh lomi pawlih lakah hna a `uan rerotu thlarau siava ih thu siseh, nan rak thlun” (Efisa 2:1-2).

Pathian leilungpi a rak sersiam pek ahcun thil ziangkim hi a famkim thluh. Cutin Pathian in Evi le Adam khal cu a sersiamih anmai duh hrilnak khal a pek. Cutin Pathian cu an duhnak thawn an thlun lole a thu an el thei. Asinan, Pathian ih a sersiam hmaisak bikmi Evi le Adam cu Setan ih hniksaknak tuarin Pathian thu cu an elih an sual ve.Hi sualnak hin Pathian thawn pawlkomnak `ha nei thei nawn lo dingin Pathian hnen ihsin a `hen hnai. Hi mi sungah kannih khal kan zaten kan tel thluh. Pathian cu a famkim ih a thianghlim ruangah sual ih thu cu a `hen a `ul hrimhrim. Misual kan si zo ruangah kanmah ten thu`hennak kan tuah thei nawn lo. Asinan, van`hat thlak takin Pathian cun vanramih amah thawn kan um tlang theinak dingah lamzin a tuah. “Pathian in leilung pi a duhdawt tuk ruangah a Fapa neihsun hman uilo in a pek. Zokhal amah a zumtu cu thi loin kumkhua nunnak an ngah ding” (Johan 3:16). “Sual ih man cu thinak a si. Asinan Pathian laksawng cu Bawi Jesuh Khrih thawn kan pehzom awknak thawngin kumkhua nunnak a si” (Rom. 6:23). Jesuh khal cu hi thu kanmah pawl zirh dingah a ra ih kanmah thi `ul nawn lo dingin kan hrangah a thi. Asinan, nithum a liam hnuah thihnak ihsin a tho sal (Rom 4:25), cutin thinakih thuneihnak cu nehnak thawn a phuang aw a si. Zumnak thawngin Pathian thawn pawlkomnak kan neih theinak dingah Jesuh cu Pathian le milai lakih thil`ul karbak khal a tuah hngal a si.

“Cuih kumkhua nunnak timi cu nangmah lawng Pathian taktak na sizia theih le na thlahmi Jesuh Khrih theih hi a si” (Johan 17:3). Mi tamtakin Pathian an zum ko. Setan khal in a zum ve. Asinan, rundamnak kan co theinak ding ahcun kan sual tlansan tahratin amah thlunih Pathian hnen roriih kan kir a `ul. Kan neihmi hmuahhmuah le kan tuahmi hmuahhmuah thawn Pathian kan rinsan a `ul. “Jesuh Khrih an zumnak thawngin Pathian in minung thawn remnak a tuah. Khrih a zumtu hmuahhmuah hrangah cuti cun Pathian in a tuah a si.Curuangah dan awknak zianghman a um nawn lo” (Rom 3:22). Bibal khal in Jesuh siarlo lamzin dang a um lo thu a zirh. Johan 14:6 sungah Jesuh cun “Keicu lamzin, thutak le nunnak ka si. Keimah siar loin zohman ka Pa hnen an thleng lo ding.”

Jesuh lawng hi rundamnak lamzin umsun a si. Ziangah tile amah lawng in a si kan sual man kuannak ah thihnak tiang a tuar (Rom 6:23).Sakhuanak dang pawl hin sualih a `ihnun zia le a thupit zia an zirh `ha lo. Jesuh Khrih lawng in kan sualman a pek. Sakhuanak dang in zianghman an tuah lo. Sakhua a dintu lak khalah Jesuh Khrih vekih Pathian si cingih milai rungcang an um lo (Johan 1:1-14). Jesuh lawng in kan sual man leiba a rul thei. A thih theinak ding khalah milai ah a cang. Jesuh Khrih zumnak thawng lawngin rundamnak a um. “Rundamnak cu amah ih sung lawngah a um; ziangah tile Pathian ih rundammi kan sinak dingah leikhawvel pumpuluk ah hin minung hnenih pekmi hmin dang zohman an um lo,” (Tirhthlah 4:12).

Hi ca pawl na siar ruangah Khrih hrangah thutitluk nak na tuah a si le a hnuai teih “Tuini ah Khrih ka cohlang zo a si” timi hi hmet aw.


Chin `ongah kirsal aw

Vanram thlen theinak dingah Jesuh lawng hi maw lamzin a si?