Pathian thawn ziangtin rualremnak ka nei thei pei?




Thusuhnak: "Pathian thawn ziangtin rualremnak ka nei thei pei?"

Sannak:
Pathian thawn “rualrem” ding cun ziangih a “sual” ti kan theihfiang a `ul. Cui theih `ulmi cu thil dang a si lo. Sual timi hi a si.“…Zohman thil`ha tuahtu an um lo, Pakhatte hman an um lo” (Saam 14:3). Pathian thupek kan thlun lo ruangah “kan zatein a hlo mi tuu bangin kan vakvai” (Isaiah 53:6).

Cuhnakih thusia lala cu sualman thihnak a si kherkher hi a si.“…Sualnak a tuahtu cu a thig ding” (Ezekiel 18:4). Asinan, Thuthang `ha pakhat cu duhdawtnak thawn a khatmi Pathian in rundamnak kan co theinak dingah in run hawl. Jesuh khal hin a tumtah cu “ a hlomi hawl ding le run ding” tiin (Luka 19:10), Cui a tumtah cu Kross parih a thih zawngah a famkim thu “ ka `heh zo” (John 19:20 tiin a puang.

Pathian thawn rualremnak ti mi cu kan sual theihpi nak in a thawk. Cu hnuah kan sual hrangih Pathian hnenih sual phuannak a si (Isaiah 57:15). Sual tlansan dingih pumpek nak khal a tel. “…kan phuannak thawngin rundamnak kan ngah” (Rom 10:10).

Hi sualsirnak ahhin zumnak a tel ve rori a `ul. Zumnak kan ti tikah Jesuh ih thihnak le thawhsalnak hin Rundamtu a si tir zia zum kha a si. “Jesuh cu Bawipa a si tiah na hmurka in na phuang ih Pathian in thihnak ihsin a thawhter sal, tiah na thinlung in na zum ahcun rundam na si ding” (Rom 10:9).A hnuailam ih Bibal cang pawl khal in zumnak a `ul zia an rel ve.Cu pawl tla cu Johan 20:27; Tirhthlah 16:31; Galati 2:16; 3:11, 26; le Efisa 2:8 pawl tla an si.

Pathian thawn rualrem asilole dik ti mi cu na aiawhih a tuah zo mi pawl parih na lungput le na sannak kha a si mei. Pathian cun Rundamtu a thlah zo. Na sual lakiang dingin a `ul mi thawinak khal a pek thluh zo (Johan 1:29). Cun, hi thu tiamkamnak khal a lo pek zo “…zo khal Bawipa hmin a kotu cu rundam an si ding.” (Tirhthlah 2:21).

Sualsirnak le ngaihdamnak fiangzetin a sim fiangtu cu fapa tlanhlo pa ih thu kha a si (Luka 15:11-32). Nauta sawn pa cu a pa ih rothil hmuahhmuah ningzakza le a sual zawngin a hmang ral thluh (cang 13). A sual a theih hnu cun, inn tlung dingin thu a `hen (cang 18).Anih cun fapa hmanah in ruat nawn lo ding tiah a ruat (cang 19), asinan cuih ruahnak cu a linglet in a sual sawn daih. Sual cingin mai sual tlansanih a ra kirtu cu a pa in a duhdawt tuk thotho (cang 20). A sual hmuahhmuah ngaidam a si ih sunloihnak tiang tuah a si (cang 24).

Pathian cun a thutiam a kilhim dingah a `ha tuk lawmmam. Ngaidam ding khalah thu a tiam a si “Bawipa in thinnau mi pawl cu a naih hai ih, beiseinak zianghman a nei lo tu pawl cu a run hai a si” (Saam 34:18).

Jesuh Khrih cu Rundamtu a si tih na pom ve duh le na pian thar duh ve a si ahcun hi thlacamnak te hi na cam ve mei lo ding maw? Asinan. Hi thlacamnak le thlacamnak dang sal ve menmei nak cun a lo rundam lo ding. Jesuh Khrih na rinsan lawngah si rundamnak ti mi cu na co ding. Hi thlacamnak cu Pathian ih pek zo mi rundamnak hrangih lungawi thu sim le na zumnak ti lang tertu men a si. “Pathian, kei cu na hmaiah mi sual ka si ti ka thei. Sualman tuar tlak khal ka si. Asinan, ka sualman tuar ding hmuahhmuah cu Jesuh Khrih in a tuar zo ruangah amah zumnak thawngin ka sual ngaihdam a si thei ka zum. Ka sual tlansan tahratin rundamnak hrangah nangmahah ka zumnak cu ka `hum a si. Mangbangza na zaangfahnak, ngaihdamnak le kumkhua nunnak laksawng in pek ruangah ka lungawi! Amen!”

Hi ca pawl na siar ruangah Khrih hrangah thutitluk nak na tuah a si le a hnuai teih “Tuini ah Khrih ka cohlang zo a si” timi hi hmet aw.


Chin `ongah kirsal aw

Pathian thawn ziangtin rualremnak ka nei thei pei?