Jesuh ah ka zumhnak ka ret zo fawn…atu ziangtin ka um thlang pei?




Jesuh ah ka zumhnak ka ret zo fawn…atu ziangtin ka um thlang pei?"

Kan lo lungawi pi! Damsung nun a ti danglamtu ding thutitluknak na tuah suak ngah zo riai! Ziangtin ka um thlang pei tiah thu na sut rero tla a si men ding? Pathian thawn ziangtin ka nung vivo pei? Bibal sungih hmuh mi a hnuailam ih thil panga hin tampi a lo `anpi tengteng ding. Pathian thawi’ na ke na karnakah thusuhnak dang na neih a si le www.GotQuestions.org/Chin/Falam hi ra pan aw.

1. Rundamnak theifiang `ha aw.

1 Johan 5:13 cun hitin thu in sim, “Pathian Fapa a zumtu in kumkhua nunnak kan nei ti nan theihnak dingah hi cakuat hi nan hnenah ka ngan.” Pathian in a rundamnak thu kan theih ding hi a duh mi a si. Rundam kan si zo tihi fiangzet le hngetzetih kan theih ding hi a duh mi a si. Curuangah, rundamnak thu thawi’ pehpar awin hi thu pawl kan zoh tlang duak hnik pei:

(a) Kan zaten kan sual thluh. Pathian ti rehsiah ding hlir kan tuah (Rom. 3:23).

(b) Kan sual ruangah, Pathian thawn kumkhua `hen awknak tuar ding khal kan tlak hrimhrim (Rom 6:23).

(c) Kan sualnak man kuan dingah Jesuh cu Kross ah a thi (Rom 5:8; 2 Korin 5:21). Kanmah hmunah Jesuh cu kan sualnak man hmuahhmuah lakin a thi. A thawhsalnak cun kan sualnak man kuan a si theinak dingih thil `ul hmuahhmuah a ti famkim thluh zo ti a lang ter.

(d) Jesuh ih zumhnak a `hum aw tirtu, Kan sualnak man kuan nakih Jesuh thihnak a pomtu hmuahhmuah hnenah sualngaihdamnak le rundamnak cu pek a si (Johan 3:16; Rom 5:1; Rom 8:1).

Hi hi rundamnak thu cu a si ko! Jesuh Rundamtu ih na pom cun rundam zo na si cu! Na sualnak hmuahhmuah khal cu ngaidam a si zoih Pathian in ziangtik hmanah lo tlansan nawn lo dingin thu khal a lo tiam (Rom 8:38-39; Mate 28:20). Na rundamnak khal kumkhua Jesuh Khrih ah humhim ringring a si (Johan 10:28-29). Jesuh cu Rundamtu rori a si tiih na rinsan ruangah, vanramah Pathian thawn kumkhua na um ding khal ringhlelnak fate hman um loin na zum thei.

2. Bibal thu a zirh `hatu kawhhran hmuh tum aw

Kawhhran ti ruangah innpi tiin ruat pang hlah. Kawhhran ti mi cu milai pawl hi a si. Jesuh Khrih ih zumtu pawl pakhat le pakhat pawlkomnak an neih hi thil `ul le thupi zet a si. Hi hi kawhhran ih a tumtah bik mi khal a si. Jesuh Khrih ah zumhnak na ret zo ruangah Bibal thu a zumtu kawhhran na hmuh ding hi kan lo forh duh. Na hmuh a si le pastor pa hnenah zumnak thar na neih mi hi sim fiang aw.

Kawhhran ih tumtah pahnihnak cu Bibal zirh hi a si. Pathian thu na nunah ziang na laklut ding ti pawl na zir thei. Ziangah tile, Bibal thu theihfiang hi hmual a neimi le a hlawhtling mi nun na neih theinak ding hrangah a thupi bik mi a si. 2 Timote 3:16 cun “Ca Thianghlim hmuahhmuah hi Pathian ih thawkhummi a si ih thutak zirhnak, zirhsual simhrinak, a sualmi remsalnak ah le dingteih nitin nunnak ih zirh awknak ah a `ha. Cutiin Pathian hna a `uantu cu mi tlamtling a si dingih thil `ha phunzakip tuah dingah thuam famkim neimi a si ding.”

Kawhhran ih tumtah pathumnak cu biakkhawmnak hi a si. Biakkhawmnak ti mi cu Pathian in a tuah zo mi pawl hmuahhmuah tlunih lungawi thusimnak a si. Pathian cun in rundam zo. In duhdawt fawn. Kan hrangih a `ul mi le in pe zo. Pathian cun kan nun khal in kaihruai. Hi ti tlukih in zoh `hatu Pathian cu ziangtin so lungawi thu sim loih kan um thei ding! Pathian cu a thianghlim, a dik, mi duhdawttu a si, mi zangfahtu a si ih zangfahnak thawi’ khat Pathian khal a si. Thuphuan 4:11 cun hitin a tarlang, “Kan Bawipa le kan Pathian, Nang cu sunlawinak le upatnak le humham co tlak na si. Ziangah tile nang cun ziang hmuahhmuah na tuah ih na thu ih siam mi le nunter mi an si, tiah an ti.”

3. Nitin Pathian hrangah tikcu ret aw

Nitin Pathian hrangih tikcu ret thiam hi thil thupi zet a si. Mi hrekkhat cun hihi “daiteih umcan” tiah an ti. Mi hrekkhat lala cun “pekawknak” tiah an ti. Ziangah tile Pathian hnenih kan pek awk tikcu a si ruangah a si. Mi hrek cun zinglam tikcu hi an hril. A hrek cun zan an hril ve. Hi tikcu can hi ziangtin na ko ih ziangtikah na hmang ti a thupi sawn lo. A thupi sawn mi cu Pathian thawn pawlkomnak catbang lo teih na neih hi a si. Cuvekih Pathian thawn tikcu can kan neih cu ziang in a cantir tile:

(a) Thlacam. Thlacam timi cu Pathian hnenih `ong a si. Na harnak le na ruatmi hmuahhmuah kha Pathian hnenah sim aw. Amai’ lamhruainak le fimnak khal dil aw. Na `ulmi pawl lo malsawm dingin dil aw. Pathian hnenah a lo `uansuak sak mi pawl hmuahhmuah ruangih na lungawi zia le na upat zia pawl sim aw. Hi hi thlacam ti mi cu a si.

(b) Bibal siarnak. Kawhhran, Sunday School asilole Bibal siar le zir tlangnak ih Bibal thu zirhnak men lawng si loin nangmah rori hin na hrangah Bibal na siar ve a `ul hrimhrim. Khris`ian nun hlawhtling na neih theinak ding hrangih a `ul mi pawl hmuahhmuah khal Bibal sungah a um thluh. Thu titluknak `ha kan tuah thei dan ding, Pathian duhnak kan theihthei dan ding, mi kan va rian thei dan ding le thlarau nunih kan `hanlen thei dan ding pawl hmuahhmuah Bibal sungah a um thluh. Bibal cu kan hnenih pekmi Pathian Thu a si. Bibal cu amah Pathian duhzawng le diriam zetih nun kan thiam theinak ding hrangih ngan mi a si.

4. Thlarau danih a lo bawm theitu pawl thawn pawlkomnak tuah aw

1 Korin 15:13 cun hitin thu in zirh, “Bummi si hlah uh.Rualpi `ha loin ziaza `ha a siatter.” Kan ziaza a ti sia tertu pawl kan ralrin a thupi zia Bibal ahhin hmuh ding tampi a um. Nuncan `ha pawl thawn kan tlangleng tam a si ahcun anmah vekih nuncan `ha nun kan neih ve phah thluh thei. Curuangah Pathian a duhdawtu le Pathian hnenih pum a pek awtu pawl hnenih kan um hi thil `ul le poizet mi a si.

Nan kawhhran ihsin asilole rual`ha pakhat asilole pahnih lai khal maw nangmah a lo bawm theitu le tha a lo petu hawlhmuh tum aw (Hebru 3:13; 10:24). Pathian thawn na tlanlen dan, na hna`uan pawl le na tikcu `ha pawl lo theihpi dingin na rual le kha sim aw. Anmah hrangih na `hathnem thei ve dan ding khal sim aw. Hiti ih ti tikah bawipa Jesuh Khrih a thei lotu na rualpi pawl hmuahhmuah na kawm nawn lo a `ul tinak a si cuang lo. An rualpi si thotho awla va duhdaw hnai sawn aw. Na nun Jesuh Khrih in a danglam ter zo ruangah tuhlan vekih na tuah kel tuah ding na si nawn lo thu le na tuah thei nawn lo thu sim hnai aw. An hnen khalih Jesuh Khrih thu sim thei dingin Pathian hnenah fimnak le cahnak dil aw.

5. Baptisma co aw

Minung tamtakin baptisma hi an theithiam lo. “Baptize” ti mi `ongfangih sullam cu ti sungih hnim awk a si. Baptisma ti mi cu mipi hnenih Khrih sungih zumnak thar na neih mi le amah thlun dingih na pumpek awknak lang tirtu a si. Ti sungih hnimphum awknak cun Khrih thawi’ thihtlangnak kha a hmuhkhih.Ti sung ihsi thawsalnak khan Khrih thawi’ na thawhsalnak kha a hmuhkhih. Curuangah baptisma cun Khrih thawi’ a thihnak, phum a sinak le thawhsal a sinak ih telve na sinak a ti lang tertu a si (Rom. 6:3-4).

Baptisma hi a lo rundamtu a si lo. Baptisma hin na sual a lo ti fai lo. Baptisma cu zawnlungnak ih tuahmi a si. Cucu Khrihih zumhnak na neih mi le amah thlun dingih na pumpek awknak na phuang tinak a si. Cutin baptisma la dingih na man a si le na pastor pa ruah aw.


Chin `ongah kirsal aw

Jesuh ah ka zumhnak ka ret zo fawn…atu ziangtin ka um thlang pei?