Bible Hi Pathian Bia Taktak A Si Maw?




Bia halh nak: "Bible Hi Pathian Bia Taktak A Si Maw?"

Bia leh nak:
Hi bialehnak hi Bible kan hmuhning zeidah a si timi langhternak caah a biapi tuk, cu pinah kan nunnak caah a biapi tuk fawn. Bible kan hmuhning a hman lo ahcun zungzal kan nunnak caah tiang hmanh in a ttihnungmi a si. Bible hi Pathian bia taktak a si ahcun kan kilkawi a herh, kan theih a herh, cun kan zumh a herh. Bible hi Pathian bia taktak a si kan ti i Bible hi zeihmanh ah kan rel fawn lo ahcun Pathian zeirel lo zong a si fawn.

Pathian nih Bible a kan pekmi hi a dawtnak langhternak caah a si. “Biathlam” timi biafang asullam hi Pathian nih amah tein minung sinah aa phuannak a si. Bible hi um hlah seh law Pathian hi zeidah a si, zei bantuk dah a si, zei bantuk lungput dah a ngeih, zeitindah kan pehtlaih lai timi zong kan thei lai lo. Pathian nih amah tein a phuan i Bible an tial ah hin kum 1500 hrawng a rau. Voikhat ah ttial dihmi a si lo. Asinain cu chung ah cun minung nih Pathian hi zeitindah kan theih khawh lai timi le zeitindah kan pehtlaih khawh lai timi cu “biathlam” hmangin an theih khawh. Bible hi Pathian bia a si ko ahcun kan zumhnak, kan biaknakm, kan nun ziaza caah nawlngeitu a si tiah kan pom a hau.

Bible hi Pathian bia a si tiah zeitindah kan theih khawh? Zeitindah Bible hi cauk sawhsawh a si lo tiah kan theih khawh? Bible hi cauk dang le biaknak dang cauk he zeinihdah a danter khun? Bible hi Pathian bia a si ko tiah tette a um maw? Cucaah Bible hi Pathian bia a si ko tiah kan zumh ahcun biatak tein check kan hau. Bible hi fiang tein Pathian bia a si tiah kan hmuh. Lamkaltu Paul nih Timoti sinah a chimmi cu, “na ngakchiat lio tein Cathiang kha a hngalmi na si; na hngalh bangin cu Cathiang hna nih cun Khrih Jesuh zumhnak thawngin hmuhmi khamhnak i an kalpi khotu fimnak kha an pek. 16Cathiang hi a dihlak in Pathian thaw chuahhnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah le ding tein nunnak ding cawnpiaknak caah a ṭhahnemmi a si. 17Cucaah cun Pathian rianṭuantu a simi cu zeizong zeizong ah tlamtlingmi a si awk le thil ṭha phun zakip tuah khawh awkah thilthuam tling tein a ngeimi a si awk a si” a ti (2 Timothy 3:15-17).

Bible hi Pathian bia a si tiah Bible nih a chimmi zong a um i a lenglei zong in Pathian bia a si tiah tette tampi an um. Bible hi Pathian bia a si tiah kan theihnak lam pakhat cu unity a ngeihmi hi a si, cucu Bible ah hin uk 66 a um, holh pathum in tialmi a si, uk 66 an ttial chungah hin kum 1500 arau, a tialtu 40 reng lo nih an tial, asinain an kalhnak a um lo, an cawnpianak aa khat dih. Hi unity a ngeihmi hi cauk dang vialte le biaknak dang caah vialte he a dantertu cu a si. Cucaah Pathian bia a si ti cu theih khawh a si. “Zeicahtiah profet bia cu minung duhnak chung menmen in a chuakmi a si lo, sihmanhsehlaw Thiang Thlarau nih a hruai hna i Pathian sinin a rami bia kha an chimmi a si” a ti (2 Peter 21).

Bible hi Pathian bia a si tiah kan theihnak lam a pahnihnak a ummi cu prophet hna bia hin a si. Prophet hna nih hmailei ah zeidah a cangte lai tiah tampi chimchungmi bia a um, cucu minung an siah, ram kip an siah an ton dingmi kha an chimchung. An chim caan an rak i dang cio. Babylon, Persia, le Greek nih zeidah an tuah te lai timi kha fiang tein Prophet hna sinah Pathian nih a rak phuan cang, a phuan bantukin an tling dih. A tling tlu rih lo i a tling te lai ding zong an tang rih. Jesuh Khrih a rat lai nak kong an chimmi hi a tam cem, cu ah cun a chuahnak hmun, a temtuarnak, a thihnak, a thawhtthannak, a rat tthan lai nak ti bantuk tling tein Prophet nih an rak chimchung cang. Biaknak dang ah hi bantukin chimchungmi a um lo. Cucaah Bible hi Pathian bia a si.

Bible hi Pathian bia a si tiah kan theihnak lam a pathumnak cu a tthawnnak hmual hi a si. Bible nih hin rel cawk lo minung nunnak a thlen cang, minung nunnak a hrawktu a si bal lo. Mithatmi hna nunnak a thlen, Drug a tawngmi nunnak a thlen, kuak a zumi nunnak a thlen, zudingmi nunnak a thlen, misualmi hna nunnak a thlen, zumtu nunnak a then—khamhnak a pek hna, cuticun minung nunnak hi a phunphun in a kan thlen khawh. Pathian bia lo nih cun hi bantuk hmual hi a ngei kho lai lo, cucaah Pathian bia a si.

Bible hi Pathian bia a si tiah a lenglei in tette a ummi in theih khawh a si. Bible nih hin tuanbia tlingte le hmaan tein a kan chim. Archaeologists hna nih Bible tuanbia a kawl lengmang tikah Bible a hmaannak hi an hmuh chin lengmang. Bible kong he pehtlai in ttialmi cauk tampi an hmuh, cu chungah cun Dead Sea Scroll hi a biapi ngaimi ah aa talmi a si.

Cun Bible hi Pathian bia a si tiah a langhnak cu minung in a si. Bible hi Pathian bia a si tiah nunnak pek tiangin a kilkawimi Bible a si. Pathian nih a ca thiang a tialtermi minung hna hi an riantuanmi aa dang cio hna, cheukhat cu ngatlai, tukhal, Doctor, Prophet ti bantuk hna an si. Bible tialtu hna nunnak kan zoh tikah biatak nun a ngeimi lawngte an si fawn. Biakam Thar a tialtu hna hi Jesuh Khrih he pehtlaihnak a ngeimi lawngte an si. Cucaah Pathian bia an phuannak zongah Jesuh Khrih hi fiang tein an theih ruangah thih zong an ttih lonak a si. A nunnak nih Bible hi Pathian bia a sinak fiang tein an langhter.

Bible hi Pathian bia a si tiah kan theihnak cu Bible hi hrawh khawh le hloh khawh a si lo. Khrihfami kan tuanbia zoh tikah Bible hrawh le hloh an i zuam peng, an doh peng. Rome uktu hna Diocletian in Communist chan in atu Athsist chan tiangah Bible hloh an i zuam. Bible cu fek tein a dir. A karh a zual chin lengmang. Vawleicung cauk ah an print bikmi le an manh bikmi cu Bible a si.

Bible hi Pathian bia rak si hlah seh law hi tluk in doh le hloh an tim hnga lo. Asinain Pathian bia a si caah a si. Hloh le hrawh an i zuam deuhdeih nunnak a thlen deuhdeuh ve hna. Khua le ram le miphun, minung tiangin a thleng khomi cu Bible lawnglawng a si. Kum 2000 chung ah rel cawk lo minung khamhnak a pek cang hna. Jesuh Khrih nih a chimmi cu “Van le vawlei cu an rawk lai, asinain ka bia cu a rawk lai lo” a ti (Mark 13:31). A cungah a tlang piin kan hmuh khawhmi cu Bible cu Pathian bia taktak a si ko ti hi a si.


Hakha holh in leh mi ahramthawk ah vazoh than

Bible Hi Pathian Bia Taktak A Si Maw?