Jesuh Khrih Hi A Hodah A Si?




Bia halh nak: "Jesuh Khrih Hi A Hodah A Si?"

Bia leh nak:
Pathian a um tak maw um tak lo timi hi mi tamipi nih an ruah ngaimi a si, asinain Jesuh Khrih cu a um tak maw um tak lo timi hi cu an ruat tuk lo, zeicatiah a um timi hi an theih cio dih. A luan cia 2000 kum hrawngah Jesuh an timi cu a um timi cu an zumh dih ngawt hna. Asinain Jesuh Khrih hi a hodah a si timi hi fak piin an i almi a si. Biaknak kip nih an cawnpiakmi cu Jesuh Khrih hi prophet a si, cawnpiaktu saya ttha a si cun mi ttha a si an ti cio. Asinain Jesuh Khrih hi cu lawng cu a si lo tiah Bible nih a kan cawnpiak.

Mere Christianity timi cauk ah C.S Lewis nih a chimmi cu, “hi cauk in Jesuh Khrih kong an hrokhrol in an chimmi cu kham kaa zuam: ‘Jesuh Khrih cu cawnpiaktu saya ttha a si ti cu ka zumh ko, asinain Pahtian ka si a timi cu ka zum kho lo an ti.’ Hihi kan chim hrimhrim lo ding a si. Mi sawhsaw nih Jesuh Khrih a chimmi le a tuahmi hi an tuah kho lai lo, cawnpiaktu saya ttha sawhsawh lawng a si lai lo. Nanmah tein i thim ko u. Pathian a si zongah minung a si zongah mihrut a si zongah a sining poah in va si ko seh. Mi hrut zong na ti ko lai, nan cil zong nan chak ko lai, khua a si tiah a thah zong nan that ko lai, Bawipa a si tiah a ke hram zongah nan khup nan i bil lai i nan biak ko lai. Asinain Cawnpiaktu saya ttha a si le si lo kongah kan ruahnak poah in chim hna hlah u sih. Kan ruahnak poah in chim ding in a kan onpiakmi a si lo. Jesuh Khrih nih aa tinhmi zong a si lo” a ti.

Tisi ahcun Jesuh nih ahodah ka si aa ti? Bible nih ahodah a si a ti? Pakhatnak ah, Jesuh Khrih nih a chimmi bia kan zoh hmasa lai, John 10: 30 ah kan hmuhmi cu “Keimah le ka Pa cu pakhat kan si” a ti. Ttha tein ruah lo ahcun Jesuh nih Pathian a sinak a chim duhmi a si lo kan ti men lai. Asinain Jesuh nih hi bia a chim ah khan, Jews mi hna nih lung in cheh an timh, “Hi ruangah hin lung in cheh kan i tim lo” tiah Jews mi nih an leh. Asinain “Pathian kan si tiah na chimmi hi Pathian sersat a si tiah lung in cheh kan i timhmi a si” an ti (John 10: 33). Jews mi nih Jesuh Khrih a chimmi kha an fiang ko. Jesuh nih Pathian ka si ka ti bal lo tiah a let bal hna lo. Johan 8: 58 ah Jesuh nih a chimmi cu, “biatak kan chimh hna, ‘Abraham a chuah hlanah ka um cang’” a ti hna. Hi ruang zongah hin Jews mi nih lung in cheh an timhnak kha a si. Johan 8: 58 hi Exodus 3: 14 he in aa pehmi a si.

Johan 1: 1 nih “Bia cu Pathian a si” a ti. Johan 1: 14 nih “bia kha titsa in a lang” a ti. Hi nih a langhtermi cu Pathian kha Jesuh in taksa in aa langhnak kha a si. Jesuh zultu Thomas nih Jesuh kut hma a hmuh ah khan a chimmi cu “ka Bawipa le ka Pathian” tiah a ua i a khup aa bil (Johan 20: 28). Asinain Jesuh nih Thomas cu ka bia hlah Pathian ka si lo a ti lo. Paul nih Jesuh kong a chimmi cu “…a liannganmi kan Pathiam le khamhtu Jesuh Khrih” a ti (Titus 2: 13). Peter nih a chim tthanmi cu “…kan Pathian ke khamhtu Jesuh Khrih” a ti ve (2 Peter 1: 1). Pathian hrimhrim nih Jesuh kong a chimmi cu “Sihmanhsehlaw a Fapa tu cu, ‘Maw Pathian, na bawiṭhutdan cu zungzal in zungzal tiang a hmun lai: Na pennak cu dinnak in na uk’” a ti (Hebrew 1: 8). Isaiah nih a chimmi cu “Kan caah ngakchia pakhat a chuak! Fapa pakhat pek kan si! Amah cu kan uktu bawi a si lai. Amah cu Khuaruahhar Fim Chimtu, A Ṭhawngmi Pathian, Zungzal Hmunmi Pa, Daihnak Bawi, ti a si lai” a rak ti (Isaiah 9: 6).

Cucaah C.S Lewis a chim bang, Jesuh Khrih hi cawnpiaktu saya ttha tiin zumh sawhsawh hi san a tlai lo. Jesuh Khrih nih Pathian ka si tiah fiang tein a chim. Pathian si hlah she law, lih chim a si hnga, cucaah prohet sawhsawh a si lo, saya ttha sawhsawh a si lo, cun mi ttha sawhsawh zong a si lo. Chan thar ah scholar cheukhat nih an chimmi cu Bible ah Jesuh Khrih a chim an timi hi Jesuh Khrih nih a chim taktakmi an si lo, a zultu hna nih an chimmi lawngte an si tiah an ti. Asinain cheukhat chan thar scholar maw an thei deuh lai Jesuh Khrih he a um ttimi hna (John 14:26)?

Jesuh Khrih hi a hodah a si timi biahalnak hi zeiruangahdah a biapit tuk? Jesuh Khrih hi Pathian a si zong si lo zongah zeidah a biapimi a si? A biapi tukmi cu Jesuh Khrih hi Pathian si hlah seh law, a thihnak nih hin kan sualnak ngeihthiamnak a chuahpi kho hnga lo. Vawleicung misualmi kan caah a thihmi hi san a tlai hnga lo (1 Johan 2: 2). Sualnak timi hi a sawhsawh a si lo, zungzal thihnak tiang a chuah pimi a si caah Pathian lawnglawng nih a ngeihthiam tthan khawhmi a si (Rom 5:8; 2 Korin 5:21). Jesuh Khrih nih kan sul leiba a cham khawhnak ding ah cun Jesuh Khrih hi Pathian a si awk a si. Cun Jesuh Khrih nih kan sual leiba chamnak ding ah cun a thih a hau, cucaah minung a si awk a hau. Cu ruangah Jesuh Khrih hi Pathian zong a si i Minung zong a sinak a si. Khamhnak hi Jesuh Khrih kan zumhnak lawngin hmuh khawh a si. Jesuh nih “Kei cu lam le baitak le nunnak ka si. Keimah dah ti lo cun ahohmanh Pa sinah an phan kho lai” a ti (Johan 14: 6).


Hakha holh in leh mi ahramthawk ah vazoh than

Jesuh Khrih Hi A Hodah A Si?