Jesuh Lawng Hi Vancung Kainak Lam A Si Maw?




Bia halh nak: "Jesuh Lawng Hi Vancung Kainak Lam A Si Maw?"

Bia leh nak:
Kei cu mitha ka si caah vancung ah ka kai ko lai. A caancaan ah thil tthalo ka tuah, asinain thil ttha ka tuahmi hi a tam deuh, cucaah vancung ah ka kai ko lai. Bible ning in ka um lo ruangah Pathian nih cun Hell ah cun a ka thla bal lai lo. Atu cu caan zong aa thleng dih cang. Mithattu ti bantuk le nu tlaihhrem a hmangmi lawng Hell ah an kal lai.

Hihi mipi ruahnak ah a um ngaimi a si cang. A taktak ah cun an hrokhrol lawngte in an ruahmi le an chimmi a si. Vawlei uktu Satan nih hi bantuk ruahnak cu an ruahnak ah a chiahmi a si. Satan le a zultu poah cu Pathian ral an si (1Peter 5:8). Satan hi mihlen hmang a si I mittha bantukin umter a thiam ngaimi a si (2 Korin 11:14), asinain Pathian fale a si lomi hna ruahnak poahpaoh cu Satan nih a ukmi an si. “Annih nih zeicahdah an zumh lo ti ahcun, hi vawlei khuazing ṭhalo nih hin an lungthin cu mui lakah a chiah peng hna caah a si. An cung i a ceumi ceunak cu hmu loin a umter hna, cu ceunak cu Khrih sunparnak kong Thawngṭha in a rami a si i Khrih cu Pathian bantuk taktak a si” (2 Korin 4:4).

Sualnak kan tuahmi fa tete hna hi cu Pathian nih zeihmanh ah a rel lo, mitthalo hna zong hell ah an kal lai lo timi ruahnak hi a hman lomi an si. Sual fate a si zong a nganpi a si zong Pathian he a kan tthentertu a si. : zeicahtiah mi vialte cu kan sual dih cio ko i Pathian sunparnak kha kan bau dih cio ko” a ti (Rom 3:23). Vancung kai timi hi cu thil ttha kan tuahmi le thil tthalo kan tuahmi ruangah an si lo. “A thim hna cu a zaangfah hna ruangah a si ko, anmah tuahmi ruangah a si lo. Zeicahtiah Pathian nih a thimmi hna cu anmah tuahmi ruangah a si ahcun a zaangfahnak cu zaangfahnak taktak a tling lomi pei a si hnga cu” (Rom 11:6). “Cu a kan khamhnak cu hrinṭhannak ti thawng le Thiang Thlarau nih mi tharter khawhnak a ngeihmi ṭhawnnak thawngin a si” a ti (Titus 3:5).

“Kutka bi chungah cun lut tuah u, zeitintiah Hell ah a kalmi lam cu a kau i a fawi i mi tampi nih an zulh” (Matthew 7:13). Pathian i bochannak a um lo nak hmun hmanh ah kan duhning in kan sual ahcun Pathian nih a kan ngeithiam lai lo. “Hlanah cun nawl nan ngaih lo ruang le nan sual ruangah thlarau lei in nan rak thi. Cu lioah cun vawleicung phunglam ṭhalo kha nan rak zul; van le vawlei kar i a ummi thlarau ṭhawnnak uktu nawl kha nan rak zul; cu thlarau nih cun Pathian nawl a ngai lomi kha atu cu a uk hna” a ti (Ephesa 2:1-2).

Pathian nih vawlei a ser ah hin chambaunak a ngei lo i a ttha dih. Cun Adam le Eve a ser hna i duhthim khawhnak nawl a pek hna. An duh cun Pathian nawl an ngai kho i an duh lo cun amah duhning in an um kho fawn. Cu lioah cun Satan nih Pathian nawl ngai lo ding in a tukforh hna I sualnak an tuah. Sualnak an tuahmi nih cun Pathian he a tthen hna. Pathian he hawikomhnak an ngeih tawnmi kha a rawk cang. Pathian cu a thiang i a tlingmi a si bantukin sualnak hi a huatmi a si. Misual kan si bantukin, kanmah tein Pathian he remnak kan tuah kho lo. Cucaah Amah he remnak kan hmuh tthan khawhnak ding ah Pathian nih lam a kan sialpiak. “Cuticun Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai” (John 3:16). “Zeicahtiah sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si” (Rom 6:23). Kan sual man ah kan thih nakhnga lo ding ah Jesuh Khrih nih kan caah a kan thihpiak. Kan tuar hnga dingmi a kan tuarpiak. Pathian le minung karlak ah remnak hlei a kan donhpiak, cuticun amah a zummi paoh cu Pathian he remnak an hmu.

“Cun Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si” (Johan 17:3). Mi tampi nih Pathian hi an zumh, Satan hmanh nih a zumh. Asinain khamhnak hmuhnak ding ah cun Pathian kan fuh a herh i pehtlaihnak kan ser a herh, kan sualnak kan mer tak a herh, cun kan zulh hrimhrim a hau. Zei kan tuahmi le kan ngeihmi poah in Jesuh Khrih hi kan zumh i kan tthangtthat ding a si. Jesuh Khrih lawnglawng hi kan lam ttha bik a si.“Cu lam, Pathian he i remnak lam cu Jesuh Khrih zumhnak thawngin a si i Jesuh Khrih a zummi ca paoh ah a si dih. Ahohmanh i thleidan ding a si lo” tiah cathiang nih a ti (Rom 3:22). Bible nih fiang tein a kan cawnpiakmi cu Jesuh Khrih lawng dah ti ko lo cun lam dang in khamhnak kan hmuhnak ding a um lo. Johan John 14:6 ah Jesuh nih, “Keimah hi lam le biatak le nunnak ka si; keimah sinin ti dah lo cun ahohmanh Pa sin an phan kho lo” a ti.

Jesuh Khrih lawnglawng hi khamhnak kan hmuhnak cu a si zeicatiah amah lawng hi ka sual man a cham khomi a si (Rom 6:23). Biaknak dang hna nih sualnak hi biatak in a cawnpiakmi an um hna lo. Jesuh Khrih nih kan sual man a kan champiak tluk in Biaknak dang a um lo. Biaknak dang dirhtu hna zeitikhmanh ah Pathian-minung an si kho lo (Johan 1:1,14). Jesuh Khrih hi Pathian taktak a si caah kan sual man zong a cham khawhnak a si. Jesuh Khrih hi minung taktak a si caah a thih khawhnak hi a si fawn. Khamhnak cu Jesuh Khrih lawnglawng ah hmuh khawh a si. “Amah thawng lawnglawng in khamhnak hi hmuh khawh a si. Zeicahtiah vawlei cung dihlak ah hin a kan khamh khotu ding min dang zeihmanh a um lo,” tiah a ti (Lamkaltu 4:12).
GotQuestions.org ah Pathian thawngttha na relnak thawngin Jesuh Khrih na zum maw? Na zumh ahcun, a tangah aa ttialmi “Nihin in Jesuh Khrih ka zumh cang” timi kha hmet ko.


Hakha holh in leh mi ahramthawk ah vazoh than

Jesuh Lawng Hi Vancung Kainak Lam A Si Maw?