Khrihfa Timi Hi Zeidah A Si, Cun Zeidah An Zumhmi A S?




Bia halh nak: "Khrihfa Timi Hi Zeidah A Si, Cun Zeidah An Zumhmi A S?"

Bia leh nak:
Khrihfa kan zumhmi a hrampi cu 1 Korin 15:1-4 ah lamkaltu Paul nih a chim. Jesuh Khrih cu ka sualnak caah a thi, an vui, thawhtertthan a si, cuticun a zummi poah hna cu khamhnak a pek hna. Biaknak vialte nakin Khrihfa kan zumhnak aa dannak cu tuahsernak sawhsawh si loin pehtlainak hi a si. Pathian he pehtlaihnak kan ngei. Cucu tuah, cucu tuah hlah timi phunglam si loin Khrihfami hna cu Pathian he hawikomhnak ngeih peng hi thazaang pek kan si. Jesuh Khrih le Thiang Thlarau riantuannak thawngin Khrihfami hna cu Pathian he pehtlaihnak ngeihter kan si.

Hi Khirhfami zumhnak pinah hin, Khrihfami nih kan tuah ding tete an um rih hna. Khrihfami nih kan zumhmi cu Bible hi Pathian bia a si tiah kan zumh, “Pathian thawchuah hnawhmi a si.” Kan zumhnak le kan tuahsernak kip caah nawlngeitu a si (2 Timothy 3:16; 2 Peter 1:20-21). Asullam cu Bible nih tuah hlah a kan timi cu kan tuah lo ding a si, tuah a kan timi cu kan tuah awk a si, zeicatiah Pathian bia a si. Bible zumh lo cu Pathian zumh lo he aa khat. Pathian hrimrim nih tuah u a kan timi a si tiin kan pom a hau. Pathian hrimrhim nih tuah hlah u a kan ti tiin kan pom a hau. Cun Khrihfami nih Pathian cu Thumkomh Pathian a si tiah kan zumh: Pa, Fapa le Thiang Thlarau.

Khrihfami nih kan zumhmi cu minung cu Pathian he pehtlaihnak ngei ding in sermi kan si ti a si. Asinain sualnak nih minung cu Pathian he tthenter kan si (Rom 3:23; 5:12). Khrihfami nih kan cawnpiakmi cu Jesuh Khrih cu vawlei a tlon lioah khan Pathian-Minung a si kan ti (Philippians 2:6-11), asullam cu Jesuh Khrih kha minung sinak tling a ngei i Pathian sinak tling zong a ngei. Cun vailam cungah a thi i, a thotthan. Khrihfami nih kan zumhmi cu a thih hnuah Jesuh Khrih cu vui a si, a thotthan i atu cu Pathian orhlei kam ah a tthu cang, zumtumi hna caah Pathian sinah thla a kan campiak cang (Hebrew 7:25). Cun Khrihfami nih kan zumhmi cu Jesuh Khrih a thihnak nih hin kan sual man leiba tling tein a cham dih cang ti a si. Cuticun Pathian he pehtlaihnak a kan serpiak cang (Hebrew 9:11-14; 10:10; Roman 5:8; 6:23). Kanmah tein Pathian kan panh kho cang. Jesuh Khrih thawngin kan nih cu tlangbawi kan si cang (1 Peter 2:9). Kan sualnak zong kanmah tein Pathian sinah kan i chim kawh cang. Cucu Jesuh Khrih nih a kan serpiakmi a si.

Khrihfami nih kan cawnpiakmi cu kan thih tikah vancung kainak dingah kan tuah awk a herhmi cu Jesuh Khrih le a tuahsernak vialt hna hi kan zumh hrimhrim an hau. Jesuh Khrih hi ka caah a thi tiah kan zumh, kan sual man a kan pekpiak tiah kan zumh, a thotthan tiah kan zumh ahcun khamh kan si lai. Khamhnak kan hmuh khawhnak dingah kanmah tein kan tuah khawhmi a um lo. Kan thil ttha tuahmi nih Pathian lung a tong kho lo zeicatiah kan nih cu misual kan si (Isaiah 53:6; 64:6-7). Kanmah tein kan khamhnak caah kan tuah ding zong a um lo, Jesuh Khrih nih tling tein a kan tuahpiak dih cang. Vailam cungah a um lioah khan, Jesuh Khrih nih a chimmi cu, “a dih cang” a ti (Johan 19:30), asullam cu kanmah khamhnak caah a tuahsernak vialte aa lim cang.

Khrihfami nih kan zumh rihmi cu khamhnak kan timi hi sualnak in kan luat i, zalong tein Pathian he pehtlaihnak ngeih khawh hi a si. Khamhnak kan hmuh hlanh ah cun sualnak sal kan si i khamhnak kan hmuh hnuah cun Jesuh Khrih sal kan si, asullam cu Jesuh Khrih nawl kha kan ngeih awk a si cang (Romans 6:15-22). Hi kan pumsa in vawlei ah kan um chung poah cu sualnak he in kan i pai peng lai. Asinain Khrihfami nih sualnak kan teinak ding cu Pathian bia theih i kan nunnak ah hman peng a hau, cun Thiang Thlarau nih a kan uk zungzal awk a si. Thiang Thlarau hruainak hi Khrihfa kan sinak ah a biapi tukmi a si. Thiang Thlarau hruainak kan zulh khawhnak ding cu: “dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, toidornak le mah le mah i tei khawhnak” te hna hi kan ngeih awk a si (Gala 5: 22-23).

Cucaah biaknak dang hna nih cun tuahsernak phunphun an i ser hna i cucu tuah khawh an i zuam, asinain Pathian nih cu a duhmi a si lo. Khrihfami hna cu Jesuh Khrih zumh i a nawl zulh hi fial kan si. Kan sual leiba cu cham a si cang, Pathian he hawikomhnak kan ngei kho cang. Thihnak kan tei cang, asullam cu thihnak nih thlankhor chungah a kan hreng kho ti lo. Zungzal nunnak in kan thotthan lai. Hihi Khrihfami nih kan zumhmi cu a si.


Hakha holh in leh mi ahramthawk ah vazoh than

Khrihfa Timi Hi Zeidah A Si, Cun Zeidah An Zumhmi A S?