Zeitindah Pathian Duhnak Hi Ka Nunnak Ah Ka Theih Khawh Lai? Pathian Duhnak Theih Timi Bible Nih Zeidah A Chimmi A Si?




Bia halh nak: "Zeitindah Pathian Duhnak Hi Ka Nunnak Ah Ka Theih Khawh Lai? Pathian Duhnak Theih Timi Bible Nih Zeidah A Chimmi A Si?"

Bia leh nak:
Pathian duhnak hi zeidah a si timi kan theihnak ding ah tawh tlaitu pahnih a um: 1) Pathian sinah na halmi kha Bible nih a hnatlak pimi a si lai; 2) Pathian sinah na halmi nih hin Pathian sunparnak a cuahmi a si maw si lo timi na ruah lai cun na thlarau caah thazaang petu a si maw si lo timi na zoh chih lai. Hi pahnih hoih tein Pathian na hal ko nain Pathian nih an pek lo ahcun Pathian nih a rem a ti lo caah a si lai. A si loah caan sau deuh in na hnga a hau. Pathian thinlung/duhnak theih hi a har tukmi a si. Minung nih kan ruah tawnmi cu Pathian nih hin zeidah kan tuah lai timi kan chim seh ti kan duh, kawikaahdah rian ka tuan lai timi hi kan chim seh ti kan duh, ahodah ka tthit lai timi kan chim seh ti kan duh, kawikaahdah ka um lai timi hi ka chim seh ti kan duh. Pathian nih cu bantuk cu fiang tein a kan chim lo. An duhning tein i thim hna seh ti kha Pathian nih cun a kan duhpiakmi a si.

Roman 12: 2 nih a chimmi cu “Hi vawlei kalning hin kal ve lengmang ti hlah u, sihmanhsehlaw chunglei in Pathian nih nan lungthin kha a dihumnak in in thleng hna seh. Cu tikah a ṭhami thil le Pathian nih a lawmhmi thil le a tlingmi thil kha nan hngalh khawh lai, cucu Pathian duhmi an si” a ti. Pathian nih tuah hna hlah seh tiah a kan duhmi cu Pathian duhnak al le sualnak tuah hi a si. Pathian nih thil kan theih ko nain kan tuah lomi kha Pathian nih a duh lomi a si, cun sualnak tuah hi Pathian nih a duh lomi a si. Pathian nih a duhning tein um hna seh ti hi a kan duh piakmi a si. Pathian nih hihi a ka duhpiakmi a si ti zeitindah ka theih khawh lai? Pathian he pehtlaihnak tha tein na ngeih zungzal i Pathian duhnak na kawl zungzal ahcun Pathian hrimhrim nih a duhnak kha na thinlung ah an chiahpiak lai i zeithil na tuah poah ah Pathian duhnak lawngte na tuah cang ko lai. Pathian he nan duhnak aa kalh ti lai lo. Nangmah duhnak kha a biapi ah chia loin Pathian duhnak kha kawl hmasa. Cucaah hihi philh hrimhrim hlah, “Bawipa duhnak tuah kha nan duhnak nganbik ah chia u law nan lungthli tum kha an pek hna lai” tiah Salm catialtu nih a chim (Salm 37: 4). Toidornak le thinlung taktak in Pathian duhnak na kawl ahcun a duhnak cu an theihter ko lai.


Hakha holh in leh mi ahramthawk ah vazoh than

Zeitindah Pathian Duhnak Hi Ka Nunnak Ah Ka Theih Khawh Lai? Pathian Duhnak Theih Timi Bible Nih Zeidah A Chimmi A Si?