Pathian Nih Zei Bantuk Sining Hna Dah A Ngeih: Pathian Hi Zeihedah Aa Lawh?




Bia halh nak: "Pathian Nih Zei Bantuk Sining Hna Dah A Ngeih: Pathian Hi Zeihedah Aa Lawh?"

Bia leh nak:
Bible nih Pathian a sining le zeihedah aa lawh timi a kan chimh. Bible hi um hlah seh law, Pathian kong kan chim-relmi hna hi kan ruahnak menmen an si hnga i zumh awk taktak a tlak hnga lo. Asinain Pathian nih Bible ah a sining kan theih awk ah a herhmi vialte cu a kan pek dih. Pathian nih rak ka thei hna seh ti hi a kan duhpiakmi a si. Pathian sining hmaan tein chim-rel khawh hi Pathian nih a duhmi a si (Job 42:7). Pathian sining ttha tein thei huaha loin biak hi siasal biak he in aa khat (Exodus 20:3-5).

Pathian nih amah kong aa phuanmi lawng hi kan theih khawh. Aa phuan lomi cu kan thei kho lo i tuak zong a hau lo. A si loning hna in kan chim sual lai i Pathian a si lomi hna kha Pathian bantuk ah kan ruah lai. Pathian sining pakhat cu “ceunak” a si, asullam cu kan theih khawhnak dingah amah tein aa phuangmi Pathian a si (Isaiah 60:19; James 1:17). Pathian nih aa phuannak biathlam hna hi kan daithlanh ding an si lo. Vawlei ser hram thoknak, Bible, Bia kha taksa ah a caang ti bantuk hna nih hin Pathian hi zeihedah a lawh timi a kan chim.

Pathian cu a kan sertu a si i kanmah cu a sermi kan si (Genesis 1:1; Psalm 24:1). Amah muisam keng in sermi kan si. Minung hi a sermi vialte lakah a sangbikmi hmun ah chiah kan si, uktu le zohkhenhtu dirhmun pek zong kan si chih (Genesis 1:26-28). Sualnak nih sermi thil vialte hna cu a mawtter dih hna, asinain Pathian riantuannak cu a hrawk kho dih lo (Genesis 3:17-18; Romans 1:19-20). Sermi thil an i dawhnak, khuaruahhar an sinak, an nganning, le ningcang tein an umning zoh tikah Pathian tthangtthat lo awk a ttha lo.

Pathian min theihnak nih Pathian hi zeihedah aa lawh timi tampi kan theih khawh lai. Cucu atanglei bantukin an si:

Elohim – a tthawngmi (Genesis 1:1)
Adonai – Bawipa, Bawi le sal pehtlaihnak (Exodus 4:10, 13)
El Elyon – A sangbikmi, a tthawngbikmi (Genesis 14:20)
El Roi – Zeizong vialte a hmu khotu (Genesis 16:13)
El Shaddai – Lianngan Pathian (Genesis 17:1)
El Olam – Zungzal a nungmi Pathian (Isaiah 40:28)
Yahweh – Keimah cu zungzal in a ummi ka si (Exodus 3:13, 14).

Pathian cu a hmun zungzalmi a si, asullam cu hramthoknak le donghnak a ngei lo. A thi kho lomi a si i limit a ngei lomi a si (Deuteronomy 33:27; Psalm 90:2; 1 Timothy 1:17). A thleng bal lomi le bochan awk le zumh awk aa tlakmi a si (Malachi 3:6; Numbers 23:19; Psalm 102:26, 27). Pathian hi ahohehmanh in tahchun ding a ngei lo, a sining le a riantuannak ah amah bantukin thil a ti khomi an um. A tlingmi Pathian a si, asullam cu chambaunak a ngei lo (2 Samuel 7:22; Psalm 86:8; Isaiah 40:25; Matthew 5:48). Kan theih awk ah a ttha lomi le kawl awk a ttha lomi Pathian a si (Isaiah 40:28; Psalm 145:3; Romans 11:33, 34).

Pathian cu a dingmi a si, asullam cu a hmaan lomi thil tuah a duh lo. Thleidannak a ngei lo i ahohmanh a upat deuhmi minung a ngei lomi a si (Deuteronomy 32:4; Psalm 18:30). Pathian nih tuah khawh lomi a ngei lo, cun amah a sining loin zeihmanh tuah a duh lo, asining hoih tein riantuanmi Pathian a si (Revelation 19:6; Jeremiah 32:17, 27). Pathian cu khawika poah a ummi a si. Asinain Pathian hi zeizong vialte cu a si lo (Psalm 139:7-13; Jeremiah 23:23). Pathian cu zeizong vialte a theimi a si, a theih lomi a um lo, hmailei ah a umte dingmi zong a theih dih cia, cucaah zeizong vialte a khanmi le a tuahmi ah palhnak le tuahsualnak a ngei lomi Pathian a si (Psalm 139:1-5; Proverbs 5:21).

Pathian cu pakhat a si; Pathian pinah a dang Pathian an um ti lo. Pathian lawnglawng hi minung kan sining a theih dih tu le duhnak a tlinter khotu bik a si. Pathian lawnglawng hi biak awk aa tlakmi le pumpek aa tlakmi a si (Deuteronomy 6:4). Pathian cu a thianghlimmi a si, cucaah Pathian nih sualnak le palhanak dantat loin a um lo, zeicatiah a sining he aa tlak lomi an si. Kan sualnak ngeihthiam awk Jesuh Khrih kan caah a thihternak a si. Kanmah nih kan sual dingmi kha kan tuar ding a si, zungzal in a thi dingmi kan si, hell ah a zungzal in a tla dingmi kan si, asinain Pathian nih a kan dawt caah kanmah kha dantat loin a Fapa Jesuh Khrih a kan pek (Exodus 9:27; Matthew 27:45-46; Romans 3:21-26).

Pathian cu zeizong vialte cungah nawlngeitu bik a si. A sermi thil vialte hna nih Pathian khuakhannak kan thleng kho lo (Psalm 93:1; 95:3; Jeremiah 23:20). Pathian cu Thlarau a si, hmuh khawh a si lo (John 1:18; 4:24). Pathian cu Thumkomh Pathian a si: Pa, Fap Le Thiang Thlarau, an sining aa khat dih, an thawnnak le sunparnak zong aa khat dih. Pathian cu biatak a si, thurhnomhter khawh a si lo, lih a chim kho lomi Pathian a si (Psalm 117:2; 1 Samuel 15:29).

Pathian cu a thianghlimmi a si, sualnak he in aa ralkahmi a si. Pathian nih thil tthalo a hmuh i a thinhun an hunter. Pathian cu a lahmi mei bantuk a si (Isaiah 6:3; Habakkuk 1:13; Exodus 3:2, 4-5; Hebrews 12:29). Pathian cu velngeihnak a ngeimi a si. Ram ka thei hna she ti a kan duhmi Pathian a si (Exodus 34:6; Psalm 31:19; 1 Peter 1:3; John 3:16, 17:3). Pathian cu hramthoknak le donghnak a ngei lomi a si bantukin minung nih Bible nih a chim pinah kan thei kho ti lo. Bible lawnglawng in Pathian hi ahodah a si, zeihedah aa lawh, zei bantuk ziaza dah a ngeih timi kan theih khawh. Asinain Bible nih Pathian kawl hi a kan fial lengmangmi a si. A zungzal in Pathian khawl hi ngol hna hlah u sih (Jeremiah 29:13)!


Hakha holh in leh mi ahramthawk ah vazoh than

Pathian Nih Zei Bantuk Sining Hna Dah A Ngeih: Pathian Hi Zeihedah Aa Lawh?