Zeitindah Pathian Duhning Tein Ka Um Khawh Lai?




Bia halh nak: "Zeitindah Pathian Duhning Tein Ka Um Khawh Lai?"

Bia leh nak:
Pathian duhning tein kan um khawhnak ding ah cun, a pakhatnak ah kan theih awk cu zeidah a hman lomi a si timi le sualnak hi zeidah a si timi kan theih awk a si. Pathian nih sualnak hi a duh lo. Asinain minung cu sualnak a ngeimi kan si. Sual cia in hrinmi fale kan si. Salm 14:3 nih a chimmi cu, “tthatnak a tuahmi minung pakhat hmanh an um lo” a ti. Pathian nawlbia kan buar dih cio hna i “kan nih cu tukhaltu ngei loin a vakvai tu bantuk kan si dih cio hna” (Isaiah 53:6).

Kan sual ruangah kan ton dingmi cu zungzak thihnak hi a si. Hihi minung caah thawngttha lo taktak a si. Ezekiel 18:4b nih, “A sualmi poah cu an thi ko lai” a ti. Thawngttha a um thanmi cu dawtnak a ngeimi Pathian nih khamhnak kan hmuh khawh nakhnga a Fapa dawt Jesuh Khrih a kan pek. Jesuh Khrih a ratnak chan cu “a tlaumi kha kawl awk le khamh awk ah” a si (Luke 19:10). Jesuh Khrih nih vawlei i a rat hnawh chan rian tlamtling tein vailam cungah a lim ah khan, hitihin a chim, “Aa lim cang” tiah a ti (John 19:30).

Sual ngeihthiammi fale kan sinak ding le Pathian duhning tein kan um khawhnak ding cu kan sualnak hi kan i theih a hau. Mi sual ka si ti kan theih a herh. Kei cu misual ka si ti kan cohlan khawh ahcun, Pathian sinah kan sualnak hi kan i phuan a hau tthan (Isaiah 57:15). Cun sualnak hi kan hlawt a hau, kan hrial hrimhrim a hau. Sual ngeihchihnak hi kan ngeih hrimhrim a hau. Cu hnu lawngah Pathian he remnak kan ngei kho lai. Romans 10:10 nih, “Zeicatiah kan lung in [Jesuh Khrih] kan zumh i Pathian he i remnak kan hmuh; kan ka in kan chim i khamh kan si” a ti.

Ka sualnak kaa ngaichih tiah kan i thlen tikah zumhnak nih kan ngeih colh a herh, cucu Jesuh Khrih cu keimah khamh awk ah a thi timi le a tho tthan timi hi kan zumh a herh. “Nan ka in, ‘Jesuh Khrih cu Bawipa a si.’ tiah nan ti I amah cu Pathian nih mithi hna sinin a thawhter tiah nan lung in nan zumh ahcun, khamh nan si lai” (Romans 10:9). Cun Bible nih khamhnak kan hmuhnak dingah zumhnak kan ngeih a herhnak tampi a chim. Zumhnak hi a biapi tukmi a si. Johan 20:27; Lamkaltu 16:31; Galati 2:16; 3:11, 26; le Ephesa 2:8.

Pathian he rem tein um timi cu Pathian nih ka caah zeidah a tuahmi a si hi kan theih a hau. Kan caah a Fapa ngeihchunte a kan pek, kan sualnak in a kan khamh (John 1:29), cun bia a kan kamh: “Bawipa min a aumi poah cu khamh an si lai” tiah a ti (Acts 2:21).

Sual ngeihchihnak le sual ngeihthiamnak kong hi fapa tlau pa tuanbia nih fiang tein a kan cawnpiak (Luke 15:11-32). Fa hniang deuh pa nih cun a pa laksawn kha pumsa duhnak le ningzahnak ah a hman hna (13). Asinain ka sual tiah aa fian tikah cun, a sualnak kha aa ngaichih cikcek i, inn ah lawi tthan ding in biakhiahnak a tuah (18). Fapa sinak dirhmun zong kaa tlak ti lo timi ruahnak a ngei (19). Cucu sual ngeihchih timi taktak cu a si. Asinain inn ah a lawi tthan tikah cun a pa nih lunglawm tein a rak don (20). Ngeihthiamnak le conglawmhnak in an khat (24). Pathian zong cu bantuk cu a si. Sual ngeihchih in a kir tthanmi hna poah cu a hlaw bal hna lo, A panhmi poah cu lunglawm tein a don peng hna. “Lung a dongmi kha Bawipa nih a umpi hna i ruahchannak a ngei lomi kha a khamh hna” (Psalm 34:18).

Pathian he rem tein um tti na duh ahcun hi ti tein thlacam khawh a si. Na theih awk ah, thlacamnak menmen nih khamhnak a kan hmuhter lo. Jesuh Khrih kan zumhnak lawnglawng in khamhnak hi kan hmuh. Sual ngeihchihnak hi ngeih i kan mer tak a herh fawn. Hi thlacamnak cu Pathian nih khamhnak a kan pekmi caah lawmhnak kan langhter khi a si. Pathian, kei cu sualnak in a thi cangmi ka si ko, asinain Jesuh Khrih thawngin khamhnak le nunnak ka hmuh caah kaa lawm. Na sinah ka zumhnak ka chiah. Na dawtnak le na velngeihnak ruangah lawmhnak ka ngei. Amen.

GotQuestions.org ah Pathian thawngttha na relnak thawngin Jesuh Khrih na zum maw? Na zumh ahcun, a tangah aa ttialmi “Nihin in Jesuh Khrih ka zumh cang” timi kha hmet ko.


Hakha holh in leh mi ahramthawk ah vazoh than

Zeitindah Pathian Duhning Tein Ka Um Khawh Lai?