Khamhnak Hmuhnak Caah Rom Lam Timi Hi Zeidah A Si?




Bia halh nak: "Khamhnak Hmuhnak Caah Rom Lam Timi Hi Zeidah A Si?"

Bia leh nak:
Khamhnak hmuhnak caah Rom Lam timi cu Rom cauk in thawngttha hrilhfiahnak lam pakhat a si. Zeiruangahdah khamhnak kan herh timi hrilfiahnak lam a ttha ngaimi pakhat a si, zeitindah Pathian nih khamhnak hi a kan pek, zeitindah khamhnak hi hmuh khawh, cun khamhnak nih zeidah a chuah pi timi fianternak a si.

Khamhnak hmuhnak caah Rom Lam timi caang a pakhatnak cu Rom 3:23 a si, "zeicatiah mi vialte cu kan sual dih cio ko i, Pathian sunparnak cu kan chambau dih cio ko hna." Kan zapi in kan sual dih. Pathian nih a duh lomi thil kan tuah dih. Mi thiangmi pakhat hmanh kan um lo. Kan nunnak ah sualnak hi zeidah a si timi hi fiang tein Rom 3:10-18 nih a kan chimh. Khamhnak hmuhnak caah Rom Lam caang a pahnihnak cu Rom 6:23 a si, hi nih a kan cawnpiakmi cu kan sual ruangah zeidah a chuahpi timi a si. "Zeicatiah sualnak man cu thihnak a si, asinain Pathian laksawng cu Jesuh Khrih thawngin nunnak a si" ti. Kan sual ruangah kan hmuh dingmi cu thihnak a si. Taksa lawngin si loin thlarau zong in a si chih.

Khamhnak hmuhnak caah Rom Lam caang a pathumnak cu Rom 6:23 a si, "sihmanhsehlaw Pathian laksawng cu Jesuh Khrih thawngin zungzal nunnak a si." Rom 5:8 nih a chim tthanmi cu "Asinain Pathian nih kan sinah a dawtnak kha a vun langhter, cu ah cun kan sual cuahmah ko lio ah cun Jesuh Khrih cu kan caah a thi." Jesuh Khrih cu kan caah a thi. Jesuh Khrih a thihnak nih kan sualnak man kha a cham dih cang. Jesuh Khrih a thawhtthannak nih a langtermi cu Jesuh Khrih a thihnak hi kan sual ruangah a si ko timi Pahtian nih a cohlannak a langhtertu a si.

Khamhnak hmuhnak caah Rom Lam caang a palinak cu Rom 10:9 a si, "Jesuh Khrih hi Bawi a si ko tiah na ka in na cohlan i na thinlung in Pathian nih thihnak in a thawhter tiah na zumh ahcun khamh na si lai." Jesuh Khrih hi kan caah a thih bantukin, kan zumh hrimhrim a hau, kan sual ruangah a kan thihpiak timi hi kan zumh awk a si. Cuticun khamhnak kan hmuh lai. Rom 10:13 nih a chim tthanmi cu "Bawipa min a aumi poah cu khamh an si lai" a ti. Khamhnak hi mikip caah a um ko. Jesuh Khrih hi ka Bawipa le ka khamhtu a si tiah kan zumh ahcun khamhnak kan hmu ko lai.

Khamhnak hmuhnak caah Rom Lam a donghnak bik cu khamhnak nih a chuah pimi a phi a si. Rom 5:1 nih cun, "Cucaah zumhnak in thiamcoter kan si cang caah Kan Bawipa Jesuh Khrih thawngin Pathian he daihnak kan ngei cang." Jesuh Khrih thawngin Pathian he a daimi pehtlaihnak kan ngei cang. Ral kan si ti lo. Rom 8:1 nih a chimmi cu, "cucaah Jesuh Khrih ah a um cangmi hna caah cun sualphawtnak a um ti lo." Sualphawt awk kan um ti lo. A donghnak ah, Pathian nih a sunglawi tukmi bia a kan kamh, Romans 8:38-39, "Zeicahtiah a kan dawtnak he cun zeihmanh nih a kan ṭhen kho lo ti kha fiang tein ka hngalh: thihnak nih siseh, nunnak nih siseh, vancung i a ummi vanmi nih si hna seh, uktu le ṭhawnnak nih si hna seh, atu caan nih siseh, hmailei caan nih siseh, cunglei vawlei nih siseh, tanglei vawlei nih hin siseh, an kan ṭhen kho lai lo — kan Bawipa Khrih Jesuh thawngin kan ta a simi Pathian dawtnak he a kan ṭhen khotu ding cu sermi thil dihlak ah hin zeihmanh a um lo."

Rom Lam caang nih a kan cawnpiakmi hi zulh na duh maw? Rom cakuat chungah khamhnak kong a kan chimhnak kha a si. Pathian sinah hitihin thlacam ko. Khamhnak na hmuhnak cu Jesuh Khrih ah zumhnak na ngeihmi kha a si ko. Pathian, na hmai ah kei cu misual ka si, thih ding aa tlakmi ka si. Asinain na Fapa Jesuh Khrih ka caah na thihter timi ka zumh i a ka khamhtu le ka Bawipa a si tiah ka cohlang cang. Na dawtnak le na ve ruangah kaa lawm. Amen.

GotQuestions.org ah Pathian thawngttha na relnak thawngin Jesuh Khrih na zum maw? Na zumh ahcun, a tangah aa ttialmi “Nihin in Jesuh Khrih ka zumh cang” timi kha hmet ko.


Hakha holh in leh mi ahramthawk ah vazoh than

Khamhnak Hmuhnak Caah Rom Lam Timi Hi Zeidah A Si?