Kan Thlarau Lam A kan Hmuhsaktu Lam Pali Hi Zeidah An Si?




Bia halh nak: "Kan Thlarau Lam A kan Hmuhsaktu Lam Pali Hi Zeidah An Si?"

Bia leh nak:
Thlarau lam hmuhsaktu pali hna cu a tanglei bantukin an si hna. Biakam Thar nih zeitindah a chim timi kan zoh lai.

A pakhatnak thlarau lam hmuhsaktu cu, Pathian nih a kan dawt i khuaruahhar in a tthami khuakhannak a kan ngeihpiak. Johan 3:16 nih, “Cuticun Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai” a ti. Johan 10:10 nih Jesuh Khrih vawlei a ratnak ruang a kan chimh, “Mifir cu fir duh le thah duh le hrawh duh lawngah an ra. Kei cu nunnak kha an ngeih i duhdim tein an ngeih nakhnga caah ka ra” a ti. Pathian dawtnak coting kho loin zei nih dah a kan kham? Nun duhdim tein kan um khawhnak ding ah zeidah kan tuah a herh?

A pahnihnak thlarau lam hmuhsaktu cu, minung vialte hna hi sualnak cirik nih a kan kai dih cangmi kan si i cucaah cun Pathian he tthen kan si. Cu ruangah cun Pathian he kan i hlat. Pathian nih kan caah khuaruahhar in a tthami khuakhan piaknak a kan ngeihmi zong kan thei kho lo. Zungzal in a thlau cang dingmi bantukin kan um hna. Rom 3:23 nih, “zeicahtiah mi vialte cu kan sual dih cio ko i Pathian sunparnak kha kan bau dih cio ko” a ti. Rom 6:23 nih kan sual man hitihin a chim, “Zeicahtiah sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si” a ti. Pathian nih minung a ser ah hin a lotlau ding in a ser lo, hawikomh awk ah a sermi a si. Tuanvo ngei ding in a ser. Sihmanhsehlaw, minung nih sualnak tu kha vawlei ah an rak chuahpi i Pathian he cun tthen an si. Pathian he pehtlaihnak kha an hrawh. Cucu zeitindah an ser tthan khawh lai?

A pathumnak thlarau lam hmuhsaktu cu, Jesuh Khrih hi kan sualnak hlohter awk ah Pathian nih a kan pekmi a si. Pathian he pehtlaihnak kan ngeih khawh tthannak ding ah Jesuh Khrih hi remnak sertu a si.” Rom 5:8 nih a chimmi cu, “Asinain Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi” a ti. 1 Korin 15:3-4 a chim bantukin Jesuh Khrih hi kan theih zong a herh i kan zumh zong a herh, “Cucu zeidah a si tiah, Cathiang chungah a rak i ṭial bang khan Khrih cu kan sualnak caah a thi; cun Cathiang chung ṭhiamṭhiam ah a ṭial rih bantukin, an vui i ni thumnak ni ah thawhter a si” tiah a ti. Jesuh Khrih nih fiang tein a chimmi cu keimah lawnglawg hi khmahnak lam cu ka si a ti. Johan 14:6 ah Jesuh nih, “Keimah hi lam le biatak le nunnak ka si; keimah sinin ti dah lo cun ahohmanh Pa sin an phan kho lo” a ti. Zeitindah khamhnak laksawng hi ka cotin khawhning a si lai?

A palinak thlarau lam hmuhsaktu cu, Khamhnak laksawng kan hmuhnak ding ah cun Jesuh Khrih hi a ka khamhtu le ka Bawipa a si tiah kan zumh hrimhrim a hau. Johan 1:12 nih hitihin a chim, “Asinain a cohlangmi hna le a zummi poahpoah hna cu Pathian fa cannak nawl kha a pek hna” a ti. Lamkaltu 16:31 nih fiang tein a chim tthan, “Bawipa Jesuh kha zum law, khamh na si lai” a ti. “Nannih cu vel an ngeih hna caah an khamh hna i khamhnak nan hmuh cu amah nan zumhnak thawngin a si. Khamhnak nan hmuhmi cu nanmah tuahmi a si lo, Pathian laksawng a si. Hi kongah hin nan i porhlawt khawhmi zeihmanh a um lo, zeicahtiah nanmah ṭuannak thawngin nan hmuhmi a si lo” tiah (Ephesa 2:8-9).

Jesuh Khrih hi a ka khamhtu a si tiah cohlan na duh ahcun, a tanglei bia bantukin Pathian sinah chim ko. Hi bia chim menmen in cun khamhnak cu na hmu lai lo, na zumhnak kha khamhnak an petu taktak cu a si lai. “Pathian, na hmaiah kei cu misual ka si. Zungzal in a thi dingmi ka si, asinain Jesuh Khrih hi ka caah na thihter. Ni hin thok in na cungah ka zumhnak ka chiah cang. Na dawtnak le na velngeihnak ruangah kaa lawmh. Amen.

GotQuestions.org ah Pathian thawngttha na relnak thawngin Jesuh Khrih na zum maw? Na zumh ahcun, a tangah aa ttialmi “Nihin in Jesuh Khrih ka zumh cang” timi kha hmet ko.


Hakha holh in leh mi ahramthawk ah vazoh than

Kan Thlarau Lam A kan Hmuhsaktu Lam Pali Hi Zeidah An Si?