Khamhnak Hi Zumhnak Lawngin A Si Maw A Si Loah Tuahsernak Aa Tal Chih Maw?




Bia halh nak: "Khamhnak Hi Zumhnak Lawngin A Si Maw A Si Loah Tuahsernak Aa Tal Chih Maw?"

Bia leh nak:
Khrihfami kan theology ah hihi a biapi bikmi biahalnak a si kho men. Hi biahalnak hi Biaknak sersiamnak (Reformation) a chuah pitu a si. Protestant le Roman Catholic tthennak a chuah pitu zong a si. Zumhnak a hmaan lomi Khrihfabu le a hmaanmi Khrihfabu a kan dantertu zong a si. Khamhnak hi zumhnak lawngin a si maw a si loah tuahsernak hi khamhnak caah a herh maw? Jesuh Khrih ka zumhnak lawngin khamhnak hi ka hmu maw a si loah Jesuh Khrih ka zumh pinah tuahsernak hi a herh rih maw?

Zumhnak lawngin khamhnak timi le zumhnak le tuahsernak timi kongah hin Bible nih a chim veve. Cucaah hihi fonhtonh awk ah an buaipi ciomi a si. Roman 3:28, 5:1 le Galatians 3:24 hi James 2:24 he tahchun hmanh. Cheukhat nih cun Paul le James hi an i dang tiah an ruah. Paul nih zumhnak lawng a chim i James nih zumhnak lawng a pom lo, tuahsernak zong a chim chih, cucaah an i dang tiah an chim. Hi an i dannak hi ttha tein James a chimmi kan zoh tikah i dannak a um lomi a si. James nih a chim duhmi cu zumhnak cu tuahsernak nih a zulh hrimhrim awk a si timi kha a si (James 2: 17-18). Jesuh Khrih a zum taktakmi a si ahcun nun thlennak a ngei lai, tuahsernak ttha a ngei lai ti kha a si (James 2: 20-26). Thiamcoter kan sinak hi zumhnak le tuahsernak a si ti kha James nih a chim duhmi a si lo. Zumhnak nih thiam a coter cangmi cu tuahsernak ttha nun a ngei lai ti tu kha a si. Mi pakhat khat nih zumtu ka si a ti I tuahsernak ttha a ngeih ttung lo ahcun Jesuh Khrih ah zumhnak hmaan taktak a ngeih lo caah a si (James 2:14, 17, 20, 26).

Paul nih cu tthiamtthiam cu a chimmi a si. Zumtu nunnak ah theipar ttha a chuak ding kha Paul nih fiang tein a chim. Thlarau theipar cu a si. Zumtu nih Thlarau theipar ngeih lo cu a si kho lomi a si. A ngeih lo ahcun James nih a chim bang khan a thimi zumhnak an ngeih caah a si khomi a si (Gala 5: 22-23). Khamhnak cu zumhnak in a si, tuahsernak in a si lo tiah a chim khawh ah khan (Ephe 2: 8-9), Paul nih a kan chimh tthanmi cu thil ttha tuah ding in sermi kan si tiah a chim colh (Ephe 2: 10). James nih a chim bantukin Paul zong nih a chim ve. An i tinhmi zong aa khat veve ko. “Cucaah ahohmanh Jesuh Khrih ah an um cang ahcun ser tharmi an si cang; thil hlun kha an lo i thil thar aa thok cang” a ti (2 Korin 5: 17). Khamhnak kongah an cawnpiaknak aa dang lo. Zumhnak an chimning tu ah khan an hmuhning dang veve in an chim caah a si. Paul nih khamhnak cu zumhnak lawngin a si a ti ah khan James nih cun zumhnak hmaan taktak nih cun tuahsernak ttha kha a chuah pi awk a si timi kha karhlei lam in a chimmi tu a si.


Hakha holh in leh mi ahramthawk ah vazoh than

Khamhnak Hi Zumhnak Lawngin A Si Maw A Si Loah Tuahsernak Aa Tal Chih Maw?