Jesuh Khrih ah ka zumhnak ka chiah cang… cun teh, zeitindah ka si rih lai?




Biahalnak: Jesuh Khrih ah ka zumhnak ka chiah cang… cun teh, zeitindah ka si rih lai?

Bialehnak: Lawmh na um tuk hringhren! Nun a thlengmi biakhiahnak na tuah cang! Zeitindah ka si rih lai, zeidah a um rihmi a si ni tthan khawh men. Pathian he zeitindah kar ka hlanning a si lai an ti men lai? A tangglei ah step panga (5) hmangin Bible nih lam an hmuhsak lai. Cun Khrihfa na sinak ah biahal ding le ruah ding tampi na ngei tawn lai, cu tikah www.GotQuestions.org hi rak leng tawn.

1. Khamhnak hi naa fiang hrimhrim a hau.

1 Johan 5:13 nih a kan chimhmi cu, “Pathian Fapa a zummi nih zungzal nunnak kan ngei ti kha nan i hngalh khawh nak hnga hi ca hi kan kuat hna.” Pathian nih khamhnak kong hi i fiang hna seh ti a kan duh. Khamhmi ka si timi zumh ngam taknak hi ngeih hna she ti hi Pathian nih a kan duh piak. Khamhnak konghe pehtlai in a biapimi hna tawite in vun zoh tuah hna u sih:

(a) Kan dawng tein kan sual dih hna. Kan dawng tein Pathian duh lomi thil kan tuah cio dih hna (Rom 3:23).

(b) Kan sual ruangah, Pathian he a zungzal tthen ding in dantatnak hmuh awk ah kan i tlak dih hna (Roma 6:23).

(c) Kan sual man kan in dingmi dantatnak kha champiak awk ah Jesuh Khrih nih vailam cungah a kan thihpiak (Rom 5:8; 2 Korin 5:21). Jesuh Khrih nih kan tuar hnga dingmi ah a kan tuarpiak, kanmah nih kan in dingmi kha amah nih a kan inpiak. Jesuh Khrih a thawhtthannak nih a langhtermi cu Jesuh Khrih a thihnak hi kan sual man champiak ding in a zat.

(d) Jesuh Khrih a zummi poah cu Pathian nih ngeihthiamnak le khamhnak a pek dih hna. Jesuh Khrih hi kan sual man cham awk ah a thi timi hi kan zumh awk a si (Johan 3:16; Rom 5:1; 8:1).

Hihi khamhnak thawngttha kong cu a si. Jesuh Khrih hi a ka khamhtu le ka Bawipa a si tiah na zumh ahcun, khamhnak cu na hmu ko lai. Kan sualnak vialte cu ngeihthiam an si lai I Pathian nih kan kal tak hna lai lo, kan hlaw bal hna lai lo tiah bia a kan kamh (Rom 8:38-39; Matthew 28:20). Na theih awk a simi cu, Jesuh Khrih ah an zumhnak cu zungzal in a him cang (Johan 10:28-29). Jesuh Khrih lawnglawng ah na zumhnak na chiah ahcun Pathian he vancung ah zungzal in kan um tti lai tiah zumh ngam taknak ngei ko!

2. Bible Cawnpiaknak hman a ngeimi Khrihfabu kawl.

Khrihfabu hi inn ah aa pum menmenmi an si tiin ruat hlah. Khrifabu timi minung hi an si. A biapi tukmi cu Jesuh Khrih a zummi poah hna cu pakhat le pakhat hawikomhnak an ngeih peng awk a si. Hihi Khrihfabu nih a tuah awk a rian hmaan taktak cu a si. Atu cu Jesuh Khrih na zumh cang I, biatak tein fial kan in duhmi cu Bible a zummi Khrihfabu kawl hna. Pastor he pehtlaihnak tuah. Na zumhnak kha i theihter.

Khrihfabu nih a tuah awk a pahnihnak cu Bible hi hmaan tein a cawnpiak lai. Pathian chimhrinnak le cawnpiaknak kha ka nunnak ah zeitindah ka hman lai timi hi na theih lai. Bible cawnpiaknak theih le fian hi nunnak a hlawhtlinter tawh pakhat a si. 2 Timothy 3:16-17 nih a chimmi cu, “Ca Thiang hi a dihlak in Pathian thawchuah hnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah le ding tein nunnak ding cawnpiaknak caah a tthahnemmi a si. Cucaah Pathian riantuantu a simi hna cu zeizong zeizong ah tlamtlingmi a si awk le thil ttha phun za kip tuah khawh awk ah a si” a ti.

Khrihfabu nih a tuah awk a pathumnak cu pumh nun ngeih hi a si. Pumhnak tuah hi Pathian cungah kan i lawmhnak langhternak le thangtthatnak peknak caah a si. Pathian nih a kan dawt. Pathian nih a kan khamh. Pathian nih kan duh-herhmi vialte a kan pek dih. Pathian nih a kan hruai i, lam a kan hmuhsak. Zeiruangah kan lawmh khawh lai lo? Pathian cu a thiangmi a si, a dingmi a si, dawtnak ngeimi a si, velngeihnak a ngeimi a si, zaangfahnak in a khatmi a si. Biathlam 4:11 nih a chimmi cu, “Kan Bawipa le kan Pathian, Nangmah cu sunparnak le upatnak le lianngannak kha hmuh awk ah aa tlakmi na si. Zeicatiah zeizong vialte kha nangmah nih na ser hna i Nangmah duhnak bangin annih cu ser an si i nunnak an ngei” tiah a ti.

3. Ni fatin in Pathian he caan ngei tti lengmang.

Pathian kong ruahnak caan hi ni khat ah voikhat lengmeng cu ngei kho ding caan i chiah lengmang. Cheukhat nih cun hi caan hi “a daimi caan” an ti. A dang nih cun “pumpek caan” an ti, zeicatiah hi caan hi Pathian sinah kan i pumpek caan a si. Cheukhat cu zingkaa ah “pumpek caan” an hmang deuh tawn. Cheukhat cu zanlei ah an hmang tawn. Asinain zingkaa caan, zanlei caan ti a um lo. A biapimi cu Pathian he caan hmaan tein hman hi a si. Pathian he caan hman tti timi zeicah an si?

(a) Thlacamnak: Thlacam timi cu Pathian sinah biachim khi a si. Kan herhmi le kan harsatnak Pathian sinah chim khi a si. Pathan hi fimnak le lam hmuhsaknak hmaan hi kan hal peng ding a si. Kan herhmi hi Pathian nih a kan pek nakhnga hal lengmang ding a si. Zeitluk indah Pathian hi kan dawt timi hi kan chim lengmang ding a si. Kan caah a tuahsermi vialte hi kan lawmh awk a si. Hihi thlacam timi cu a si ko.

(b) Bible Rel: Biakinn lawngah Bible hi theih loin, kanmah tein Bible hi kan rel lengmang ding a si. Khrihfa nunnak ah hlawhtling tein nun kan duh ahcun Bible nih tling tein cawnpiaknak a ngei dih. Kan nunnak ah zei lam dah ka zulh lai timi kongah biakhiah kan i herh tuk tawn hna, Bible nih nunnak-biakhiahnak tiangin lam a kan hmuhsak. Bible nih Pathian duhnak zeidah a si timi fiang tein a chim, mi dang sinah umtu tthutdirning kong, pehtlaihnak kong, cun thlarau leiin tthannak kong zong a ngeih dih. Bible hi kan caah Pathian bia a si. Bible hi Pathian lung kan ton khawhnak dingah lam hmuhsaktu a si i Bible hi kan lungchung saduhthah a tlintertu zong a si.

4. Thlarau leiin thazaang an pe khotu he pehtlaihnak tuah ding.

1 Korin 15:33 nih a chimmi cu, “Ahohmanh I hlenter hna hlah u. ‘Hawi tthalo nih ziaza ttha a hrawh.’” Bible nih mithalo he hawikomhnak ngeih hi a duh lo i ralrinnak kong tampi a chim. Sualnak a tuah lengmangmi hna he caan kan hman lengmang ahcun kanmah zong sualnak kan tuah ve lai. Kan pawngkam ah a ummi hna ziaza nih kan ziaza zong cirik a kaiter khawh. Hi ruangah hin pei Pathian a duhmi hna hi hawikomhnak ngeih hi a herh tuknak a si cu.

Na Khirhfabu ah hawikom a thami kawl hna. Anmah nih an i bawmh lai, thazaang an i pek lai (Hebrews 3:13; 10:24). Na cawlcangh a siah, Pathian he naa pehtlaihnak a siah, dai tein caan na hmannak a siah na hawi kha chim law, daithlang in na um sualnak hnga lo an theihter lengmang seh. Cu bantuk cun nangmah zong nih tuahpiak ve. Cun na hawile zong nih Pathian he naa pehtlaihnak kha hnahnawhnak tuahter hna hlah, nangmah zong nih hnahnawhnak tuahpiak ve hna hlah. Jesuh Khrih nih na nunnak an thlenmi kha na hawile nih hmu peng hna seh.

5. Tipil Ing

Tipil innak kong hi mi tampi nih an theihpalh lengmang. “Tipil” timi biafang a sullam cu “a chunglei ah va pil” ti a si. Tipil-in a sullam cu Bible phunglam tein zumhnak thar ka ngei cang ti mipi sinah/theih in i phuannak a si. Cu pinah Jesuh Khrih ka zulh cang lai tiah pumpeknak hmelchunhnak a si. Tipil kan in tikah khin ti chunglei ah kan pil i thawhter kan si tthan, khi nih khin a langhtermi cu Jesuh Khrih thihnak ah ka thi ve i ka tho tthan ve tinak a langhter (Romans 6:3-4).

Cun Tipil kan inmi hi a kan khamhtu a si lo. Tipil kan innak nih kan sualnak a thianter fawn lo. Tipil-innak cu toidor nunnak kan ngeihnak step pakhat a si, Jesuh Khrih lawnglawng hi khamhnak a ka petu a si tiah kan zumhnak kan phuannak a si. Tipil-innak hi a biapi tuk zeicatiah toidornak nun step pakhatnak a si, zapi sinah Jesuh Khrih kan zumhnak kan langhternak a si. Tipil-in na duh ahcun na Pastor kha tha tein na chim hmasa lai.


Hakha holh in leh mi ahramthawk ah vazoh than

Jesuh Khrih ah ka zumhnak ka chiah cang… cun teh, zeitindah ka si rih lai?