Kei aa tuin a maan biakna in bang hi tu ziam?




Dokna: "Kei aa tuin a maan biakna in bang hi tu ziam?"

Zokikna:
Ansai ah ih pai ciangin ih teal tu an namkimte lai taw ih du thethei tuin ih maiah hong koisak hi. Niangtui sai pawlkhat ah niangtui ahibale coffee nam za val bang ih maiah hong koi sak thei hi. Inn ahi a, mawtaw ahizongin ih lei tu ciangin ih deibel sia ih teal thei tug nam tampitak hong koi sak thei hi. Eite in a khangto ngawl lai-na munah ih nungta bua hi. Kumpi khat bangin teal theina khuan ih nei hi. Na deina le na lungngulna bangin na teal theih natu khuan na nei hi.

Tua ahi le nang a tu bang biakna maan bel tu ziam? Suakta taka mawna vawt theina, kitekna om ngawl, septu le sep ngawltu-a thukhun a nei ngawl biakna in bang biakna ahi ziam? Hi thu taw kisai-in kong son siat zo hi. Ahizongin biakna sia puan lei bangin ih dei bangin kilei thei tu ziam?

Ih thinbot theina tuin biakna taw kisai thuhilna tampitak ih za siat zo hi. Tua hi le mikhat in banghangin Muhammed, Confucius, Buddha, Charles Taze Russell, le Joseph Smithte sangin Jesu sia lian zaw hi, ci thei tuziam? Dom ngawlin lam theampo in vantungngam nuam hong tumpui thei tu ziam? Biakna theampo aki bang siat ahi ziam? Lampi theampo in Indiana a thetpui ngawl bangin lampi theampo in vantungngam hong then bua hi,ci-a sonna sia thuman ahi hi.

Jesu in thina zo-a hong tho to kik ahimanin ama in Pathian thunei na a son thei bek ahi hi. Muhammed, Confucius le adang biakna lampuite ahile tuni dong than sungah lum lai uh hi. Ahizongin Jesu ahile Roman ngalkapte ih thana a thuak zawk ciangin thina zo in hong thoto kik hi. Thina a zo biakna lampuipa ii hong son thute ih ngai tu ahi zaw hi. Thina zo a, a tho kikpa ii sonna bangin ih ngamtat tu hizaw hi.

Jesu ii a thawkikna teti tampitak taw kilak thei hi. Amasa penpenin mitul nga val in a tho kik Jesu a mu uh hi. Mi tampi takte in teti pang zo uh hi. Mi tul ngate ih son thu in ih nial thei batu hi. Dom ngawlin thankhuk sungah bangma a om bua hi. Jesu ih galpa in Jesu thina, a pumpi a siatnate hangin Jesu sia thokik ngawl hi, ci tha thei tu hi. Thankhuk sungah bangma om ngawl hi.Nungzuite in Jesu luang hawm ngu thei tu ziam? Haksa mama tu hi. Banghangziam ci le Jesu luanghawm sia a kinguk tu lau ahi manin ngalkapte in phatakin a cing uh ahi hi. Nungzuite om zia ngaisun tawng. Jesu a thini-a kipanin amate zong a kimat tu lau ahi manun bumang siat uh hi. Ngalkapte ii mat ding lau lei uh ahi manin bukawm sa-in ngasa a vai kik uh ahi hi. Tua hun laitakin nungzuite sia a nuntakna-uh kipia in thina thuak uh hi, cisia leilot thu ahi hi. Banghangziam ci le Jesu ii a thawkikna sia ama te in sontelna anei thei vet bua uh hi.

Thina zo in a tho kikpa thu son sia ih ngai zawk tu ahi hi. Jesu in thina zo ahina hong kilang sak siat zo hi. Tua ahimanin ama hong son thute ih ngai tu ahi hi. Jesu bek in ngupkhiatna lampi hi, ci-in ama in a hong son hi (John. 14:6). Ama sia lampi tampi panin lampi khat hi ngawlin, ama bek lampi ahi hi.

Jesu in, “vanngit pua a, a ngimmi theampote awng, ka kungah hong pai vun, toithainana kong pia tu hi” ci-in hong sam lai hi ( Matt.11:28). Hi leitung sia haksatna mun ahimanin nuntakna zong haksa hi. Mitam a tamzawte in kidona, ki huatna le kilangpanna taw nungta uh hi. Na thukim le? Tua hi le nang bang dei bel tu ni ziam? Phattuamna hong pia thei tu biakna maw? Ahi bale biakna thathong teal zaw tu ni ziam? A thokik hunpa teal zaw tu maw? Ahi bale a si “kamsang te” teal zaw tu ni ziam? Akhiatna nei kizopna maw? Ahibale akhiatna nei ngawl ki zopna teal zaw tu ni? Jesu sia ih teal ngengeii tu ahi hi. Adang ih teal bahet tu hi.

Mawnaisakna biakna na zon le Jesu sia amaan biakna ahi hi (Sawl.10:43). Pathian taw akhiatna nei kizopna na dei le Jesu sia amaan “biakna” ahi hi (John.10:10). Vantungah tawntung nuntakna na nga theina tuin biakna na zon le Jesu sia amaan “biakna” ahi hi. (John.3:16). Jesu sia na Ngumpa le na Topa in sang in. Kisik ngawl tu ni hi. Ama in na mawna hong maisak siat zo hi, ci-in um in. Thinkiamna na thuak tha ngei batu hi.

Pathian taw “amaan kizopna” na nei nuam le hibangin thu na ngen thei hi. Hi thungetna le adang thungetna hangin ngupna na nga batu hi. Jesu Khris upna hang bek taw na mawna hong kimai sak tu hi. Hi thungetna sia Pathian um na hi hunlam ama tungah sonna hi-a, ama hong piak mawmaina hangin ama tungah lungdamkona zong ahi hi. “Topa aw, keima in nang kong langdo ahimanin thukhen na a thuak tu ka hihi. Ahi ongin Jesu Khris in ka thuak tu thukhennateng hong lak sak siat zo hi. Ama ka upna hangin mawmaisakna a nga tu ka hihi. Ngupkhiatna ka nga na tuin ama ka muang hi. Alamdang nong hesuakna le mawmaina – tawntung nuntakna letsong hangin lungdam kong ko hi! Amen!’’

Hiteng aki-at thute na simna hangin Christ up tu khentatna na nei tha ziam? Na nei le hi a nuai-a akiat, “Tu ni-in Christ saang zo ing” ci lai ngual meek in.


Laimai kipatna ah kilekik in

Kei aa tuin a maan biakna in bang hi tu ziam?