Thi zawk ciangin nuntakna thak a om lai tu le?




Dokna: "Thi zawk ciangin nuntakna thak a om lai tu le?"

Zokikna:
Thi zawk ciangin nuntakna thak a om lai tu le? ci dokna sia a kidong mun dokna ahi hi. Job in hibangin son hi. “Numei sungpan a piang mite ii nuntak na in tomkal sung bang bek hi in, haksatna nam kim taw kidim hi. Pakpalh bang bek ahi hi. Tuikhu taw a kibang hi. Sauveipi a om thei bua hi….. Mikhat a thi zawk ciangin nuntakkikna anga thei tu ziam?” (Job.14:1-2,14)

Job bangin hi dokna in eite zong hong dong ahi hi. Ih thi zawk ciangin bang piang tu ziam? Ih thi zawk ciangin bangma piang nawnngawlin bocip lel tu ziam? Mihing te sia suakin ahun cinciangin lei ah kitu-a, a bocip lel ziam? Ih pai natu mun ki bang tek tu ziam? Ahibua le kibang ngawl tu ziam? Vantungngam le hellngam sia om takpi tu ziam?

Thi zawk ciangin nuntakna om ahi hunlam Lai Thiangtho in hong son bek ngawlin hi tawntung nuntakna sia vangletna taw kidim ahina zong hong son hi. A sonna ah “Pathian a itte a dingin a kivawt innpi ii a hoina, vantungngam sia kuama in mu ngeingawllai-in kuama in zong za ngei ngawllai uh hi. Ahoi zia sia kam ii son thei tu hingawl hi” (ICorinte. 2:9). Pathian sia mi bangin hong piang a, Jesu Khris kici-in, ama hileitungah hong suak in tawntung nuntakna sia letsongin hong pia ahi hi. “ Ahizongin ama in ih mawna hangin kisat nimna hong thuak hi. Ih khelhnate hangin vawtsiatna hong thuak hi. Ama in ih thuak tu ngimnateng hong puak sakin thinnopna hong pia hi. Ama liamma hangin eite in damna ih nga hi” (Isai. 53:5).

Jesu in ih thuak tu thukhenna theampo hong lak sak siatin thinglamte tungah a nuntakna hong pia lai hi. Nithum zawk ciangin thina pan hinkikna taw in thina zo ahina hong lak hi. Ama sia vantungah aka kik ma-in mi tul tampi mai ah ki langin hi leitungah nisawm li sung bang hong om hi. Romte. 4:25 na sungah, “ama in ih mawna hangin thina hong thuak a, eite thumanmi ih sua thei na tuin thina panin hong tho to kik hi” ci hi.

Jesu thawkikna sia akison thathong hi ngawlin a takpima ahi hi. Ama sia thokik takpi ahi hunlam sawltak Paul in thiangtakin hong son hi. Kuama in a nial thei bua hi. Hi thawhkikna sia Christain upna ii kingakna suangpi ahi hi. Banghangziam ci le Khris a kithawkik sak bangma-in Khris a ummi theampote zong thina panin a tho kik tu ahina hong lak hi.

Jesu Khris ii a thawkikna sia thi zawkciang-a nuntakna om ahina hong lak hi. Khris sia a tho kik tu theampote sungpan a masa phit bel ahi hi. Adam taw a kizom mi theampo tungah pumpi thina hong theng hi. Ahizongin Jesu Khris upna hangin Pathian innkuan a suak theampote in nuntakna thak a nga tu uh hi (1Cor.15:20-22). Pathian in Khris sia thina panin a thawkik sak bangma-in Jesu hong pai kik ciangin eite zong a vanglian pumpi taw ih tho kik tu hi (1Corinte.6:14).

A sisa mi theampo a thaw kik hangin, a tho kik mi theampote in vantung ngam a nga batu hi. Hi leitungah ih om hun sungin ih thi zawk cianga ih thetna tu mun ih tel tu ahi hi. Tua ahimanin hi leitungah ih nuntak hun sungin ih telna tungtawnin thu hong kikhen tu ahi hi. Mi theampo khatvei si tu hi ci-in Lai Thiangtho in hong son hi. Tua zawk ciangin thukhenna ih thuak tu hi (Hebrewte.9:27). Khris upna hanga thuman na a ngah mi khempeuhte in vantungah tawntung nuntakna a nga ding uh hi. A hizongin Khris sia Ngumpa le Topa tu-in a nial mi theampote in tawntung thina meilipi sungah kikhia tu uh hi. (Mate.25:46).

Hell sia vantungngam taw ma kibangin a om takpi ahi hi. Hi mun in thuman ngawl mite tawntung ngimna a thuakna tu mun ahi hi. Pathian thin-ukna a tawntungin thuak tu uh hi. Amate in tua mun ah haksatna namkim a thuak tu uh hi. Maizum na zong a thuak tu uh hi. Hell sia taw nei ngawl dumpi-in ki son hi (Luke.8:31, Thuplkna. 9:1). Meili pi, kat le meikuang omna, tua munah ngamtat pha ngawlte a tawntung in ngimna a thuak tu uh hi (Thuplkna. 20:10). Hell sungah kaana le ha ngawina aw bek kiza tu a, dahna le haksatna bek taw kidim tu hi (Mate.13:42).

Mipha ngawlte thina hangin Pathian a lungdam ngawl het hi. Ahizongin amate a khelhna uh panin kisikkik-a tawntung nuntakna a nga tu Pathian in a dei hi (Ezek.33:11). Ahizong in Pasian in ih ban panin hong kai ngawl tu hi. Eite in ama ih teel ba le ama hong piak tawntung nuntakna sia a nial ih hihi. Hi leitungah ih nuntakna sia ih thi zawk cianga ih thetna tu mun ih teel thei na’ng hun hong ki piaksa ahi hi. Thu um mite ahi le ih thi zawk ciangin Pathian taw vantungah ih mangkhawm tu hi. Thu um ngawlte ahi le a sih zawk ciangin tawntung meiliipi sungah a kikhia tu uh hi. Thi zawk ciangin tawntung nuntakna nga a,tawntung meiliipi taw bangbang kipeal thei tuhi ziam? Lampi khat bek om hi. Tua in Jesu Khris upna le muanna ahi hi. Jesu in, “Keima in thawkikna le nuntakna ka hihi. Kei hong umte in a thi hangin a hing kik tu hi. Kei hong um mi theampo thina taw a ki pelh tu uh hi…” (John. 11:25-26).

Hih man ngen ngawl a hong kipia tawntung nuntakna sia mikim a tu ahi hi. “Tapa a ummi theampote in tawntung nuntakna a nga tu uh hi. Ahi zongin Tapa a nialte in tawntung nuntakna mu ngawl tu uh a, Pathian thin-ukna a mate tungah om cip tu hi” (John. 3:16). Ih thi zawk ciangin Pathian hong piak letsong tawntung nuntakna nga thei natu lampi om nawn ngawl tu hi. Ih thi zawkciang tawntung nuntakna ih nga tu le ih nga ngawl tusia hi leitung ih nuntak hun sungin ih heak tu ahi hi. Jesu Khris ih san le tawntung nuntakna ih nga tu a, ih nial le tawn tung nuntakna ih nga batu hi. “Tuni in Pathian hong piak hun hoi hi-in tatkhiatna ni ahi hi” (2Corinte.6:2). Pathian ih langdona, ih mawna hangin Jesu Khris in thina hong thuak sak hi ci a ih up le, hi leitungah a kicing nuntakna a nga bek hi ngawlin ih thi zawk ciangin zong tawntung nuntakna nga in Khris taw a tawntungin ih mang khawm tu hi.

Hiteng aki-at thute na simna hangin Christ up tu khentatna na nei tha ziam? Na nei le hi a nuai-a akiat, “Tu ni-in Christ saang zo ing” ci lai ngual meek in.


Laimai kipatna ah kilekik in

Thi zawk ciangin nuntakna thak a om lai tu le?