settings icon
share icon
Saludsod

Ania ti ibaga ti Biblia maipapan iti pannakiasawa kadagiti dadduma a rasa?

Sungbat


Binilin ti Linteg ti Daan a Tulag dagiti Israelita a saanda a makias-asawa kadagiti dadduma rasa (Deuteronomio 7:3-4). Nupay kasta, saan a gapu iti maris ti kudil wenno iti nakaidumaan ti puli ti rason para iti daytoy a bilin no di ket gapu iti relihion. Ti rason no apay nga imparit ti Dios ti pannakiasawa dagiti Judio kadagiti dadduma a rasa ket gapu ta agdaydayawda kadagiti palso a dios. Mayadayo dagiti Israelita iti Dios no makiasawada kadagiti agdaydayaw kadagiti didiosen ken kadagiti pagano. Daytoy ti eksakto a napasamak idiay Israel, segun iti Malakias 2:11.

Umarngi met laeng iti daytoy ti prinsipio ti naespirituan a kinasudi a nailatag iti Baro a Tulag, ngem awan pannakainaigna daytoy iti rasa: “Saankayo a makikadua kadagiti saan a mamati a kasla ket tay kapadayo ida, ta saan a rumbeng dayta. Kasano nga agkadua ti nalinteg ken ti nakillo? Kasano nga agtipon ti lawag ken ti sipnget?” (2 Corinto 6:14). Kas iti pannakabilin dagiti Israelita (dagiti namati iti pudno a Dios) a saanda a makiasawa kadagiti agdaydayaw kadagiti didiosen, nabilin met dagiti Kristiano (dagiti namati iti Dios) a saanda a makias-asawa kadagiti saan a namati. Saan pulos nga imbaga ti Biblia a kamali ti pannakiasawa kadagiti dadduma a rasa. Ti siasinoma a mangiparit iti pannakiasawa kadagiti dadduma a rasa ket ar-aramidenna nga awanan iti turay a nagtaud iti Biblia.

Kas iti imbaga ni Martin Luther King, Jr., maukom koma ti maysa a tao babaen iti kababalinna, saan a babaen iti maris ti kudilna. Awan lugar iti biag ti maysa a Kristiano ti panangidumduma a naibasar iti rasa (Santiago 2:1-10). Kinapudnona, iti pannirigan ti Biblia, adda laeng ti maymaysa a “rasa” —ti rasa a tao, a nagtaud amin kada Adan ken Eba. Iti panagpili ti asawaen, sukimaten koma nga umuna ti maysa a Kristiano no ti mabalinna nga asawaen ket nayanak a nabalbaliwan babaen iti pammati ken ni Jesu-Cristo (Juan 3:3-5). Ti pammati ken ni Cristo ti pagrukodan a naibasar iti Biblia iti panagpili iti asawaen, saan nga iti maris ti kudil. Ti pannakiasawa kadagiti dadduma a rasa ket saan a banag a maipapan iti umno wenno kamali no di ket iti kinasirib, panagilasin, ken panagkararag.

Adu a bambanag ti nasken a timbangen dagiti agbalbalak nga agasawa. Nupay saan a mailaksid ti maris ti kudil, saan koma a daytoy ti kangrunaan a rason iti panagasawa. Mabalin a sangoen dagiti agassawa a nagtaud iti agduma a rasa ti pannakailaksid ken pannakauy-uyaw ket sisasaganada koma a mangsango kadagita a bambanag iti wagas a naibasar iti Biblia. “Ta awan ti pakaigiddiatan dagiti Judio kadagiti Hentil. Ti Dios met laeng ti Apo ti isuamin, ket bendisionanna a sibubuslon ti amin nga umawag kenkuana” (Roma 10:12). Ti iglesia a saan a kumitkita iti maris ken/wenno iti Nakristianoan a panagassawa dagiti agduduma a rasa ket maysa a nabileg a pakakitaan iti panagpapadatayo ken ni Cristo.

English



Agsubli iti kasangoan a panid ti Ilocano

Ania ti ibaga ti Biblia maipapan iti pannakiasawa kadagiti dadduma a rasa?
Facebook icon Twitter icon Pinterest icon Email icon
© Copyright Got Questions Ministries