settings icon
share icon
Vraog

Wie kin ich van God vergaeving kriege?

Antjwoord


In Hanjelinge 13:38 sjteit: "Broeders, loester! Deze Jezes liet uch weite det eur zunj vergaeve kinne waere."

Waat is vergaeving en woeveur höb ich det nudig?

't Woord "vergaeving" beteikent: "sjoen sjeep make", grasie verliene, eine sjöldj kwietsjelje. Es ver eemes kwaod höbbe gedaon, den wille ver door hun vergaeve waere, zoedet oos relasie weer gerippereerd kin waere. Vergaeving waert neet gegaeve ómdet ein miens verdeent óm vergaeve te waere. Nemes verdeent 't óm vergaeve te waere. Vergaeving is ein hanjeling op basis van leefde en genade. Vergaeving is de beslissing óm eine angere miens nieks mier te verwiete, al haet hae of zuu dich pien gedaon.

De Biebel vertèlt ós det ver allemaol vergaeving van God nudig höbbe. Veer höbbe allemaol gezunjigd. Praeker 7:20 zaet: "Want nemes op deze aerd is zoe rechvaerdig, det d'r good duit zónger te zunjige." En 1 Johannes 1:8 zaet: "Es ver zègke det ver gein zunj höbbe, den bedrege ver ószelf en höbbe ver de waorheid neet in ós." Alle zunj is oetèntelik eine opsjtandj taege God (Psalm 51:4). 't Gevolg is det ver Gods vergaeving hiel erg nudig höbbe. Es oos zunj neet vergaeve waere, den zulle ver veur iewig te lieje höbbe ónger de gevolge van oos zunj (Matteüs 25:46, Johannes 3:36).

Vergaeving - wie krieg ich det?

God zij dank, God is vol leefde en vol genade; Hae wilt hiel gaer oos zunj vergaeve! 2 Petrus 3:9 zaet: "Hae haet gedöldj mèt dich, ómdet D'r neet wilt det sommige miense vergaon, mer det zie allemaol tot inkier kómme." God wilt ós allemaol vergaeve en dus haet D'r al get gedaon óm det mäögelik te make. De einsige terechte sjtraof veur oos zunj is de doed. In de ierste hèlf van Romeine 6:23 sjteit: "De zunj betaalt ein zwaor loen: de doed!" Eine iewige doed is wat veer verdeend höbbe mèt oos zunj.

God is in Zien perfekte plan eine miens gewaore; Jezes Kristes (Johannes 1:1,14). Jezes is aan 't kruus gesjtórve. Hae haet dao de boete op zich genómme dae veer verdene: de doed. 2 Korintiërs 5:21 liert ós: "Want God haet Kristes, Dae zónger zunj waor, genómme en oos zunj op 'M gelag. In ruul daoveur raekent Hae ós de rechvaerdigheid van Häöm aan." Jezes is aan 't kruus gesjtórve. Dao haet D'r de sjtraof op zich genómme dae veer verdene! De doed van Jezes, es God, haet vergaeving veur de ganse waereld mäögelik gemaakt. 1 Johannes 2:2 sjtèlt: "Hae nóm de sjtraof veur oos zunj op Zich en haet ós ein gemaakt mèt God. Hae is 't offer veur oos zunj, en neet allein veur die van ós, maar ouch veur die van de ganse waereld." Jezes is toen oet de doed opgesjtaon, óm te laote zeen det Hae de zunj en de doed haet euverwónne (1 Korintiërs 15:1-28). Pries God, want door de doed en de opsjtenjing van Jezes Kristes is de twiede hèlf van Romeine 6:23 ouch waor: "... mer de genade van God geuf wat nemes verdeent: iewig laeve mèt Kristes Jezes, ooze Hieër."

Wils dich det ouch dien zunj vergaeve waere? Höbs se det zeurende sjöldjgeveul des se mer neet kwiet kins waere? Vergaeving van dien zunj is veur dich besjikbaar es se op Jezes Kristes wils vertroewe es diene Redder. Efeziërs 1:7 zaet: "De Zoon van God haet Zien laeve en Zien blood gegaeve óm ós van de zunj te redde. Alles wat ver höbbe foutgedaon is ós daodoor vergaeve. Wat ein óngeluifelikke genade!

Jezes haet ooze sjöldj veur ós betaald, zoedet veer vergaeve kóste waere. 't Einsige des se hoofs te doon is God vraoge óm dich te vergaeve door Jezes Kristes en geluive det Jezes gesjtórve is óm te betale veur dien vergaeving... en den zal Hae dich vergaeve! Johannes 3:16-17 bevat dees manjefieke baodsjap: "Want God haet zoe väöl leefde veur de waereld, det Hae Ziene einsige Zoon haet opgegaeve, zoedet eder dae in Häöm geluif neet verlaore zal gaon, mer 't ieuwige laeve zal höbbe. God haet Ziene Zoon neet nao de waereld gezónje óm 'r te veroerdeile, mer óm 'r te redde van de óngergank."

Vergaeving - is 't echt zoe gemaekelik?

Jao, 't is echt zoe gemaekelik! Doe kins dien vergaeving van God neet verdene. Doe kins neet genóg betale óm dit van God te kriege. Doe kins 't allein in geluif óntvange, dankzij de genade en 't erberme van God. Es se Jezes Kristes noe wils aannumme es diene Redder en vergaeving wils óntvange van God, den is dit ein veurbeeld van ein gebèd des se kins baeje. Vergaet neet det 't opzègke van ein gebèd dich noets zal kinne redde. Allein ein echt vertroewe in Kristes kin dich oet dien zunj redde. Dit gebèd is gewoen ein meneer óm aan God dudelik te make des se in 'M geluifs en óm 'M te danke veur dien redding. "God, ich weit det ich taege Uch gezunjigd höb en det ich eine sjtraof verdeen. Mer Jezes haet de sjtraof dae ich verdeen op Zich genómme, zoedet ich vergaeve kin waere door in Häöm te geluive. Ich kier mich noe aaf van mien zunj en vertroe allein op Uch veur mien redding. Danke veur Eur wónjerbaarlikke genade en vergaeving: 't kado van 't iewige laeve! Ame!"

Höbs dich ein besjloet genómme veur Kristes door was se hie höbs gelaeze? Es det zoe is, klik den estebleef op de knoep "Jao, ich höb Jezes vandaag aangenómme".

English



Trök nao de Limburgse toespagina

Wie kin ich van God vergaeving kriege?
© Copyright Got Questions Ministries