ଯୀଶୁ ତାଙ୍କ ମୃତ୍ୟୁ ଏବଂ ପୁନରୁତ୍ଥାନ ମଧ୍ୟରେ ନରକକୁ ଯାଇଥିଲେ କି?



ପ୍ରଶ୍ନ: ଯୀଶୁ ତାଙ୍କ ମୃତ୍ୟୁ ଏବଂ ପୁନରୁତ୍ଥାନ ମଧ୍ୟରେ ନରକକୁ ଯାଇଥିଲେ କି?

ଉତ୍ତର:
ଏହି ପ୍ରଶ୍ନ ବିଷୟରେ ଅନେକ ଗୁଡିଏ ଦ୍ବନ୍ଦ ଅଛି | ଏହି ଧାରଣା ମୁଖ୍ୟତଃ ପ୍ରେରିତମାନଙ୍କ ଧର୍ମବିଶ୍ବାସରୁ ଆସିଛି ଯାହା "ସେ ନରକକୁ ଅବତରଣ କଲେ" ବୋଲି ଦର୍ଶାଏ | ଯୀଶୁ "ନରକ"କୁ ଯିବା ବିଷୟରେ ବର୍ଣ୍ଣିତ କେତେକ ଶାସ୍ତ୍ରାଂଶ ଅଛି ଯାହା ଅନୁବାଦିତ ହେବା ଉପରେ ନିର୍ଭର କରେ | ଏହି ଆଲୋଚ୍ୟ ବିଷୟକୁ ଅଧ୍ୟୟନ କଲେ, ମୃତମାନଙ୍କର ସାମ୍ରାଜ୍ୟ ବିଷୟରେ ବାଇବଲ କ'ଣ ଶିକ୍ଷା ଦିଏ ସେ ବିଷୟରେ ବାଇବଲ କ'ଣ ଶିକ୍ଷା ଦିଏ ପ୍ରଥମେ ବୁଝିବା ଗୁରୁତ୍ବପୂର୍ଣ୍ଣ ଅଟେ |

ହିବ୍ରୁ ଶାସ୍ତ୍ରରେ, ମୃତମାନଙ୍କର ସ୍ଥଳୀକୁ ବର୍ଣ୍ଣନା କରୁଥିବା ଶବ୍ଦ ଶିଓଲ୍ (sheol) ଅଟେ | ଏହା ସରଳରେ "ମୃତମାନଙ୍କର ସ୍ଥାନ" ବା "ମୃତବ୍ୟକ୍ତିମାନଙ୍କ ପ୍ରାଣ/ଆତ୍ମା ଗୁଡିକର ସ୍ଥାନ |" ନୂତନ ନିୟମରେ ନରକ ନିମନ୍ତେ ବ୍ୟବହୃତ ଶବ୍ଦ "ହେଦସ୍" (hades) ଅଟେ, ଯାହା "ମୃତମାନଙ୍କର ସ୍ଥାନ"କୁ ଉଲ୍ଲେଖ କରେ | ନୂତନ ନିୟମରେ ଅନ୍ୟ ଶାସ୍ତ୍ରାଂଶ ଦର୍ଶାଏ ଯେ, ଶିଓଲ୍/ହେଦସ୍ (sheol/hades) ଏକ ସାମୟିକ ସ୍ଥାନ ଅଟେ, ଯେଉଁଠି ପ୍ରାଣ ବା ଆତ୍ମାଗୁଡିକ ଶେଷ ପୁନରୁତ୍ଥାନ ଏବଂ ବିଚାର ନିମନ୍ତେ ଅପେକ୍ଷା କରି ରହିଥାନ୍ତି | ପ୍ରକାଶିତ ୨୦:୧୧-୧୫ ଏହି ଦୁଇ ମଧ୍ୟରେ ଥିବା ସ୍ବଷ୍ଟ ଭିନ୍ନତା ପ୍ରଦାନ କରେ | ନରକ (ଅଗ୍ନିମୟ ହ୍ରଦ) ବିନାଶପ୍ରାପ୍ତ ଲୋକମାନଙ୍କ ନିମନ୍ତେ ସ୍ଥାୟୀ ଏବଂ ଚୂଡାନ୍ତ ସ୍ଥାନ | ହେଦସ୍ (hades) ଏକ ଅସ୍ଥାୟୀ ସ୍ଥାନ ଅଟେ | ତେଣୁ, ନା, ଯୀଶୁ ନରକକୁ ଯାଇନଥିଲେ କାରଣ ନରକ ଏକ ଭବିଷ୍ୟତ୍ ସ୍ଥଳୀ, ଏହା କେବଳ ମହାନ୍ ଶ୍ବେତ ସିଂହାସନ ବିଚାର ପରେ ହିଁ କାର୍ଯ୍ୟକ୍ଷମ ହେବ (ପ୍ରକାଶିତ ୨୦:୧୧-୧୫) |

ଶିଓଲ୍/ହେଦସ୍ (sheol/hades) ଦୁଇ ଭାଗ ହୋଇଥିବା ଏକ ବାସ୍ତବ ସ୍ଥଳୀ ଅଟେ (ମାଥିଉ ୧୧:୨୩, ୧୬:୧୮; ଲୂକ ୧୦:୧୫, ୧୬:୨୩; ପ୍ରେରିତ ୨:୨୭-୩୧)), ଗୋଟିଏ ଉଦ୍ଧାରପ୍ରାପ୍ତ ଓ ଅନ୍ୟଟି ବିନାଶପ୍ରାପ୍ତମାନଙ୍କର ବାସଗୃହ | ଉଦ୍ଧାରପ୍ରାପ୍ତ ବ୍ୟକ୍ତିମାନଙ୍କ ବାସସ୍ଥାନକୁ "ପାରଦୀଶ" ଏବଂ "ଅବ୍ରହାମଙ୍କ କୋଳ" ବୋଲି କୁହାଯାଉଥିଲା | ଉଦ୍ଧାରପ୍ରାପ୍ତ ବ୍ୟକ୍ତି ଓ ବିନାଶପ୍ରାପ୍ତ ବ୍ୟକ୍ତିମାନଙ୍କ ବାସଗୃହ ଏକ "ବୃହତ୍ ବ୍ୟବଧାନ" ଦ୍ବାରା ପୃଥକୀକୃତ ଅଟେ (ଲୂକ ୧୬:୨୬) | ଯୀଶୁ ଯେତେବେଳେ ସ୍ବର୍ଗକୁ ଆରୋହଣ କଲେ, ସେ ପାରାଦୀଶକୁ ଧରିରଖିଥିବା ଲୋକମାନଙ୍କୁ (ବିଶ୍ବାସୀମାନଙ୍କୁ) ତାଙ୍କ ସହ ନେଇଗଲେ (ଏଫିସୀୟ ୪:୮-୧୦) | ଶିଓଲ୍/ହେଦସ୍ (sheol/hades)ର ବିନାଶପ୍ରାପ୍ତ ଅଂଶ ଅପରିବର୍ତ୍ତିତ ହୋଇରହିଅଛି | ସମସ୍ତ ଅବିଶ୍ବାସୀ ମୃତମାନେ ଭବିଷ୍ୟତରେ ସେମାନଙ୍କର ଶେଷ ବିଚାର ନିମନ୍ତେ ସେହି ସ୍ଥାନକୁ ଯାଇଥାନ୍ତି | ଯୀଶୁ ଶିଓଲ୍/ହେଦସ୍ (sheol/hades) କୁ ଯାଇଥିଲେ କି? ହଁ., ଏଫିସୀୟ ୪:୮-୧୦ ଏବଂ ୧ପିତର ୩:୧୮-୨୦ ଅନୁଯାୟୀ ସେ ସେଠାକୁ ଯାଇଥିଲେ |

କିଙ୍ଗ୍ ଜେମସ୍ ଭର୍ସନ୍ ରେ ଗୀତସଂହିତା ୧୬:୧୦-୧୧ ପରି ଶାସ୍ତ୍ରାଂଶର ଅନୁବାଦରୁ କିଛି ଦ୍ବନ୍ଦ ଉତ୍ଥାପିତ ହୋଇଅଛି, "କାରଣ ତୁମ୍ଭେ ମୋ ପ୍ରାଣକୁ ନରକରେ (ଇଂରାଜୀ - କିଙ୍ଗ୍ ଜେମସ୍ ଭର୍ସନ୍; ଓଡିଆ ବାଇବଲରେ "ପାତାଳ" ଲେଖାଯାଇଛି ଯାହା "ଶିଓଲ୍ ବା ହେଦସ୍"କୁ ବୁଝାଏ, ଯାହା ଏକ ଠିକ୍ ଅନୁବାଦ) ପରିତ୍ୟାଗ କରିବନାହିଁ; କିମ୍ବା ଆପଣା ଭକ୍ତଜନଙ୍କୁ ପରିତ୍ୟକ୍ତ ହେବାକୁ ଦେବନାହିଁ... ତୁମ୍ଭେ ମୋତେ ଜୀବନର ପଥ ଦେଖାଇବ |" ଏହି ପଦରେ "ନରକ" ଏକ ଠିକ୍ ଅନୁବାଦ ନୁହେଁ | ଏକ ଠିକ୍ ପଠନ "ପାତାଳ" କିମ୍ବା "ଶିଓଲ୍" ହୋଇପାରେ | ଯୀଶୁ ତାଙ୍କ ପାର୍ଶ୍ବର ଡକାୟତଙ୍କୁ କହିଲେ, "ଆଜି ତୁମ୍ଭେ ମୋ ସହିତ ପାରଦୀଶରେ ଉପସ୍ଥିତ ହେବ" (ଲୂକ ୨୩:୪୩) | ଯୀଶୁଙ୍କ ଶରୀର କବରରେ ଥିଲା; ତାଙ୍କ ପ୍ରାଣ/ଆତ୍ମା ଶିଓଲ୍/ହେଦସ୍ (sheol/hades )ର "ପାରଦୀଶ" ପାର୍ଶ୍ବକୁ ଗଲା | ସେ ତା'ପରେ ପାରଦୀଶରୁ ସମସ୍ତ ଧାର୍ମିକ ମୃତମାନଙ୍କୁ ବାହାର କଲେ ଏବଂ ସେମାନଙ୍କୁ ତାଙ୍କ ସହ ସ୍ବର୍ଗକୁ ନେଲେ | ଦୁର୍ଭାଗ୍ୟବଶତଃ, "ଶିଓଲ୍" (sheol), "ହେଦସ୍"(hades) ଏବଂ "ନରକ" ନିମନ୍ତେ ଯେଉଁ ହିବ୍ରୁ ବା ଗ୍ରୀକ୍ ଶବ୍ଦ ଅନୁବାଦିତ ହୋଇଛି ବାଇବଲର ଅନେକ ଅନୁବାଦରେ ଏହା ସଙ୍ଗତ ବା ସଠିକ୍ ହୋଇ ରହିନାହିଁ |

କେତେକଙ୍କର ମତ ରହିଛି ଯେ, ଆମ୍ଭମାନଙ୍କ ପାପ ନିମନ୍ତେ ପୁନଶ୍ଚ ଦଣ୍ଡିତ ହେବା ନିମନ୍ତେ ଯୀଶୁ "ନରକ"କୁ ବା ଶିଓଲ୍/ହେଦସ୍ (sheol/hades) ର କ୍ଲେଶ ଭୋଗିବା ପାର୍ଶ୍ବକୁ ଯାଇଥିଲେ | ଏହି ଧାରଣା ସମ୍ପୂର୍ଣ୍ଣରୂପେ ବାଇବଲ ସମ୍ମତ ନୁହେଁ | କ୍ରୁଶ ଉପରେ ଯୀଶୁଙ୍କ ମୃତ୍ୟୁ ଏବଂ ଆମ ସ୍ଥାନରେ ତାଙ୍କ କ୍ଲେଶଭୋଗ ଆମ୍ଭମାନଙ୍କ ଉଦ୍ଧାର ନିମନ୍ତେ ଯଥେଷ୍ଟ ଅଟେ | ତାହାଙ୍କ ରକ୍ତପାତ ଆମ୍ଭମାନଙ୍କ ପାପରୁ ପରିଷ୍କାର କରେ (୧ଯୋହନ ୧:୭-୯) | ଯେତେବେଳେ ସେ କ୍ରୁଶ ଉପରେ ଝୁଲିଲେ, ସେ ସମଗ୍ର ମାନବର ପାପର ବୋଝ ତାଙ୍କ ଉପରକୁ ନେଲେ | ସେ ଆମ୍ଭମାନଙ୍କ ନିମନ୍ତେ ପାପ ସ୍ବରୂପ ହେଲେ: "ଯାହାଙ୍କଠାରେ ପାପର ଲେଶମାତ୍ର ନ ଥିଲା, ତାହାଙ୍କୁ ସେ ଆମ୍ଭମାନଙ୍କ ନିମନ୍ତେ ପାପ ସ୍ବରୂପ କଲେ, ଯେପରି ଆମ୍ଭେମାନେ ତାହାଙ୍କ ଦ୍ବାରା ଈଶ୍ବରଙ୍କର ଧାର୍ମିକତା ସ୍ବରୂପ ହେଉ" (୨କରିନ୍ଥୀୟ ୫:୨୧) | ପାପର ଏହି ଆରୋପଣ କ୍ରୁଶ ଉପରେ ଖ୍ରୀଷ୍ଟଙ୍କଠାରେ ଢଳାଯିବାକୁ ଥିବା ପାପ ରୂପକ ପାନପାତ୍ର ଯାହା ସହ ସେ ଗେଥସୀମାନୀ ଉଦ୍ୟାନରେ ସଂଘର୍ଷ କରିଥିଲେ ବୁଝିବାକୁ ଆମ୍ଭମାନଙ୍କୁ ସାହାଯ୍ୟ କରେ |

ଯୀଶୁ ଯେତେବେଳେ କ୍ରୁଶ ଉପରେ ଚିତ୍କାର କଲେ, "ହେ ମୋହର ଈଶ୍ବର, ତୁମ୍ଭେ ମୋତେ କାହିଁକି ମୋତେ ପରିତ୍ୟାଗ କଲ?" (ମାଥିଉ ୨୭:୪୬), ଏହା କହିବା ପରେ ହିଁ ତାଙ୍କ ଉପରେ ଢଳାଯାଇଥିବା ପାପ ଯୋଗୁଁ ସେ ପିତାଙ୍କଠାରୁ ପୃଥକ୍ ହେଲେ | ଯେତେବେଳେ ସେ ତାଙ୍କ ଆତ୍ମା ପରିତ୍ୟାଗ କଲେ, ସେ କହିଲେ, "ହେ ପିତା, ତୁମ୍ଭ ହସ୍ତରେ ମୁଁ ଆପଣାର ଆତ୍ମା ସମର୍ପଣ କରୁଅଛି" (ଲୂକ ୨୩:୪୬) | ଆମ ସ୍ଥାନରେ ତାଙ୍କ ଦୁଃଖଭୋଗ ସମ୍ପୂର୍ଣ୍ଣ ଥିଲା | ତାଙ୍କ ପ୍ରାଣ/ଆତ୍ମା ହେଦସ୍ ର ପାରଦୀଶ ପାର୍ଶ୍ବକୁ ଯାଇଥିଲା | ଯୀଶୁ ନରକକୁ ଯାଇନଥିଲେ | ଯୀଶୁ ମୃତ୍ୟୁଭୋଗ କରିବା କ୍ଷଣି ତାଙ୍କ ଦୁଃଖଭୋଗ ଶେଷ ହୋଇଥିଲା | ପାପର ୠଣ ପରିଶୋଧ କରାଯାଇଥିଲା | ତା'ପରେ ସେ ତାଙ୍କ ଶରୀରର ପୁନଃଉତ୍ଥାନ ଏବଂ ତାଙ୍କ ଆରୋହଣରେ ଗୌରବରେ ପ୍ରବେଶ କରିବା ନିମନ୍ତେ ଅପେକ୍ଷାରେ ଥିଲେ | ଯୀଶୁ ନରକକୁ ଯାଇଥିଲେକି? ନା | ଯୀଶୁ ଶିଓଲ୍/ହେଦସ୍ (sheol/hades) କୁ ଯାଇଥିଲେ କି? ହଁ |



ଓଡିଆ ହୋମ୍ ପେଜକୁ ପ୍ରତ୍ୟାବର୍ତ୍ତନ କରନ୍ତୁ



ଯୀଶୁ ତାଙ୍କ ମୃତ୍ୟୁ ଏବଂ ପୁନରୁତ୍ଥାନ ମଧ୍ୟରେ ନରକକୁ ଯାଇଥିଲେ କି?