ଯୀଶୁ ପୁତ୍ର ଈଶ୍ବର କହିବାର ଅର୍ଥ କ’ଣ?


ପ୍ରଶ୍ନ: ଯୀଶୁ ପୁତ୍ର ଈଶ୍ବର କହିବାର ଅର୍ଥ କ’ଣ?

ଉତ୍ତର:
ମନୁଷ୍ୟ ବାପା ଅର୍ଥରେ ଯୀଶୁ ଈଶ୍ବରଙ୍କ ପୁଅ ନୁହଁନ୍ତି । ଈଶ୍ବର ବିବାହ କରି ଜଣେ ପୁଅର ବାପା ହୋଇନାହାନ୍ତି । ଈଶ୍ବର ମରିୟମଙ୍କ ସହ ସାକ୍ଷାତ କରି ତାଙ୍କ ସହ ମିଳି ଜଣେ ପୁଅକୁ ଜନ୍ମ ଦେଇନାହାନ୍ତି । ଏହି ଅର୍ଥରେ ଯୀଶୁ ଈଶ୍ବରଙ୍କ ପୁଅ ଅଟନ୍ତି ଯେ ଈଶ୍ବର ମନୁଷ୍ୟ ରୂପରେ ପ୍ରକାଶିତ ହେଲେ (ଯୋହନ 1:1, 14) । ଯୀଶୁ ଈଶ୍ବରଙ୍କ ପୁଅ ଏହି ଅର୍ଥରେ ଯେ ସେ ପବିତ୍ରଆତ୍ମାଙ୍କ ଦ୍ବାରା ମରିୟମଙ୍କ ଗର୍ଭରେ ରହିଥିଲେ । ଲୂକ 1:35 କୁହେ “ଦୂତ ତାଙ୍କୁ ଉତ୍ତର ଦେଲେ, ପବିତ୍ରଆତ୍ମା ତୁମ୍ଭ ଉପରେ ଅବତରଣ କରିବେ ଓ ପରାତ୍ପରଙ୍କ ଶକ୍ତି ତୁମ୍ଭକୁ ଆବୋରିବ, ଏଣୁ ଯେ ଜାତ ହେବେ, ସେ ପବିତ୍ର ଓ ଈଶ୍ବରଙ୍କ ପୁତ୍ର ବୋଲି ଖ୍ୟାତ ହେବେ ।”

ଯୀଶୁ ଯିହୂଦୀ ନେତାମାନଙ୍କ ଆଗରେ ଠିଆ ହୋଇ ବିଚାରିତ ହେଉଥିବା ସମୟରେ, ପ୍ରଧାନ ଯାଜକ ଯୀଶୁଙ୍କ ବିଷୟରେ ଜୋର୍‍‍ ଦେଇ କହିଲେ “ଆମ୍ଭେ ତୁମ୍ଭକୁ ଜୀବନ୍ତ ଈଶ୍ବରଙ୍କ ନାମରେ ଶପଥ ଦେଉଅଛୁ, ଆମ୍ଭମାନଙ୍କୁ କୁହ, ତୁମ୍ଭେ କି ଈଶ୍ବରଙ୍କ ପୁତ୍ର ଖ୍ରୀଷ୍ଟ?” (ମାଥିଉ 26:63) । “ଯୀଶୁ ତାଙ୍କୁ କହିଲେ ‘ଆପଣ କହିଅଛନ୍ତି’; ‘ଆହୁରି, ମୁଁ ଆପଣମାନଙ୍କୁ କହୁଅଛି, ଅଦ୍ୟାବଧି ଆପଣମାନେ ମନୁଷ୍ୟପୁତ୍ରଙ୍କୁ ପରାକ୍ରମର ଦକ୍ଷିଣ ପାର୍ଶ୍ବରେ ଉପବିଷ୍ଟ ଓ ଆକାଶର ମେଘମାଳାରେ ଆଗମନ କରିବା ଦେଖିବେ’” (ମାଥିଉ 26:64) । ଯିହୂଦୀ ନେତାମାନେ ଏହାର ପ୍ରତିକ୍ରିୟା ସ୍ବରୂପ ଯୀଶୁ ଈଶ୍ବର ନିନ୍ଦା କରୁଛନ୍ତି ବୋଲି କହି ତାହାଙ୍କ ବିରୁଦ୍ଧରେ ଅଭିଯୋଗ କଲେ (ମାଥିଉ 26:65-66) । ପରବର୍ତ୍ତୀ ସମୟରେ, ପନ୍ତିୟ ପିଲାତଙ୍କ ଆଗରେ “ଯିହୂଦୀମାନେ ତାଙ୍କୁ ଉତ୍ତର ଦେଲେ, ଆମ୍ଭମାନଙ୍କର ଗୋଟିଏ ବ୍ୟବସ୍ଥା ଅଛି ଓ ସେହି ବ୍ୟବସ୍ଥା ଅନୁସାରେ ସେ ପ୍ରାଣଦଣ୍ଡର ଯୋଗ୍ୟ, କାରଣ ସେ ନିଜକୁ ଈଶ୍ବରଙ୍କ ପୁତ୍ର ବୋଲି କହିଅଛି” (ଯୋହନ 19:7) । ଈଶ୍ବରଙ୍କ ପୁଅ ବୋଲି ସେ ଦାବୀ କରିବାରୁ କାହିଁକି ଏହାକୁ ଈଶ୍ବର ନିନ୍ଦା ବୋଲି ଧରାଗଲା ଓ ସେ ପ୍ରାଣଦଣ୍ଡ ପାଇବାର ଯୋଗ୍ୟ ବୋଲି କୁହାଗଲା? ଯୀଶୁ “ଈଶ୍ବରଙ୍କ ପୁତ୍ର” ବୋଲି ଯେଉଁ ବାକ୍ୟାଂଶ କହିଥିଲେ, ତାହାକୁ ଯିହୂଦୀ ନେତାମାନେ ସଠିକ୍‍ ବୁଝିପାରିଥିଲେ । ଈଶ୍ବରଙ୍କ ପୁଅ ହେବାର ଅର୍ଥ ହେଉଛି ଈଶ୍ବରଙ୍କର ଯେଉଁ ସ୍ବଭାବ ବା ପ୍ରକୃତି ରହିଛି ଠିକ୍‍ ସେହି ସ୍ବଭାବ ବା ପ୍ରକୃତିର ହେବା । ଈଶ୍ବରଙ୍କ ପୁଅ “ଈଶ୍ବରଙ୍କ ଅଟନ୍ତି ।” ଈଶ୍ବରଙ୍କର ଯେପରି ପ୍ରକୃତି ଥିଲା ନିଜର ମଧ୍ୟ ଠିକ୍‍ ସେହି ପ୍ରକୃତି ବା ସ୍ବଭାବ ରହିଛି ବୋଲି କହିବା ପ୍ରକୃତରେ ଈଶ୍ବର ହୋଇଥିବା ବିଷୟକୁ ହିଁ ବୁଝାଏ ଏବଂ ଏହା ଯିହୂଦୀ ନେତାମାନଙ୍କ ପାଇଁ ଈଶ୍ବର ନିନ୍ଦା ଥିଲା; ଅତଏବ, ସେମାନେ ଲେବୀୟ 24:15କୁ ଦେଖାଇ ଯୀଶୁଙ୍କ ମୃତ୍ୟୁ ଦାବୀ କଲେ । ଏବ୍ରୀ 1:3 ଏହାକୁ ଅତି ସ୍ବଷ୍ଟ ଭାବରେ ପ୍ରକାଶ କରିଥାଏ –“ପୁତ୍ର ହେଉଛନ୍ତି ଈଶ୍ବରଙ୍କ ମହିମାର ପ୍ରଭା ଓ ତାହାଙ୍କ ତତ୍ତ୍ବର ପ୍ରତିମୂର୍ତ୍ତି ।”

ଅନ୍ୟ ଏକ ଉଦାହରଣ ଯୋହନ 17:12ରେ ଦେଖିବାକୁ ମିଳେ ଯେଉଁଠି ଯିହୂଦାଙ୍କୁ “ବିନାଶର ସନ୍ତାନ” ଭାବେ ବର୍ଣ୍ଣନା କରାଯାଇଛି । ଯୋହନ 6:71 ଆମ୍ଭମାନଙ୍କୁ କୁହେ ଯେ ଯିହୂଦା ଶିମୋନଙ୍କ ପୁଅ ଥିଲେ । ଯୋହନ 17:12 ଯିହୂଦାଙ୍କୁ “ବିନାଶର ସନ୍ତାନ” କହିବା ଦ୍ବାରା କ’ଣ ବୁଝାଏ? Perdition (ବିନାଶ) ଶବ୍ଦର ଅର୍ଥ ହେଉଛି “ଧ୍ବଂସ, ବିଧ୍ବସ୍ତ, ନଷ୍ଟ ।” ଯିହୂଦା “ଧ୍ବଂସ, ବିଧ୍ବସ୍ତ, ନଷ୍ଟ”ର ଆକ୍ଷରିକ ପୁଅ ନ ଥିଲେ, କିନ୍ତୁ ଏହି ସମସ୍ତ ଯିହୂଦାଙ୍କ ଜୀବନର ଚିହ୍ନ ଥିଲା । ଯିହୂଦା ବିନାଶର ଚିହ୍ନ ଥିଲେ । ଠିକ୍‍ ଏହିପରି ଭାବରେ, ଯୀଶୁ ଈଶ୍ବରଙ୍କ ପୁଅ ଥିଲେ । ଈଶ୍ବରଙ୍କ ପୁଅ ହେଉଛନ୍ତି ଈଶ୍ବର । ଯୀଶୁ ହେଉଛନ୍ତି ଈଶ୍ବରଙ୍କ ମନୁଷ୍ୟରୂପ (ଯୋହନ 1:1, 14) ।



ଓଡିଆ ପେଜ୍ କୁ ପ୍ରତ୍ୟାବର୍ତ୍ତନ କରନ୍ତୁ



ଯୀଶୁ ପୁତ୍ର ଈଶ୍ବର କହିବାର ଅର୍ଥ କ’ଣ?