ତ୍ରିତ୍ବ ଈଶ୍ବରଙ୍କ ବିଷୟରେ ବାଇବଲ କ’ଣ ଶିକ୍ଷା ଦିଏ?


ପ୍ରଶ୍ନ: ତ୍ରିତ୍ବ ଈଶ୍ବରଙ୍କ ବିଷୟରେ ବାଇବଲ କ’ଣ ଶିକ୍ଷା ଦିଏ?

ଉତ୍ତର:
ତ୍ରିତ୍ବ ଈଶ୍ବରଙ୍କ ଧାରଣ ବିଷୟରେ ଥିବା ସବୁଠାରୁ ଅଧିକ କଷ୍ଟକର ବିଷୟ ହେଉଛି ଏହାକୁ ଯଥେଷ୍ଟ ଭାବରେ ବୁଝାଇବା ନିମନ୍ତେ କୌଣସି ଉପାୟ ନାହିଁ । ତ୍ରିତ୍ବ ଈଶ୍ବରଙ୍କ ଧାରଣା କୌଣସି ମନୁଷ୍ୟ ପକ୍ଷରେ ସମ୍ପୂର୍ଣ୍ଣ ବୁଝିବା ଅସମ୍ଭବ ଅଟେ; ଏହାକୁ ବୁଝାଇବା ଦୂରେ ଥାଉ । ଈଶ୍ବର ଆମ୍ଭମାନଙ୍କଠାରୁ ଅସୀମ ଭାବରେ ମହାନ୍‍ ଅଟନ୍ତି; ତେଣୁ, ଆମେ ତାହାଙ୍କୁ ସମ୍ପୂର୍ଣ୍ଣଭାବେ ବୁଝିବା ଆଶା କରିବା କଥା ନୁହେଁ । ବାଇବଲ ଶିକ୍ଷା ଦିଏ ଯେ ପିତା ଈଶ୍ବର ଅଟନ୍ତି, ଏବଂ ଯୀଶୁ ଈଶ୍ବର ଅଟନ୍ତି ଓ ପବିତ୍ରଆତ୍ମା ମଧ୍ୟ ଈଶ୍ବର ଅଟନ୍ତି । ବାଇବଲ ଆହୁରି ମଧ୍ୟ ଶିକ୍ଷା ଦିଏ ଯେ କେବଳ ଏକମାତ୍ର ଈଶ୍ବର ଅଛନ୍ତି । ଯଦିଓ ଆମେ ତ୍ରିତ୍ବ ଈଶ୍ବରଙ୍କଠାରେ ବିଭିନ୍ନ ବ୍ୟକ୍ତିଙ୍କ ମଧ୍ୟରେ ଥିବା ସମ୍ପର୍କର କିଛି ବିଷୟକୁ ଜାଣିପାରିବା, ପରିଶେଷରେ ଦେଖିବାକୁ ଗଲେ ଏହା ମନୁଷ୍ୟ ବୋଧର ଅଗମ୍ୟ । ଅଥଚ, ଏହାର ଅର୍ଥ ନୁହେଁ ଯେ ତ୍ରିତ୍ବ ଈଶ୍ବର ସତ୍ୟ ନୁହେଁ କିମ୍ବା ଏହା ବାଇବଲ ଉପରେ ଆଧାରିତ ନୁହେଁ ।

ତ୍ରିତ୍ବ ଈଶ୍ବର ହେଉଛନ୍ତି ଈଶ୍ବର ତିନିଜଣ ବ୍ୟକ୍ତିଙ୍କଠାରେ ଅଛନ୍ତି । ଜାଣିରଖନ୍ତୁ ଯେ ଏହା ତିନିଟି ଈଶ୍ବର ଥିବାର କଥା କୁହେ ନାହିଁ । ଆହୁରି ମନରେ ରଖନ୍ତୁ ଯେ “ତ୍ରିତ୍ବ ଈଶ୍ବର” ଶବ୍ଦ ବା ବାକ୍ୟାଂଶ ଶାସ୍ତ୍ରରେ ଦେଖିବାକୁ ମିଳେ ନାହିଁ । ଏହା ଏକ ଶବ୍ଦ ବା ବାକ୍ୟାଂଶ ଯାହା ତିନି ଈଶ୍ବରଙ୍କ ବିଷୟରେ ବୁଝାଇବା ନିମନ୍ତେ ବ୍ୟବହାର କରାଯାଇଛି ଯେପରିକି – ତିନିଜଣ ଏକ ସମୟରେ ରହିଛନ୍ତି, ତିନିଜଣ ଅନନ୍ତ ଅଟନ୍ତି ଯେଉଁ ତିନିଜଣଙ୍କ ସମାହାର ହେଉଛନ୍ତି ଈଶ୍ବର । ପ୍ରକୃତ ଗୁରୁତ୍ବପୂର୍ଣ୍ଣ ବିଷୟ ହେଉଛି “ତ୍ରିତ୍ବ ଈଶ୍ବର” ଶବ୍ଦ ବା ବାକ୍ୟାଂଶ ଦ୍ବାରା ଯେଉଁ ଧାରଣାଟି ରହିଛି ତାହା ଶାସ୍ତ୍ରରେ ଦେଖିବାକୁ ମିଳେ । ତ୍ରିତ୍ବ ଈଶ୍ବରଙ୍କ ବିଷୟରେ ଈଶ୍ବରଙ୍କ ବାକ୍ୟ ଯାହା କୁହେ ତାହା ତଳେ ଦିଆଗଲା:

1) ଏକମାତ୍ର ଈଶ୍ବର ଅଛନ୍ତି (ଦ୍ବିତୀୟ ବିବରଣ 6:4; 1କରିନ୍ଥୀୟ 8:4; ଗାଲାତୀୟ 3:20; 1ତିମଥି 2:5) ।

2) ତ୍ରିତ୍ବ ଈଶ୍ବର ତିନିଜଣ ବ୍ୟକ୍ତିଙ୍କ ସମାହାର (ଆଦି 1:1, 26; 3:22; 11:7; ଯିଶାଇୟ 6:8; 48:16, 61:1; ମାଥିଉ 3:16-17; 28:19; 2କରିନ୍ଥୀୟ 13:14) । ଆଦି 1:1ରେ, ହିବ୍ରୁ ବହୁବଚନ ଶବ୍ଦ ଇଲୋହୀମ୍‍ (Elohim) ବ୍ୟବହୃତ ହୋଇଛି । ଆଦି 1:26; 3:22; 11:7 ଓ ଯିଶାଇୟ 6:8ରେ “ଆମ୍ଭମାନଙ୍କୁ” ନିମନ୍ତେ ଥିବା ବହୁବଚନ ସର୍ବନାମ ବ୍ୟବହୃତ ହୋଇଛି । ଇଲୋହୀମ୍‍ (Elohim) ଓ ସର୍ବନାମ “ଆମ୍ଭମାନଙ୍କୁ” ବହୁବଚନ ଶବ୍ଦ ଓ ଏହା ନିଶ୍ଚିତ ଭାବରେ ହିବ୍ରୁ ଭାଷାରେ ଦୁଇରୁ ଅଧିକ ବୁଝାଏ । ଯଦିଓ ଏହା ସ୍ବଷ୍ଟ ଭାବରେ ତ୍ରିତ୍ବ ଈଶ୍ବରଙ୍କ ନିମନ୍ତେ ଏକ ଯୁକ୍ତି ନୁହେଁ, ତଥାପି ଏହା ଈଶ୍ବରଙ୍କଠାରେ ବହୁବଚନର ଦିଗକୁ ଦର୍ଶାଉଛି । ଈଶ୍ବରଙ୍କ ନିମନ୍ତେ ଥିବା ବହୁବଚନ ଶବ୍ଦ ଇଲୋହୀମ୍‍ (Elohim) ନିଶ୍ଚିତ ଭାବରେ ତ୍ରିତ୍ବ ଈଶ୍ବରଙ୍କର ଉପସ୍ଥିତିକୁ ଅନୁମତି ଦେଇଥାଏ ।

ଯିଶାଇୟ 48:16 ଓ 61:1ରେ, ପିତା ଓ ପବିତ୍ରଆତ୍ମାଙ୍କ ସମ୍ବନ୍ଧରେ ପୁତ୍ର କହୁଅଛନ୍ତି । ପୁତ୍ର କହୁଅଛନ୍ତି ନା ନାହିଁ ତାହା ଦେଖିବା ନିମନ୍ତେ ଯିଶାଇୟ 61:1 ସହ ଲୂକ 4:14-19କୁ ତୁଳନା କରନ୍ତୁ । ମାଥିଉ 3:16-17 ଯୀଶୁଙ୍କ ବାପ୍ତିସ୍ମର ଘଟନାକୁ ବର୍ଣ୍ଣନା କରେ । ଏହି ଶାସ୍ତ୍ରାଂଶରେ ପବିତ୍ରଆତ୍ମା ଈଶ୍ବର ପୁତ୍ର ଈଶ୍ବରଙ୍କ ଉପରକୁ ଓହ୍ଲାଉଅଛନ୍ତି ଯେତେବେଳେ କି ପିତା ଈଶ୍ବର ପୁତ୍ରଙ୍କଠାରେ ତାହାଙ୍କର ସନ୍ତୋଷ ରହିଥିବା କଥା କହୁଅଛନ୍ତି । ମାଥିଉ 28:19 ଓ 2କରିନ୍ଥୀୟ 13:14 ତ୍ରିତ୍ବ ଈଶ୍ବରଙ୍କଠାରେ ଥିବା ତିନିଜଣ ଭିନ୍ନ ଭିନ୍ନ ବ୍ୟକ୍ତିଙ୍କର ଉଦାହରଣ ଅଟେ ।

3) ଶାସ୍ତ୍ରର ବିଭିନ୍ନ ଅଂଶରେ ତ୍ରିତ୍ବ ଈଶ୍ବରଙ୍କଠାରେ ଥିବା ବ୍ୟକ୍ତିମାନେ ପରସ୍ପରଠାରୁ ଅଲଗା ଜଣାଯାଆନ୍ତି । ପୁରାତନ ନିୟମରେ “LORD” ଠାରୁ “Lord”ଙ୍କୁ ଭିନ୍ନ ବ୍ୟକ୍ତି ଭାବରେ ଦେଖାଇଦିଆଯାଇଛି (ଆଦି 19:24; ହୋଶେୟ 1:4 – ଓଡିଆରେ ଦୁଇଟି ସ୍ଥାନରେ “ସଦାପ୍ରଭୁ” ହିଁ ଲେଖାଯାଇଛି) । LORDଙ୍କର ଏକ ପୁତ୍ର ଅଛନ୍ତି (ଗୀତ 2:7, 12; ହିତୋ 30:2-4) । ଆତ୍ମା ବା ପବିତ୍ରଆତ୍ମା (The Spirit) LORD (ଗଣନା 27:18) ଓ God (ଗୀତ 51:10-12)ଙ୍କଠାରୁ ଭିନ୍ନ ବ୍ୟକ୍ତି ଭାବରେ ଦେଖାଇଦିଆଯାଇଛନ୍ତି । ପୁତ୍ର ଈଶ୍ବରଙ୍କ(God the Son)ଠାରୁ ପିତା ଈଶ୍ବର (God the Father) (ଗୀତ 45:6-7; ଏବ୍ରୀ 1:8-9)ଙ୍କଠାରୁ ଭିନ୍ନ ବ୍ୟକ୍ତି ଭାବରେ ଦେଖାଇଦିଆଯାଇଛି । ନୂତନ ନିୟମରେ, ଯୀଶୁ ସାହାଯ୍ୟକାରୀ ପବିତ୍ରଆତ୍ମା(Helper, the Holy Spirit)ଙ୍କୁ ପଠାଇବା ନିମନ୍ତେ ପିତାଙ୍କୁ କହୁଅଛନ୍ତି (ଯୋହନ 14:16-17)। ଏହା ଦେଖାଏ ଯେ ଯୀଶୁ ନିଜକୁ ପିତା କିମ୍ବା ପବିତ୍ରଆତ୍ମା ବୋଲି ଗ୍ରହଣ କରିନଥିଲେ । ସୁସମାଚାର ପୁସ୍ତକଗୁଡିକରେ ଥିବା ଅନ୍ୟ ଲେଖାଗୁଡିକ ମଧ୍ୟ ଦେଖନ୍ତୁ ଯେଉଁଠାରେ ଯୀଶୁ ପିତାଙ୍କୁ କହୁଅଛନ୍ତି । ସେ କ’ଣ ନିଜକୁ ନିଜେ କହୁଥିଲେ? ନା । ସେ ତ୍ରିତ୍ବ ଈଶ୍ବରଙ୍କଠାରେ ଥିବା ଅନ୍ୟ ଜଣେ ବ୍ୟକ୍ତି ଅର୍ଥାତ୍‍ ପିତାଙ୍କୁ କହୁଥିଲେ ।

4) ତ୍ରିତ୍ବ ଈଶ୍ବରଙ୍କଠାରେ ପ୍ରତ୍ୟେକ ବ୍ୟକ୍ତି ଈଶ୍ବର ଅଟନ୍ତି । ପିତା ଈଶ୍ବର ଅଟନ୍ତି (ଯୋହନ 6:27; ରୋମୀୟ 1:7; 1ପିତର 1:2) । ପୁତ୍ର ଈଶ୍ବର ଅଟନ୍ତି (ଯୋହନ 1:1, 14; ରୋମୀୟ 9:5; କଲସୀୟ 2:9; ଏବ୍ରୀ 1:8; 1ଯୋହନ 5:20) । ପବିତ୍ରଆତ୍ମା ଈଶ୍ବର ଅଟନ୍ତି (ପ୍ରେରିତ 5:3-4; 1କରିନ୍ଥୀୟ 3:16) ।

5) ତ୍ରିତ୍ବ ଈଶ୍ବରଙ୍କଠାରେ ଅଧୀନସ୍ଥ ବା ବଶ୍ୟତା ସ୍ବୀକାର କରୁଥିବା ବ୍ୟକ୍ତି ଅଛନ୍ତି । ଶାସ୍ତ୍ର ଦେଖାଏ ଯେ ପବିତ୍ରଆତ୍ମା ପିତା ଓ ପୁତ୍ରଙ୍କର ବଶ୍ୟତା ସ୍ବୀକାର କରନ୍ତି, ଏବଂ ପୁତ୍ର ପିତାଙ୍କର ବଶ୍ୟତା ସ୍ବୀକାର କରନ୍ତି । ଏହା ଏମାନଙ୍କର ଅନ୍ତର୍ନିହିତ ସମ୍ପର୍କ ଓ ତ୍ରିତ୍ବ ଈଶ୍ବରଙ୍କଠାରେ କୌଣସି ବ୍ୟକ୍ତିଙ୍କର ଈଶ୍ବରତ୍ବକୁ କ୍ଷୂର୍ଣ୍ଣ କରେନାହିଁ । ଏହା ଏପରି ଏକ ବିଷୟ ଯାହା ଆମ୍ଭମାନଙ୍କର ସସୀମ ମନ ଅସୀମ ଈଶ୍ବରଙ୍କ ବିଷୟରେ ବୁଝିପାରେ ନାହିଁ । ପୁତ୍ରଙ୍କ ବିଷୟରେ ଲୂକ 22:42; ଯୋହନ 5:36; ଯୋହନ 20:21 ଓ 1ଯୋହନ 4:14 ଦେଖନ୍ତୁ । ପବିତ୍ରଆତ୍ମାଙ୍କ ବିଷୟରେ ଯୋହନ 14:16, 26; 15:26; 16:7 ଓ ବିଶେଷତଃ ଯୋହନ 16:13-14 ଦେଖନ୍ତୁ ।

6) ତ୍ରିତ୍ବ ଈଶ୍ବରଙ୍କଠାରେ ଥିବା ବ୍ୟକ୍ତିମାନଙ୍କର ଭିନ୍ନ ଭିନ୍ନ କାର୍ଯ୍ୟ ରହିଛି । ପିତା ବିଶ୍ବ ବ୍ରହ୍ମାଣ୍ଡର (1କରିନ୍ଥୀୟ8:6; ପ୍ରକାଶିତ 4:11); ସ୍ବର୍ଗୀୟ ପ୍ରକାଶନ (ପ୍ରକାଶିତ 1:1); ପରିତ୍ରାଣ (ଯୋହନ 3:16-17); ଏବଂ ଯୀଶୁଙ୍କ ମାନବୀୟ କାର୍ଯ୍ୟଗୁଡିକର (ଯୋହନ 5:17; 14:10) ସର୍ବଶେଷ ଉତ୍ସ ଅଟନ୍ତି ।

ପୁତ୍ର ହେଉଛନ୍ତି କାରକ ଯାହାଙ୍କ ଦ୍ବାରା ପିତା ନିମ୍ନ କାର୍ଯ୍ୟଗୁଡିକ କରନ୍ତି: ବିଶ୍ବବ୍ରହ୍ମାଣ୍ଡର ସୃଷ୍ଟି ଓ ଏହାର ଲାଳନପାଳନ (1କରିନ୍ଥୀୟ 8:6; ଯୋହନ 1:3; କଲସୀୟ 1:16-17); ସ୍ବର୍ଗୀୟ ପ୍ରକାଶନ (ଯୋହନ1:1; 16:12-15; ମାଥିଉ 11:27; ପ୍ରକାଶିତ 1:1) ଏବଂ ପରିତ୍ରାଣ (2କରିନ୍ଥୀୟ 5:19; ମାଥିଉ 1:21; ଯୋହନ 4:42) । ପିତା ପୁତ୍ରଙ୍କ ଦ୍ବାରା ସମସ୍ତ ବିଷୟ କରନ୍ତି ଯିଏ ତାହାଙ୍କ କାରକ ଭାବରେ କାର୍ଯ୍ୟ କରନ୍ତି ।

ପବିତ୍ରଆତ୍ମା ହେଉଛନ୍ତି ଏକ ମାଧ୍ୟମ ଯାହାଙ୍କ ଦ୍ବାରା ପିତା ନିମ୍ନ କାର୍ଯ୍ୟଗୁଡିକ କରନ୍ତି: ବିଶ୍ବବ୍ରହ୍ମାଣ୍ଡର ସୃଷ୍ଟି ଓ ଏହାର ଲାଳନପାଳନ (ଆଦି 1:2; ଆୟୁବ 26:13; ଗୀତ 104:30); ସ୍ବର୍ଗୀୟ ପ୍ରକାଶନ (ଯୋହନ 16:12-15; ଏଫିସୀୟ 3:5; 2ପିତର 1:21); ପରିତ୍ରାଣ (ଯୋହନ 3:6; ତିତସ 3:5; 1ପିତର 1:2); ଏବଂ ଯୀଶୁଙ୍କ କାର୍ଯ୍ୟଗୁଡିକ (ଯିଶାଇୟ 61:1; ପ୍ରେରିତ 10:38) । ଏହିପରି ଭାବରେ ପିତା ପବିତ୍ରଆତ୍ମାଙ୍କ ଶକ୍ତିରେ ଏହି ସମସ୍ତ କାର୍ଯ୍ୟ କରନ୍ତି ।

ତ୍ରିତ୍ବ ଈଶ୍ବରଙ୍କ ବ୍ୟାଖ୍ୟାକୁ ଅଧିକ ବିକଶିତ ବା ସରଳ କରିବା ନିମନ୍ତେ ଅନେକ ପ୍ରଚେଷ୍ଟା କରାଯାଉଛି । ଅଥଚ, କୌଣସି ଜଣାଶୁଣା ବ୍ୟାଖ୍ୟା ସମ୍ପୂର୍ଣ୍ଣ ଭାବେ ସଠିକ୍‍ ନୁହେଁ । ଅଣ୍ଡା (କିମ୍ବା ଏପଲ୍‍)ର ଉଦାହରଣ ନେଲେ ତାହା ନିମ୍ନ ପ୍ରକାରେ ବୁଝାଇବାରେ ବିଫଳ ହୁଅନ୍ତି ଯେହେତୁ ଅଣ୍ଡାର ଖୋଳ, ଅଣ୍ଡାର ଧଳା ଅଂଶ ଓ ଅଣ୍ଡାର କେଶର ଅଣ୍ଡାର କିଛି ଅଂଶ କିନ୍ତୁ ସେଗୁଡିକ ସମ୍ପୂର୍ଣ୍ଣ ଅଣ୍ଡା ନୁହଁନ୍ତି ଠିକ୍‍ ଯେପରିକି ଏପଲର ଚୋପା, ଭିତର ଅଂଶ ଓ ଏଥିରେ ଥିବା ମଞ୍ଜି ଏପଲର କିଛି ଅଂଶ ଅଟନ୍ତି କିନ୍ତୁ ସେଗୁଡିକ ନିଜେ ସମ୍ପୂର୍ଣ୍ଣ ଏପଲ୍‍ ନୁହଁନ୍ତି । ପିତା, ପୁତ୍ର ଓ ପବିତ୍ରଆତ୍ମା ଈଶ୍ବରଙ୍କର ଏକ ଅଂଶ ନୁହଁନ୍ତି; ସେମାନେ ପ୍ରତିଜଣ ସମ୍ପୂର୍ଣ୍ଣ ଭାବେ ଈଶ୍ବର ଅଟନ୍ତି । ଜଳର ବ୍ୟାଖ୍ୟା କିଛି ମାତ୍ରାରେ ଉତ୍ତମ କିନ୍ତୁ ଏହା ମଧ୍ୟ ତ୍ରିତ୍ବ ଈଶ୍ବରଙ୍କ ବିଷୟରେ ସମ୍ପୂର୍ଣ୍ଣ ଭାବେ ବୁଝାଇବାରେ ବିଫଳ ଅଟେ । ଜଳ, ବାଷ୍ପ ଓ ବରଫ ଜଳର ବିଭିନ୍ନ ଆକାର ଅଟନ୍ତି । ପିତା, ପୁତ୍ର ଓ ପବିତ୍ରଆତ୍ମା ଈଶ୍ବରଙ୍କର କିଛି କିଛି ଆକାର ନୁହଁନ୍ତି, ସେସବୁ ପ୍ରତ୍ୟେକେ ନିଜେ ନିଜେ ଈଶ୍ବର ଅଟନ୍ତି । ତେଣୁ, ଏହି ସମସ୍ତ ଉଦାହରଣ ବା ବ୍ୟାଖ୍ୟା ତ୍ରିତ୍ବ ଈଶ୍ବରଙ୍କ ବିଷୟର କିଛି ଛବି ଦେଖାଇବ, କିନ୍ତୁ ସେହି ଛବି ସମ୍ପୂର୍ଣ୍ଣ ଭାବେ ସଠିକ୍‍ ନୁହେଁ । ଅସୀମ ଈଶ୍ବରଙ୍କୁ ସସୀମ ବ୍ୟାଖ୍ୟା ଦ୍ବାରା ବର୍ଣ୍ଣନା କରାଯାଇପାରିବ ନାହିଁ ।

ତ୍ରିତ୍ବ ଈଶ୍ବରଙ୍କ ବିଷୟକ ଈଶ୍ବର ତତ୍ତ୍ବ ସମଗ୍ର ଖ୍ରୀଷ୍ଟିୟାନ ମଣ୍ଡଳୀ ଇତିହାସରେ ଏକ ଦ୍ବନ୍ଦାତ୍ମକ ବିଷୟ । ତ୍ରିତ୍ବ ଈଶ୍ବରଙ୍କ ମୁଖ୍ୟ ଦିଗ ଈଶ୍ବରଙ୍କ ବାକ୍ୟରେ ଦିଆଯାଇଥିବା ସ୍ଥଳେ କିଛି ବିଷୟ ସ୍ବଷ୍ଟ ଭାବେ ଦର୍ଶାଇଦିଯାଇନାହିଁ । ପିତା ଈଶ୍ବର ଅଟନ୍ତି, ପୁତ୍ର ଈଶ୍ବର ଅଟନ୍ତି ଓ ପବିତ୍ରଆତ୍ମା ଈଶ୍ବର ଅଟନ୍ତି – ତଥାପି ଜଣେ ମାତ୍ର ଇଶ୍ବର ଅଛନ୍ତି । ତାହା ହେଉଛି ବାଇବଲ ସମ୍ମତ ତ୍ରିତ୍ବ ଈଶ୍ବର । ଏହା ଅପେକ୍ଷା ଆଉ ଯେଉଁ ସମସ୍ତ ବିଷୟ ରହିଛି ତାହା ସବୁ ଦ୍ବନ୍ଦତ୍ମକ ଏବଂ ଅନାବଶ୍ୟକ । ଆମ୍ଭମାନଙ୍କ ସସୀମ ମନରେ ତ୍ରିତ୍ବ ଈଶ୍ବରଙ୍କ ବିଷୟରେ ବୁଝିବାର ଚେଷ୍ଟା କରିବା ଅପେକ୍ଷା ଆମେ ଈଶ୍ବରଙ୍କ ମହାନତା ଓ ତାହାଙ୍କ ଅସୀମ ଭାବେ ଉଚ୍ଚୀକୃତ ପ୍ରକୃତି ଉପରେ ଧ୍ୟାନ କେନ୍ଦ୍ରୀଭୂତ କରି ସେବା କରିବା ଉଚିତ । “ଆହା! ଈଶ୍ବରଙ୍କ ବୁଦ୍ଧି ଓ ଜ୍ଞାନରୂପ ନିଧି କେଡେ ଗଭୀର! ତାହାଙ୍କର ବିଚାରସବୁ କିପରି ବୋଧର ଅଗମ୍ୟ ଓ ତାହାଙ୍କ ପଥସବୁ କିପରି ଅନନୁସନ୍ଧେୟ! କାରଣ, ପ୍ରଭୁଙ୍କର ମନ କିଏ ଜାଣିଅଛି? କିମ୍ବା ତାହାଙ୍କର ମନ୍ତ୍ରୀ କିଏ ହୋଇଅଛି?” (ରୋମୀୟ 11:33-34)



ଓଡ଼ିଆ ପେଜ୍ କୁ ଫେରି ଯାଅନ୍ତୁ



ତ୍ରିତ୍ବ ଈଶ୍ବରଙ୍କ ବିଷୟରେ ବାଇବଲ କ’ଣ ଶିକ୍ଷା ଦିଏ?