ଅନନ୍ତକାଳୀନ ସୁରକ୍ଷା କ'ଣ ପାପ କରିବା ନିମନ୍ତେ ଏକ "ଅନୁମତିପତ୍ର" ଅଟେ?



ପ୍ରଶ୍ନ: ଅନନ୍ତକାଳୀନ ସୁରକ୍ଷା କ'ଣ ପାପ କରିବା ନିମନ୍ତେ ଏକ "ଅନୁମତିପତ୍ର" ଅଟେ?

ଉତ୍ତର:
ଅନନ୍ତକାଳୀନ ସୁରକ୍ଷା ତତ୍ତ୍ବର ସବୁଠାରୁ ଅଧିକ ଥର ଆସୁଥିବା ଆପତ୍ତି ହେଉଛି ଯେ ଏହା ଲୋକମାନଙ୍କୁ ସେମାନେ ଯେପରି ଇଛା କରନ୍ତି ସେହି ଅନୁଯାୟୀ ଜୀବନଯାପନ କରି ମଧ୍ୟ ଉଦ୍ଧାରପ୍ରାପ୍ତ ହୋଇପାରିବେ ବୋଲି ମନରେ ଧାରଣା ଜନ୍ମାଏ | ଯଦିଓ ଏହା "ପ୍ରବିଧିକ ଦୃଷ୍ଟିକୋଣରୁ" ସତ୍ୟ ହୋଇପାରେ, ବାସ୍ତବରେ ଏହା ସତ୍ୟ ନୁହେଁ | ଯେଉଁ ବ୍ୟକ୍ତି ସତ୍ୟ ଭାବରେ ଯୀଶୁଖ୍ରୀଷ୍ଟଙ୍କ ଦ୍ବାରା ମୁକ୍ତିପ୍ରାପ୍ତ ହୋଇଛି ସେ ଅବିରତ ଏବଂ ସ୍ବେଚ୍ଛାକୃତ ପାପଗୁଣ ବିଶିଷ୍ଟ ଏକ ଜୀବନ କାଟିବ ନାହିଁ | ଜଣେ ଖ୍ରୀଷ୍ଟିୟାନ କିପରି ଜୀବନଯାପନ କରିବା ଉଚିତ୍ ଏବଂ ଜଣେ ବ୍ୟକ୍ତି ପରିତ୍ରାଣ ପାଇବା ନିମନ୍ତେ କ'ଣ କରିବାକୁ ପଡିବ ତାହା ମଧ୍ୟରେ ଏକ ଭିନ୍ନତାକୁ ଦେଖିବାକୁ ପଡିବ |

ବାଇବଲ ସ୍ବଷ୍ଟ କରେ ଯେ, ପରିତ୍ରାଣ କେବଳ ଯୀଶୁଖ୍ରୀଷ୍ଟଙ୍କଠାରେ ଅନୁଗ୍ରହ ଦ୍ବାରା ବିଶ୍ବାସରେ ମିଳିଥାଏ (ଯୋହନ ୩:୧୬; ଏଫିସୀୟ ୨:୮-୯; ଯୋହନ ୧୪:୬) | ଜଣେ ବ୍ୟକ୍ତି ଯୀଶୁଖ୍ରୀଷ୍ଟଙ୍କଠାରେ ବାସ୍ତବରେ ବିଶ୍ବାସ କରିବା କ୍ଷଣି ଉଦ୍ଧାରପ୍ରାପ୍ତ ହୋଇଥାଏ ଏବଂ ସେହି ପରିତ୍ରାଣରେ ସୁରକ୍ଷିତ ହୋଇଥାଏ | ପରିତ୍ରାଣ ବିଶ୍ବାସ ଦ୍ବାରା ପ୍ରାପ୍ତ କରାଯାଇ ପରେ କାର୍ଯ୍ୟ ଦ୍ବାରା ବଜାୟ ରଖାଯାଏ ନାହିଁ | ଗାଲାତୀୟ ୩:୩ରେ ପାଉଲ ଏହି ବିଷୟ ଉପରେ କୁହି ପଚାରନ୍ତି, "ତୁମ୍ଭେମାନେ କ'ଣ ଏପରି ନିର୍ବୋଧ? ଆତ୍ମାରେ ଆରମ୍ଭ କରି ତୁମ୍ଭେମାନେ କି ଏବେ ଶରୀରରେ ସିଦ୍ଧ ହେବାକୁ ଯାଉଅଛ?" ଯଦି ଆମ୍ଭେମାନେ ବିଶ୍ବାସ ଦ୍ବାରା ଉଦ୍ଧାରପ୍ରାପ୍ତ ହୋଇଛୁ, ତେବେ ଆମ୍ଭମାନଙ୍କର ପରିତ୍ରାଣ ମଧ୍ୟ ବିଶ୍ବାସ ଦ୍ବାରା ବଜାୟ ରଖାଯାଇଥାଏ ଏବଂ ବିଶ୍ବାସ ଦ୍ବାରା ସୁରକ୍ଷିତ ହୋଇଥାଏ | ଆମ୍ଭେମାନେ ଆମ୍ଭମାନଙ୍କର ନିଜର ପରିତ୍ରାଣକୁ ଅର୍ଜନ କରିପାରିବା ନାହିଁ | ଅତଏବ, ସେହିପରି ଭାବେ ମଧ୍ୟ ଆମ୍ଭେମାନେ ଆମ୍ଭମାନଙ୍କ ପରିତ୍ରାଣକୁ ବଜାୟ ରଖିବାର ଅର୍ଜନ କରିପାରିବା ନାହିଁ | କେବଳ ଈଶ୍ବର ହିଁ ଆମ୍ଭମାନଙ୍କର ପରିତ୍ରାଣକୁ ବଜାୟ ରଖନ୍ତି (ଯିହୂଦା ୨୪) | କେବଳ ପ୍ରଭୁଙ୍କ ହସ୍ତ ଆମ୍ଭମାନଙ୍କୁ ତାହାଙ୍କ ହାତ ମୁଠାରେ ଦୃଢଭାବେ ଧରିରଖେ (ଯୋହନ ୧୦:୨୮-୨୯) | କେବଳ ଈଶ୍ବରଙ୍କ ପ୍ରେମ ଯେଉଁଠାରୁ ଆମ୍ଭମାନଙ୍କୁ କେହି ବିଛିନ୍ନ କରିପାରିବ ନାହିଁ (ରୋମୀୟ ୮:୩୮-୩୯) |

ଏହାର ସାରଗର୍ଭକ ଭାବେ ଅନନ୍ତକାଳୀନ ସୁରକ୍ଷା ନିମନ୍ତେ କୌଣସି ଅସ୍ବୀକୃତି ହେଉଛି ଏକ ବିଶ୍ବାସ ଯାହା ଆମ ନିଜର ଉତ୍ତମ କାର୍ଯ୍ୟ ଏବଂ ପ୍ରଚେଷ୍ଟା ଦ୍ବାରା ଆମେ ଆମ ନିଜର ପରିତ୍ରାଣକୁ ବଜାୟ ରଖିବା ନିହାତି ଆବଶ୍ୟକ | ଏହା ସମ୍ପୂର୍ଣ୍ଣ ରୂପେ ଅନୁଗ୍ରହ ଦ୍ବାରା ପରିତ୍ରାଣର ପରସ୍ପର ବିରୋଧ | ଆମେ ଖ୍ରୀଷ୍ଟଙ୍କ ସଦଗୁଣ ଯୋଗୁଁ ଉଦ୍ଧାରପ୍ରାପ୍ତ ହେଇଛୁ, ତାହା ଆମ୍ଭମାନଙ୍କର ନୁହେଁ (ରୋମୀୟ ୪:୩-୮) | ଆମେ ପରିତ୍ରାଣ ବଜାୟ ରଖିବା ନିମନ୍ତେ ନିହାତି ଭାବେ ଈଶ୍ବରଙ୍କ ବାକ୍ୟର ବାଧ୍ୟ ହେବାକୁ ହେବ ଏବଂ ଏକ ଈଶ୍ବରୀୟ ଜୀବନଯାପନ କରିବାକୁ ପଡିବ ତାହା ଦାବୀ କରିବା ହେଉଛି ଆମ୍ଭମାନଙ୍କର ପାପର ପରିଶୋଧ ନିମନ୍ତେ ଯୀଶୁଙ୍କ ମୃତ୍ୟୁ ଯଥେଷ୍ଟ ନ ଥିଲା ବା ନାହିଁ ବୋଲି କହିବା | ଆମ୍ଭମାନଙ୍କର ପୂର୍ବକୃତ ପାପ, ବର୍ତ୍ତମାନ ପାପ ଏବଂ ଭବିଷ୍ୟତ ପାପ, ପରିତ୍ରାଣ ପୂର୍ବର ପାପ ଏବଂ ପରିତ୍ରାଣ ପରର ସମସ୍ତ ପାପର ପାଉଣା ପରିଶୋଧ କରିବା ନିମନ୍ତେ ଯୀଶୁଙ୍କ ମୃତ୍ୟୁ ସମ୍ପୂର୍ଣ୍ଣରୂପେ ଯଥେଷ୍ଟ ଅଟେ (ରୋମୀୟ ୫:୮; ୧କରିନ୍ଥୀୟ ୧୫:୩; ୨କରିନ୍ଥୀୟ ୫:୨୧) |

ଏହା କ'ଣ ଏପରି ବୁଝାଏ ଯେ ଜଣେ ଖ୍ରୀଷ୍ଟିୟାନ ଯେପରି ଚାହିଁବ ସେ ସେପରି ଜୀବନଧାରଣ କରିପାରିବ ଏବଂ ତଥାପି ଉଦ୍ଧାରପ୍ରାପ୍ତ ହେବ? ଏହା ନିଶ୍ଚିତଭାବରେ ଏକ ପରିକଳ୍ପନା ଉପରେ ଆଧାରିତ ପ୍ରଶ୍ନ, କାରଣ ବାଇବଲ୍ ସ୍ବଷ୍ଟ କରେ ଯେ, ଜଣେ ଖ୍ରୀଷ୍ଟିୟାନ୍ "ସେ ଯେପରି ଚାହେଁ" ସେପରି ଜୀବନଧାରଣ କରିବନାହିଁ | ଖ୍ରୀଷ୍ଟିୟାନମାନେ ନୂତନ ସୃଷ୍ଟି ଅଟନ୍ତି (୨କରିନ୍ଥୀୟ ୫:୧୭) | ଖ୍ରୀଷ୍ଟିୟାନମାନେ ଆତ୍ମାଙ୍କ ଫଳ ପ୍ରକାଶ କରନ୍ତି (ଗାଲାତୀୟ ୫:୨୨-୨୩), ସେମାନେ ଶାରିରୀକ କାର୍ଯ୍ୟ ପ୍ରକାଶନ କରନ୍ତି ନାହିଁ (ଗାଲାତୀୟ ୫:୧୯-୨୧) | ପ୍ରଥମ ଯୋହନ ୩:୬-୯ ସ୍ବଷ୍ଟ ଭାବେ ଦର୍ଶାଏ ଯେ, ଜଣେ ବାସ୍ତବ ଖ୍ରୀଷ୍ଟିୟାନ ଅବିରତ ପାପରେ ଜୀବନ କାଟିବ ନାହିଁ | ଅନୁଗ୍ରହ ପାପକୁ ପ୍ରୋତ୍ସାହିତ କରିବା ଆରୋପର ଉତ୍ତରରେ ପ୍ରେରିତ ପାଉଲ ତାଙ୍କ ମତ ରଖନ୍ତି, "ତେବେ ଆମ୍ଭେମାନେ କ'ଣ କହିବା? ଅନୁଗ୍ରହ ଯେପରି ପ୍ରଚୁର ହୁଏ, ଏଥିପାଇଁ କି ପାପରେ ରହିଥିବା? ତାହା କେବେ ହେଁ ନ ହେଉ | ପାପ ପ୍ରତି ମୃତ ଯେ ଆମ୍ଭେମାନେ ସେଥିରେ କିପରି ଆଉ ଜୀବନ କାଟିବା? " (ରୋମୀୟ ୬:୧-୨) |

ଅନନ୍ତକାଳୀନ ସୁରକ୍ଷା ପାପ କରିବା ନିମନ୍ତେ ଏକ ଅନୁମତିପତ୍ର ନୁହେଁ | ବରଂ ଯେଉଁମାନେ ଖ୍ରୀଷ୍ଟଙ୍କଠାରେ ଭରସା ରଖନ୍ତି ସେମାନଙ୍କ ନିମନ୍ତେ ଈଶ୍ବରଙ୍କ ପ୍ରେମ ନିର୍ଭରୋକ୍ତି ବୋଲି ଜାଣିବାର ସୁରକ୍ଷା | ଈଶ୍ବରଙ୍କ ପରିତ୍ରାଣର ମହାନ ଦାନକୁ ଜାଣିବା ଏବଂ ବୁଝିବା ହେଉଛି ପାପ କରିବାକୁ ଅନୁମତି ଦେବାର ବିପରୀତ ଅଟେ | ଯୀଶୁଖ୍ରୀଷ୍ଟ ପାପର ପାଉଣା ପରିଶୋଧ କରିଅଛନ୍ତି ବୋଲି ଜାଣି କୌଣସି ବ୍ୟକ୍ତି କିପରି ପାପର ଜୀବନ କାଟିବାକୁ ଯିବ (ରୋମୀୟ ୬:୧୫-୨୩)? ଯେଉଁମାନେ ବିଶ୍ବାସ କରନ୍ତି ସେମାନଙ୍କ ପ୍ରତି ଈଶ୍ବରଙ୍କ ସର୍ତ୍ତବିହୀନ ଏବଂ ନିର୍ଭରୋକ୍ତି ପ୍ରେମକୁ ବୁଝି କୌଣସି ବ୍ୟକ୍ତି କିପରି ଭାବେ ସେହି ପ୍ରେମକୁ ନେଇ ଈଶ୍ବରଙ୍କ ମୁଖରେ ଫୋପାଡି ଦେବ? ଏପରି ବ୍ୟକ୍ତି ଅନନ୍ତକାଳୀନ ସୁରକ୍ଷା ଯେ ପାପ କରିବା ନିମନ୍ତେ ଅନୁମତି ଦେଇଛି ତାହା ପ୍ରଦର୍ଶନ କରନ୍ତି ନାହିଁ, ବରଂ ଯୀଶୁଖ୍ରୀଷ୍ଟଙ୍କ ଦ୍ବାରା ବାସ୍ତବରେ ଯେ ସେମାନଙ୍କର ପରିତ୍ରାଣର ଅନୁଭୂତି ନାହିଁ ତାହା ପ୍ରଦର୍ଶନ କରନ୍ତି | "ଯେକେହି ତାହାଙ୍କଠାରେ ରହେ, ସେ ପାପ କରେନାହିଁ; ଯେକେହି ପାପ କରେ, ସେ ତାହାଙ୍କୁ ଦେଖିନାହିଁ, କିଅବା ତାହାଙ୍କୁ ଜାଣିନାହିଁ" (୧ଯୋହନ ୩:୬) |



ଓଡିଆ ହୋମ୍ ପେଜକୁ ପ୍ରତ୍ୟାବର୍ତ୍ତନ କରନ୍ତୁ



ଅନନ୍ତକାଳୀନ ସୁରକ୍ଷା କ'ଣ ପାପ କରିବା ନିମନ୍ତେ ଏକ "ଅନୁମତିପତ୍ର" ଅଟେ?