ପ୍ରତିବଦଳାତ୍ମକ ପ୍ରାୟଶ୍ଚିତ କ'ଣ?



ପ୍ରଶ୍ନ: ପ୍ରତିବଦଳାତ୍ମକ ପ୍ରାୟଶ୍ଚିତ କ'ଣ?

ଉତ୍ତର:
ପ୍ରତିବଦଳାତ୍ମକ ପ୍ରାୟଶ୍ଚିତ ପାପୀମାନଙ୍କ ନିମନ୍ତେ ଏକ ପ୍ରତିବଦଳ ଭାବେ ଖ୍ରୀଷ୍ଟ ମୃତ୍ୟୁଭୋଗ କରିବାର ସୂଚାଏ | ଶାସ୍ତ୍ର କୁହେ ଯେ, ସମସ୍ତ ପାପୀ ଅଟନ୍ତି (ରୋମୀୟ ୩:୯-୧୮, ୨୩) | ଆମ୍ଭମାନଙ୍କର ପାପମୟତାର ଦଣ୍ଡ ହେଉଛି ମୃତ୍ୟୁ | ରୋମୀୟ ୬:୨୩ରେ ଲେଖାଯାଏ, "କାରଣ ପାପର ବେତନ ମୃତ୍ୟୁ କିନ୍ତୁ ଈଶ୍ବରଙ୍କ ଅନୁଗ୍ରହଦାନ ଆମ୍ଭମାନଙ୍କ ପ୍ରଭୁ ଯୀଶୁଖ୍ରୀଷ୍ଟଙ୍କ ସହଭାଗୀତାରେ ଅନନ୍ତ ଜୀବନ ଅଟେ |"

ସେହି ପଦ ଆମ୍ଭମାନଙ୍କୁ ଅନେକ ବିଷୟ ଶିକ୍ଷା ଦିଏ | ଖ୍ରୀଷ୍ଟଙ୍କ ବିହୂନେ ଆମ୍ଭେମାନେ ମୃତ୍ୟୁଭୋଗ କରିବାକୁ ଯାଉଅଛୁ ଏବଂ ଆମ୍ଭମାନଙ୍କ ପାପର ପାଉଣା ସ୍ବରୂପେ ନରକରେ ଅନନ୍ତକାଳ କ୍ଷେପଣ କରିବାକୁ ଯାଉଅଛୁ | ଶାସ୍ତ୍ରରେ ମୃତ୍ୟୁକୁ "ବିଚ୍ଛେଦ" ଭାବରେ ଦର୍ଶାଇଦିଆଯାଇଛି | ପ୍ରତ୍ୟେକ ବ୍ୟକ୍ତି ମୃତ୍ୟୁଭୋଗ କରିବେ, କିନ୍ତୁ କେତେକ ସ୍ବର୍ଗରେ ପ୍ରଭୁଙ୍କ ସହ ଚିରଦିନ ନିମନ୍ତେ ବାସ କରିବେ, ଯେତେବେଳେ କି ଅନ୍ୟମାନେ ନରକରେ ଚିରଦିନ ନିମନ୍ତେ ବାସ କରିବେ | ଏଠାରେ କୁହାଯାଉଥିବା ମୃତ୍ୟୁ ହେଉଛି ନରକରେ କାଟିବା ଜୀବନ | ଅଥଚ, ଏହି ପଦ ଶିକ୍ଷା ଦେଉଥିବା ଦ୍ବିତୀୟ ବିଷୟ ହେଉଛି ଯୀଶୁଖ୍ରୀଷ୍ଟଙ୍କ ଦ୍ବାରା ଅନନ୍ତ ଜୀବନ ଉପଲବ୍ଧ ଅଟେ | ଏହା ତାଙ୍କର ପ୍ରତିବଦଳାତ୍ମକ ପ୍ରାୟଶ୍ଚିତ |

ଯୀଶୁଖ୍ରୀଷ୍ଟ ଯେତେବେଳେ କ୍ରୁଶ ଉପରେ ମୃତ୍ୟୁଭୋଗ କଲେ ସେତେବେଳେ ସେ ଆମ୍ଭମାନଙ୍କ ସ୍ଥାନରେ ମୃତ୍ୟୁଭୋଗ କଲେ | ଆମ୍ଭେମାନେ ସେହି କ୍ରୁଶରେ ରହି ମୃତ୍ୟୁଭୋଗ କରିବାର ଥିଲା କାରଣ ଆମ୍ଭେମାନେ ପାପପୂର୍ଣ୍ଣ ଜୀବନ କାଟୁଛୁ | କିନ୍ତୁ ଖ୍ରୀଷ୍ଟ ଆମ୍ଭମାନଙ୍କର ସ୍ଥାନରେ ନିଜେ ସେହି ଦଣ୍ଡକୁ ଗ୍ରହଣ କଲେ - ସେ ଆମ୍ଭମାନଙ୍କର ପ୍ରତିବଦଳ ହେଲେ ଏବଂ ଆମେ ଯାହା ନ୍ୟାୟଯୁକ୍ତ ଭାବେ ପାଇବାର ଯୋଗ୍ୟ ଥିଲୁ ସେ ସମସ୍ତକୁ ସେ ଗ୍ରହଣ କଲେ | "ଯାହାଙ୍କଠାରେ ପାପର ଲେଶମାତ୍ର ନ ଥିଲା, ତାହାଙ୍କୁ ସେ ଆମ୍ଭମାନଙ୍କ ନିମନ୍ତେ ପାପ ସ୍ବରୂପ କଲେ, ଯେପରି ଆମ୍ଭେମାନେ ତାହାଙ୍କ ଦ୍ବାରା ଧାର୍ମିକତା ସ୍ବରୂପ ହେଉ" (୨କରିନ୍ଥୀୟ ୫:୨୧) |

ଆମ୍ଭେମାନେ ଯେପରି ପାପ ପ୍ରତି ମୃତ ହୋଇ ଧାର୍ମିକତା ନିମନ୍ତେ ଜୀବନଯାପନ କରୁ, ଏଥିନିମନ୍ତେ ସେ ଆପେ କ୍ରୁଶ ଉପରେ ନିଜ ଶରୀରରେ ଆମ୍ଭମାନଙ୍କର ସମଗ୍ର ପାପ ବହନ କଲେ; ତାହାଙ୍କ ପ୍ରହାରରେ ତୁମ୍ଭେମାନେ ସୁସ୍ଥ ହୋଇଅଛ" (୧ପିତର ୨:୨୪) | ଏଠାରେ ପୁନଶ୍ଚ ଆମେ ଦେଖୁ ଯେ ଆମେ ତାଙ୍କଠାରେ ଯେଉଁ ପାପ କଲୁ ସେଥିର ପାଉଣା ପରିଶୋଧ କରିବା ନିମନ୍ତେ ଖ୍ରୀଷ୍ଟ ସେହି ପାପକୁ ତାଙ୍କ ଉପରକୁ ନେଲେ | ଅଳ୍ପ କିଛି ପଦ ପରେ ଆମେ ପାଠ କରୁ, "ଯେଣୁ ଆମ୍ଭମାନଙ୍କୁ ଈଶ୍ବରଙ୍କ ନିକଟକୁ ଆଣିବା ପାଇଁ ଖ୍ରୀଷ୍ଟ ମଧ୍ୟ ଧାର୍ମିକ ହୋଇ ଅଧର୍ମିକମାନଙ୍କ ନିମନ୍ତେ ପାପ ହେତୁ ଥରେ ମୃତ୍ୟୁଭୋଗ କଲେ | ସେ ଶରୀରରେ ମୃତ୍ୟୁଭୋଗ କଲେ ସତ, କିନ୍ତୁ ଆତ୍ମାରେ ଜୀବିତ ହେଲେ " (୧ପିତର ୩:୧୮) | ଖ୍ରୀଷ୍ଟ ଆମ୍ଭମାନଙ୍କ ନିମନ୍ତେ ଥିବା ପ୍ରାୟଶ୍ଚିତ ବିଷୟରେ ଯେ କେବଳ ଏହି ପଦଗୁଡିକ ଶିକ୍ଷା ଦିଅନ୍ତି, ତାହା ନୁହେଁ କିନ୍ତୁ ଏହି ସମସ୍ତ ପଦ ଶିକ୍ଷା ଦିଅନ୍ତି ଯେ, ସେ ପ୍ରାୟଶ୍ଚିତ ଥିଲେ, ଯାହାର ଅର୍ଥ ମନୁଷ୍ୟର ପାପପୂର୍ଣ୍ଣତା ନିମନ୍ତେ ଥିବା ପାଉଣା ପରିଶୋଧ କଲେ |

ପ୍ରତିବଦଳାତ୍ମକ ପ୍ରାୟଶ୍ଚିତ ବିଷୟରେ କହୁଥିବା ଆଉ ଏକ ପଦ ହେଉଛି ଯିଶାଇୟ ୫୩:୫ | ଏହି ପଦ ଆଗାମୀ ଖ୍ରୀଷ୍ଟଙ୍କ ବିଷୟରେ କୁହେ ଯିଏ କି ଆମ୍ଭମାନଙ୍କର ପାପ ନିମନ୍ତେ କ୍ରୁଶ ଉପରେ ମୃତ୍ୟୁଭୋଗ କରିବେ | ଭାବବାଣୀ ଅତି ସବିଶେଷ ଭାବେ ଦିଆଯାଇଛି ଏବଂ ଭାବବାଣୀ ଯେପରି ଭାବେ ହୋଇଥିଲା କ୍ରୁଶବିଦ୍ଧ ଠିକ୍ ସେପରି ଭାବେ ହୋଇଥିଲା | "ମାତ୍ର ସେ ଆମ୍ଭମାନଙ୍କ ଅଧର୍ମ ନିମନ୍ତେ କ୍ଷତବିକ୍ଷତ ହେଲେ ଓ ଆମ୍ଭମାନଙ୍କର ଅପରାଧ ନିମନ୍ତେ ଚୂର୍ଣ୍ଣ ହେଲେ; ଆମ୍ଭମାନଙ୍କର ଶାନ୍ତିଜନକ ଶାସ୍ତି ତାହାଙ୍କ ଉପରେ ବର୍ତ୍ତିଲା ଓ ତାହାଙ୍କ ପ୍ରହାରରେ ଆମ୍ଭେମାନେ ସୁସ୍ଥ ହେଲୁ |" ପ୍ରତିବଦଳକୁ ଲକ୍ଷ୍ୟ କରନ୍ତୁ | ଏଠାରେ ପୁନଶ୍ଚ ଆମ୍ଭେମାନେ ଦେଖୁ ଯେ, ଖ୍ରୀଷ୍ଟ ଆମ୍ଭମାନଙ୍କ ପାପର ପାଉଣା ପରିଶୋଧ କଲେ!

ଆମେ ନରକରେ ଅନନ୍ତକାଳ ନିଜକୁ ରଖି ଦଣ୍ଡପ୍ରାପ୍ତ ହେବା ଦ୍ବାରା ହିଁ ଆମ୍ଭମାନଙ୍କର ପାପ ନିମନ୍ତେ ଥିବା ପାଉଣା ପରିଶୋଧ କରିପାରିବା | କିନ୍ତୁ ଈଶ୍ବରଙ୍କ ପୁତ୍ର ଯୀଶୁଖ୍ରୀଷ୍ଟ ଆମ୍ଭମାନଙ୍କର ପାପର ପାଉଣା ପରିଶୋଧ କରିବା ନିମନ୍ତେ ପୃଥିବୀକୁ ଆସିଥିଲେ | ଯେହେତୁ ସେ ଆମ୍ଭମାନଙ୍କ ନିମନ୍ତେ ତାହା କରିଅଛନ୍ତି, ସେଥିନିମନ୍ତେ ଆମ୍ଭମାନଙ୍କର ପାପକ୍ଷମାର ସୁଯୋଗ ଯେ କେବଳ ପାଇଛୁ ତାହା ନୁହେଁ କିନ୍ତୁ ତାଙ୍କ ସହିତ ଅନନ୍ତକାଳ ବାସ କରିବାର ସୁଯୋଗ ମଧ୍ୟ ପାଇଛୁ | ଏହା କରିବା ନିମନ୍ତେ ଖ୍ରୀଷ୍ଟ କ୍ରୁଶରେ ଯାହା କରିଅଛନ୍ତି ସେଥିରେ ନିହାତି ଆମ୍ଭମାନଙ୍କର ଭରସା ରଖିବାକୁ ପଡିବ | ଯୀଶୁଖ୍ରୀଷ୍ଟଙ୍କ ମୃତ୍ୟୁ ପ୍ରତିବଦଳାତ୍ମକ ପ୍ରାୟଶ୍ଚିତ ଅଟେ |



ଓଡିଆ ହୋମ୍ ପେଜକୁ ପ୍ରତ୍ୟାବର୍ତ୍ତନ କରନ୍ତୁ



ପ୍ରତିବଦଳାତ୍ମକ ପ୍ରାୟଶ୍ଚିତ କ'ଣ?