کلام پاک پنڈے تے نقوش / پنڈے نوں چھدوان بارے کیہ کہندا اے؟




سوال: کلام پاک پنڈے تے نقوش / پنڈے نوں چھدوان بارے کیہ کہندا اے؟

جواب:
پرانے عہد نامے دے قانوں وچ اسرائیلیاں نوں حکم دتا گیا، "تسیں مُردیاں دے سببوں اپنے پنڈے نوں پھٹڑ نہ کرنا تے نہ اپنے اُتے کجھ گُدواؤنا۔ میں خداوند آں" (احبار 19 باب 28 آیت)۔ بھاویں، اج دے ایماندار پرانے عہد نامے دے قانوں دے تابع نہیں نیں (رومیوں 10 باب 4 آیت؛ گلتیوں 3 باب 23 توں 25 آیت؛ افسیوں 2 باب 15 آیت)، اصل وچ اوتھے پنڈے تے نقوش بنواؤن دے خلاف حکم سی جو ساڈے لئی سوال دی وجہ بن دا اے۔ نواں عہد نامہ کجھ نہیں کہندا کہ ایماندار نوں پنڈے تے نقوش بنواؤنے چاہیدے نیں یاں نہیں۔

پنڈے تے نقوش بنواؤن یاں چھدوان دے سانگے نال، اک ٹھیک طرحاں دی آزمائش نال اسیں پتہ کرسکدے آں کہ اسیں ایمانداری نال، چنگے ایمان نال، رب نوں کہیئے کہ اوہ تہانوں برکت دیوے تے تہاڈی حرکتاں نوں اپنے ٹیچے لئی ورتے۔ "بس تسیں کھاؤ یاں پیو یاں جو کجھ وی کرو سب رب دے جلال لئی کرو" (1۔کرنتھیوں 10 باب 31 آیت)۔ کلام پاک پنڈے نوں چھدواؤن تے نقوش بنواؤن بارے حکم نہیں دیندا، پر ایہہ سانوں کوئی ڈھکویں وجہ وی نہیں دیندا کہ اسیں پنڈے تے نقوش بنواؤن یاں پنڈے چھدواؤن نال رب تے ایمان رکھیئے۔

اک ہور مسئلہ جیہدے تے گوہ کرنا بن دا اے اوہ اے شرم و حیا۔ کلام پاک سانوں ہدایت کردا اے کہ اسیں حیادار لباس پائیے (1۔تیمتھس 2 باب 9 آیت)۔ حیا دار لباس پاؤن دی اک ای وجہ سب کجھ صاف کردیندی اے کہ کپڑیاں نال پورے طور تے پنڈے نوں ڈھکیا ہونا چاہیدا اے۔ بہرحال، حیادار لباس پاؤن دا ایہہ مطلب نہیں کہ تسیں اپنے آپ نوں دوجیاں دی توجہ حاصل کرن لئی چنگی طرحاں بناؤ سنوارو۔ اوہ لوک جیہڑے اپنے آپ نوں حیا دار لباس دے نال سنواردے نیں اوہ اپنے آپ تے توجہ نہیں کرواؤنا چاہوندے۔ پنڈے تے نقوش بنواؤنا تے پنڈے نوں چھدواؤنا ضروری طور تے اپنے ول توجہ دواؤن لئی ہوندا اے۔ اس طرحاں پنڈے تے نقوش بنواؤنا تے پنڈے چھدواؤنا حیا والا ڈھنگ نہیں۔

ایس مسئلے تے نوشتاں دے خاص اصول جیہناں وچ کلام پاک اچیچا نہیں دسدا کہ جے ایتھے شک دی کوئی گنجائش اے جیہدے توں رب نا خوش ہوندا اے ، تے فیر ایہہ بہتر اے کہ انج دیاں حرکاتاں ول نہ دھیان دتا جائے۔ "پر جیہڑا کوئی کسے شے وچ شبہ رکھدا اے جے اوہنوں کھائے تے اوہ مجرم ٹھہردا اے ایس لئی کہ اوہ یقین دے نال نہیں کھاندا تے جو کجھ وی یقین دے نال نہیں اوہ پاپ اے" (رومیوں 14 باب 23 آیت)۔ سانوں چیتے رکھن دی لوڑ اے کہ ساڈے پنڈے تے ہور ساڈیاں روحاں نوں خریدیا گیا اے اوہناں دا رب دے نال سانگا اے۔ بھاویں1۔کرنتھیوں 6 باب 19 تے 20 آیت سدھا ساہواں پنڈے تے نقوش بنواؤن یاں پنڈے نوں چھدواؤن نوں بیان نہیں کردی، پر سانوں اک اصول دیندی اے، "کیہ تسیں نہیں جان دے کہ تہاڈے پنڈے روح القدس دا مقدس نیں جیہڑا تہاڈے وچ اے تے تہانوں رب ولوں ملیا اے؟ تے تسیں اپنے نہیں۔ کیونجے مُل تار کے خریدے گئے او۔ بس اپنے پنڈیاں توں رب دا جلال ظاہر کرو"۔ ایہہ اک وڈا سچ اے سانوں اصلی ویہار دسدا اے کہ اسیں کیہ کرنا اے تے اسیں اپنے پنڈیاں دے نال کتھے جانا اے جے ساڈے پنڈے رب دے نال سانگا رکھدے نیں تے سانوں ایہہ یقینی طور تے جاننا چاہید اے کہ ساڈے کول اوہدی صاف "اجازت" اے ایہدے توں پہلاں کہ اسیں "اپنے پنڈے تے نشان بنوائیے" نقوش دے نال ایس پنڈے نو ں چھدواؤن نال۔



پنجابی دے مڈھلے صفحے تے جاؤ



کلام پاک پنڈے تے نقوش / پنڈے نوں چھدوان بارے کیہ کہندا اے؟