settings icon
share icon
Pregunta

Kiko Beibel ta bisa tokante divorsio i ora un hende bolbe kasa?

Kontesta


Promé ku tur kos, maske kua opinion un hende tin riba e asuntu di divorsio, ta importante pa kòrda riba Malakías 2:16: “Pasobra Mi ta odia divorsio,’ SEÑOR, Dios di Israel…, ta bisa”. Segun Beibel, matrimonio ta un kompromiso pa bida largu. “Asina nan lo no ta dos persona mas sino ún. Ke men hende no mag separá loke Dios a uni den matrimonio.” (Mateo 19:6). Dios ta realisá si, ku dor ku matrimonio ta impliká dos ser humano pekaminoso, lo bai tin divorsio. Den Tèstamènt Bieu, El a pone algun lei pa asina por protehá e derechonan di esnan ku a divorsiá, espesialmente e hende muhénan (Deuteronomio 24:1-4). Hesus a bisa ku e leinan aki a wòrdu duná pa motibu e kurason duru di e hendenan, i no paso nan tabata deseo di Dios (Mateo 19:8).

E kontroversia tokante si divorsio i matrimonio despues di divorsio ta akseptabel segun Beibel, ta drai na promé luga riba e palabranan di Hesus den Mateo 5:32 i 19:9. E frase “pa kualke otro motibu ku no ta infidelidat matrimonial” ta e úniko kos den Skritura ku ta duna permit di Dios pa divorsiá i kasa dinobo. Hopi interpretadornan ta komprondé e “klóusula di eksepshon” aki ku e ta referí na “infidelidat matrimonial” durante e periodo di “kompromiso”. Den kustumbernan hudio, un hòmber i un muhé tabata wòrdu konsiderá kasá asta mientras nan tabata komprometé ku otro. Segun e kreensha aki, inmoralidat durante e periodo di “kompromiso” aki lo tabata e úniko motibu balido pa un divorsio.

Pero, e tradukshon di e palabra griego “infidelidat matrimonial” ta un palabra ku por nifiká kualke forma di inmoralidat seksual. E por nifiká fornikashon, prostitushon, adulterio, etc. Hesus posiblemente tabata bisa ku divorsio ta akseptabel si inmoralidat seksual wòrdu kometí. Relashonnan seksual ta un parti integral di e laso matrimonial: “nan dos lo bira ún” (Génesis 2:24; Mateo 19:5; Efesionan 5:31). P’esei, kualke kiebro di e lase aki pa motibu di relashonnan seksual pafó di e matrimonio por ta un motibu permitíbel pa divorsio. Si ta asina, Hesus ke men kasamentu despues di divorsio tambe den e pasashi aki. E frase “i kasa ku un otro” (Mateo 19:9) ta indiká ku divorsio i kasamentu ku un otro hende ta akseptabel den kaso di e klóusula di eksepshon, kon ku e wòrdu interpretá. Ta importante pa tuma nota ku únikamente e personahe inosente tin mag di kasa atrobe. Maske no tin pará den e teksto, Dios ta tene mizerikordia ku e persona ku nan a peka kontra dje, dor di permití pa e kasa atrobe despues di un divorsio, pero esaki no ta konta pa esun ku a kometé inmoralidat seksual. Por tin algun instante kaminda e “personahe kulpabel” tin mag di kasa atrobe, pero esei no ta loke e teksto aki ta siña nos.

Tin hende ta haña ku 1 Korintionan 7:15 ta un otro ”eksepshon” pa por kasa atrobe si un kasá ku no ta kreyente ta divorsiá di un kreyente. Pero, e konteksto no ta menshoná ku e por kasa atrobe, solamente e ta bisa ku un kreyente no ta mará na un matrimonio si e kasá ku no ta kreyente ke bai lagé. Otronan ta bisa ku abuso (di un kasá òf yu) ta un motibu balido pa divorsio, maske e no ta pará den Beibel. Aunke ta posibel ku esaki por ta e kaso, nunka no ta prudente pa presumí riba e Palabra di Dios.

Tin bia loke ta bin ariba durante e debate tokante e klóusula di eksepshon, ta e echo ku maske kiko “infidelidat matrimonial” ta enserá, e ta un pèrmit pa divorsio, i no ku mester hasié. Asta ora adulterio wòrdu kometí, un pareha por, pa medio di grasia di Dios, siña pordoná i purba rekonstruí nan matrimonio. Dios a pordoná nos di hopi mas kos. Nos por sigui Su ehèmpel i pordoná asta e piká di adulterio (Efesionan 4:32). Pero, den hopi kaso, un kasá no ta repentí i ta sigui den inmoralidat seksual. Einan posiblemente por apliká Mateo 19:9. Hopi hende tambe ta buska manera pa kasa mesora bèk despues di divorsio, mientras kisas Dios ke pa nan keda soltero/soltera. Tin bia Dios ta yama hende pa nan keda soltera/soltero pa asina nan atenshon no dividí (1 Korintionan 7:32-35). Kasamentu despues di un divorsio por ta un opshon den sierto sirkunstansianan, pero esei no ta nifiká ku e ta e úniko opshon.

Ta hopi lamentabel ku e kantidat di divorsio entre hendenan ku ta yama nan mes Kristian ta kasi mesun haltu ku esnan di e hendenan ku no ta kreyente. Beibel ta bisa klaramente ku Dios ta odia divorsio (Malakías 2:16) i ku e rekonsiliashon i pordon mester ta e markanan di un kreyente su bida (Lukas 11:4; Efesionan 4:32). Pero, Dios ta rekonosé ku divorsio lo tuma lugá, asta entre Su yunan. Un kreyente ku a divorsia i/òf a kasa atrobe no mester sinti ku Dios ta stim’é menos, asta si su divorsio i/òf matrimonio despues di divorsio no ta kubrí bou di e posibel klóusulanan di eksepshon di Mateo 19:9. Hopi bia Dios ta uza asta e desobediensha pekaminoso di Kristiannan pa realisá kosnan grandi i bon.

English



Bai bèk na home page di Papiamentu

Kiko Beibel ta bisa tokante divorsio i ora un hende bolbe kasa?
Facebook icon Twitter icon Pinterest icon Email icon
© Copyright Got Questions Ministries