settings icon
share icon
Pregunta

Kristiannan mester obedesé lei di Tèstamènt Bieu?

Kontesta


E klave pa kompronde e ponensia aki ta ku nos mester ta konsiente ku lei di Tèstamènt Bieu a wòrdu duná na e nashon di Israel i no na Kristiannan. Algun dje leinan tabat’ei pa mustra e Israelítanan kon pa obedesé i agradá Dios (por ehèmpel e Dies Mandamentunan). Algun dje leinan tabat’ei pa mustra e Israelítanan kon pa adorá Dios i limpia nan mes di piká (e sistema di sakrifisio). Algun dje leinan tabat’ei pa trese distinkshon entre e Israelítanan i otro nashonnan (reglanan di kuminda i paña). Ningun lei di Tèstamènt Bieu no ta konta pa Kristiannan awendia. Ora Hesus a muri na krus, El a pone un fín na e lei di Tèstamènt Bieu (Romanonan 10:4; Galatanan 3:23-25; Efesionan 2:15).

Na luga di lei di Tèstamènt Bieu, nos ta bou di lei di Kristu (Galatanan 6:2), kual ta pa “Stima Señor, bo Dios, di henter bo kurason, ku henter bo alma i ku henter bo mente… stima bo próhimo manera bo ta stima bo mes” (Mateo 22:37-39). Si nos obedesé e dos mandamentunan aki, nos ta kumpli ku tur loke Kristu ta rekerí di nos: “Henter e lei di Moises i e siñansa di e profetanan ta dependé di e dos mandamentunan akí” (Mateo 22:40). Awor, esaki no ta nifiká ku lei di Tèstamènt Bieu ta irelevante pa awe. Hopi dje mandamentunan di Tèstamènt Bieu ta kai bou di e kategoria di “stima Dios” i “stima bo próhimo”. E lei di Tèstamènt Bieu por ta un bon guía pa nos sa kon pa stima Dios i tambe kiko ta enserá pa bo stima bo próhimo. Alabes, pa bisa ku lei di Tèstamènt Bieu ta konta pa Kristiannan di awendia tambe, ta inkorekto. E lei di Tèstamènt Bieu ta un unidat (Hakobo 2:10). Sea tur mester konta òf niun no ta konta. Si Kristu a kumpli ku algun di nan, manera e sistema di sakrifisio, El a kumpli ku tur.

“Pasobra stima Dios ke men kumpli ku su mandamentunan. Anto su mandamentunan no ta un peso pa nos” (1 Huan 5:3). E Dies Mandamentunan tabata básikamente un resúmen di henter e lei di Tèstamènt Bieu. Nuebe di e Dies Mandamentunan ta wòrdu klaramente ripití den Tèstamènt Nobo (tur, ku eksepshon di opservamentu di Sabat). Opviamente, si nos ta stima Dios, nos lo no ke alabá diosnan fálsu ni inka rudia dilanti ídolonan. Si nos ke stima nos próhimo, nos lo no ke mata nan, gaña nan, kometé adulterio kontra nan òf envidiá loke ta pertenesé na nan. E propósito di e lei di Tèstamènt Bieu ta pa hasi hende konsiente ku nos no tin e abilidat pa tene nos mes na e lei i e ta mustra nos ku nos tin nesesidat di Kristu komo nos Salbador (Romanonan 7:7-9; Galatanan 3:24). Nunka no tabata e intenshon di Dios pa e lei di Tèstamènt Bieu bira e lei universal pa tur hende di tur tempu. Nos mester stima Dios i stima nos próhimo. Si nos obedesé e dos mandamentunan aki fielmente, nos lo ta kumpli ku tur loke Dios ta rekerí di nos.

English



Bai bèk na home page di Papiamentu

Kristiannan mester obedesé lei di Tèstamènt Bieu?
Facebook icon Twitter icon Pinterest icon Email icon
© Copyright Got Questions Ministries