Kiko ta e plan di salbashon / kaminda pa salbashon?




Pregunta: Kiko ta e plan di salbashon / kaminda pa salbashon?

Kontesta:
Bo tin hamber? No hamber fìsiko, sino bo tin hamber pa algu èkstra den bida? Tin algu profúndo den bo ku nunka no ta parse di ta satisfecho? Si ta asina, Hesus ta e kaminda! Hesus a bisa, “T’Ami ta e pan ku ta duna bida! Esun ku bini serka Mi, lo no haña hamber nunka mas; esun ku kere den Mi, por konta ku nunka mas e no ta haña set.” (Huan 6:35).

Bo ta konfundí? Ta manera kos ku nunka bo no por haña un direkshon of propósito den bida? Ta mane kos ku un hende a paga e lusnan i bo no por haña e konòpi pa sende nan bèk? Si ta asina, Hesus ta e kaminda! Hesus a proklamá, “Ami ta e lus pa mundu. Esun ku sigui Mi no ta kana nunka den skuridat, ma l‘e tin lus ku ta duna bida.” (Huan 8:12).

Bo a yega di sintibu di atrapá den bida? Bo a yega di purba habri asina tantu porta, djis pa bo ripará despues ku nan tur ta bashí i sin nifikáshon? Bo ta buskando un entrada pa un bida kompletu? Si ta asina, Hesus ta e kaminda! Hesus a deklará, “Ami ta e porta; ken ku drenta paden via di Mi, lo haña salbashon; lo e drenta paden i ora e sali, e ta haña kunuku di yerba bèrdè. (Huan 10:9).

Otro hendenan a yega di desapuntábu? Bo relashonnan tabata bashí? Ta manera kos ku tur hende ke purba uzabu? Si ta asina, Hesus ta e kaminda! Hesus a bisa, “Ami ta e bon wardadó; un bon wardadó ta entregá su bida pa e karnénan… Ami ta e bon wardadó; Mi konosé mi karnénan i nan konosé Mi. (Huan 10:11,14).

Bo a yega di puntra bo mes kiko ta pasa despues di e bida aki? Bo ta kansá di biba bo bida pa kosnan ku despues lo putri of kria rustu? Bo a yega di duda si bo bida tin algun nifikáshon? Bo ke biba despues ku bo muri? Si ta asina, Hesus ta e kaminda! Hesus a deklará, “Ami ta e resurekson i bida; esun ku kere den Mi, lo biba asta si e muri. I niun hende ku tin bida eterno, lo no muri nunka mas.” (Huan 11:25-26).

Kua ta e kaminda? Kiko ta e bèrdat? Kiko ta bida? Hesus a kontestá, “Ami ta e kaminda, bèrdat i bida; niun hende no por yega serka Tata, si no ta pa medio di Mi.” (Huan 14:6).

E hamber ku bo ta sinti ta un hamber spiritual, i por wòrdu yená solamente pa medio di Hesus. Hesus ta e úniko ku por kita e skuridat. Hesus ta e porta ku ta yega na un bida satisfaktorio. Hesus ta e amigu i wardadó ku bo ta buskando. Hesus ta e bida- den e mundu aki i tambe e siguiente. Hesus ta e kaminda pa salbashon!

E motibu dikon bo ta sinti hamber, e motibu ku bo ta mane pèrdí den skuridat, e motibu dikon bo no por haña sentido den bida, ta pasobra bo ta separá for di Dios. Beibel ta bisa nos ku nos tur a peka, i dor djesei nos ta separá for di Dios (Predikador 7:20; Romanonan 3:23). E bashí ku bo ta sinti den bo kurason ta pasobra bo bida ta falta Dios. Nos a wòrdu krea pa nos tin un relashon ku Dios. Pa motibu di nos piká, nos a wòrdu separá for di e relashon ei. Pihó ainda, nos naturalesa pekaminoso lo kausa nos pa ta separá for di Dios pa henter eternidat, den e bida aki i e siguiente (Romanonan 6:23; Huan 3:36).

Kon e problema aki por wòrdu resolvé? Hesus ta e kaminda! Hesus a tuma nos pikánan riba Su mes (2 Korintionan 5:21). Hesus a muri na nos lugá (Romanonan 5:8), tumando e kastigu ku nos ta meresé. Tres dia despues, Hesus a lanta for di morto, kual ta prueba ku E tin viktoria riba piká i morto (Romanonan 6:4-5). Dikon El a hasi´é? Hesus mes a kontestá e pregunta aki: “e amor di mas grandi ku un hende por tin pa su amigunan ta di entregá su bida pa nan.” (Huan 15:13). Hesus a muri pa asina nos por biba. Si nos pone nos fe den Hesus, konfia ku Su morto ta e pago pa nos pikánan, tur nos pikánan ta wòrdu pordoná i limpiá. Nos hamber spiritual lo wòrdu satisfasé e ora ei. E lusnan lo sende. Nos lo tin akséso na un bida yená. Nos lo konosé nos miho amigu bèrdadero i e bon wardadó. Nos lo sa ku nos tin bida despues ku nos muri- un bida resusitá den shelu pa eternidat huntu ku Hesus!

“Pasobra Dios a stima mundu asina tantu ku El a duna su úniko Yu, pa tur esnan ku pone konfiansa den djE no bai pèrdí, ma haña bida eterno.” (Huan 3:16).

Bo a tuma e desishon di aseptá Kristu dor di algu ku bo a lesa akiriba? Si ta asina, porfabor klék riba e boton akibounan “Mi a aseptá Kristu awe”.



Bai bèk na home page di Papiamentu



Kiko ta e plan di salbashon / kaminda pa salbashon?