O Iesu o le Atua lava lea? Sa ta'utino ea Iesu o Ia o le Atua?




Fesili: O Iesu o le Atua lava lea? Sa ta'utino ea Iesu o Ia o le Atua?

Tali:
E le o tusia i le Tusi Paia se fetalaiga a Iesu ua patino mai, "O A'u o le Atua." Ae e le faapea e le’i ta'utino Iesu o Ia lava o le Atua. O se faata’ita’iga, se'i taga'i i le fetalaiga a Iesu i le Ioane 10:30, "O a'u nei ma le Tama, e tasi lava i ma'ua." I se vaaiga faigofie, e foliga e le o molimau Iesu i Lona itu Atua. Ae se’i taga’i lelei i le tali a tagata Iutaia ia te Ia, "E le se galuega lelei matou te fetogi ai oe, a o le upu leaga; aua o oe o le tagata, a ua e fai oe ma atua" (Ioane 10:33). E malamalama lelei Iutaia i le fetalaiga a Iesu, o Ia o le Atua. I fuaiupu o lo’o soso’o mai ai e le o fa’asa’oina e Iesu ni a latou upu ma fai atu iai, “Ou te le’i fai atu o A’u o le Atua.” O iina tatou te iloa ai o lo'o ta'utino mai Iesu o Ia lava o le Atua, e tusa ma Lana fetalaiga, "O a'u nei ma le Tama, e tasi lava i ma'ua" (Ioane 10:30). O se isi fa'ata'ita'iga o lo'o i le Ioane 8:58, "Ua faapea mai Iesu ia te i latou, sa a'u i ai, a o lei fanau Aperaamo." Ua fetagofi tagata Iutaia i maa e fetogi ia te Ia (Ioane 8:59). Aisea ua manana'o ai tagata Iutaia e fetogi ia Iesu pe afai ua latou talitonu e le o fetu'uina e Iesu le Atua e ala i Lana ta'utinoga, o Ia lava o le Atua?

Fai mai Ioane 1:1 "O le Atua foi le Lokou." Fai mai foi Ioane 1:14 "...Ua liu tino tagata le Lokou." O loo manino lelei ai iina o Iesu o le Atua ua liu tino tagata. Ua ta'utino mai le Galuega 20:28, "...Ia leoleo atu i le Ekalesia a le Atua, ua faatauina e Ia mona i Lona lava toto." O ai na na faatauina le ekalesia i lona lava toto? O Iesu Keriso. Ua ta'utino mai lava le Galuega 20:28 le faatauina e le Atua o le ekalesia i Lona lava toto. O lea la, o Iesu lava o le Atua!

Ua ta'utino lava Toma, le so'o o Iesu fai mai, "Lo'u Alii e, ma lo'u Atua e" (Ioane 20:28). E le'i fa'asa'oina o ia e Iesu. O lo'o fa'amalosi mai ia i tatou le Tito 2:13, ina ia tatou faatalitali atu i le faaalia lea o le pupula o le Atua silisili, o lo tatou Faaola o Iesu Keriso lea (vaai foi i le Peteru 1:1). I le Eperu 1:8 o loo ta'utino mai ai le Tama e uiga ia Iesu, "A ua faapea mai i le Alo, O lou nofoalii, le Atua e, e faavavau faavavau lava lea; o le tootoo o lou malo, o le tootoo o le amiotonu lea."

I le Faaaliga, o loo faatonuina e le agelu le Aposetolo o Ioane ia na o le Atua e ifo iai o ia (Faaaliga 19:10). O loo iai foi isi tusitusiga i le Upu o loo tapua'i ai tagata ia Iesu (Mataio 2:11; 14:33; 28:9,17; Loka 24:52; Ioane 9:38). E le'i vavaoina e Iesu i latou o e tapua'i ia te Ia. Afai e le o Iesu o le Atua, Na te vavaoina tagata ina ia le tapua'i ia te Ia, e pei ona faia e le Agelu i le tusi o Faaaliga. E tele foi fuaiupu ma mataupu o le Tusi Paia o loo faamautuina ai lea itu Atua o Iesu.

O le mea e sili ona taua tatou te iloa ai o Iesu lava o le Atua, o le mautinoa lea o le manatu afai e le o Ia o le Atua, e le mafai la e Lona maliu ona togiola a'i le lalolagi atoa (I Ioane 2:2). Ua na o le Atua e toatasi e mafaia ona totogiina se tau faapenei. Na o le Atua e mafai ona tauaveina agasala a le lalolagi (2 Korinito 5:21), maliu, ma toe tu -- e faamaonia ai Lona manumalo a'ia'i i le agasala ma le oti.


Toe taga'i i le itulau ua faaliliuina i le gagana Samoa

O Iesu o le Atua lava lea? Sa ta'utino ea Iesu o Ia o le Atua?