O le a le aoaoga a le Tusi Paia e uiga i le pele tupe? O le agasala ea le pele tupe?




Fesili: O le a le aoaoga a le Tusi Paia e uiga i le pele tupe? O le agasala ea le pele tupe?

Tali:
O le pele tupe e mafai ona faamatalaina, o le "faaaogaina o se alaga tupe ina ia taumafai e maua se faaopoopoga i se auala e le o mautinoa." E le o faasaina faapitoa mai e le Tusi Paia le pele tupe, le petipeti, poo le tusia o lou igoa e maua ai se alagatupe. Ae peita'i, o loo lapata'iina i tatou e le Upu, ia 'alo ese mai le tui'nanau i le tupe (I Timoteo 6:10; Eperu 13:5). O loo faamalosi mai foi le Upu ina ia tatou 'alo ese ma taumafaiga ia "vave ona mauoa" (Faataoto 13:11; 23:5; Failauga 5:10). O le pele tupe e faa'autu i le tu'inanau i le tupe ma e le taumate e faaosoosoina ai tagata ona o loo folafola mai ai le vave mauagofie ai o le oloa.

O le a le leaga o le pele tupe? O le pele tupe e fai sina faigata aua afai e le faifaiso'o ae faia i ni nai taimi, e ma'imau le tupe, ae e le faapea o se mea "leaga." E tele tagata ua fa'ama'imauina a latou tupe i ia ituaiga ta'aloga. E leai se eseesega o le fa'ama'imau o tupe i le pele tupe ma le matamata tifaga (i le tele o taimi), o le taumafa faaletatau i mea 'ai taugata, po'o le faatauina o se mea e leai sona aoga. Ae i le taimi lava e tasi, e le faapea ua tatau ona pele tupe e toe faaola mai ai ni tupe ua faaalu i mea e le tatau. E le o se mea tatau le faama'imauina o tupe i mea e le aoga. O tupe totoe e tatau ona sefe mo mea o loo mana'omia i le lumana'i pe tuuina atu mo le galuega a le Atua - e le o le faaalu i le pele tupe ma isi tulaga faapena.

O le pele tupe i le Tusi Paia. A o le o manino lelei le Tusi Paia e uiga i le pele tupe, o loo ta'u mai lava le "laki" poo le "le mautinoa." O se faata'ita'iga, taga'i i le faiga o le vili i le tusi o Levitiko ina ia filifilia ai le 'oti e fai ai le taulaga ma le 'oti e faasola. Sa faia e Iosua se vili e iloa ai vaevaega o fanua mo niisi ituaiga. Sa faia foi e Neemia se vili ina ia iloa ai i latou e nonofo i totonu o pa o Ierusalema atoa ma e e tatau ona nonofo i fafo atu. Sa faia le vili e le 'au aposetolo e iloa ai poo ai ua tofia e fai ma sui o Iuta. Fai mai le Faataoto 16:33, "E faia le vili i le fatafata o le ofu; a e mai ia Ieova lona faatonuga uma lava." E leai se mea o loo faatagaina mai ai i le Tusi Paia le pele tupe poo le taaloga "le mautinoa" e fai ma faafiafiaga pe avea foi ma faata'ita'iga o e o loo mulimuli i le Atua.

O fale pele tupe ma taaloga le mautinoa e maua ai le tupe: O fale pele tupe o loo faaaogaina ai so'o se ituaiga togafiti e faamailei ai le tagata pele tupe ina ia tele ai lana tupe e faaalu. E tele foi ina faataugofieina ai pe 'ave fua foi le mea inu malosi, e faaosofia ai onaga, ma faatama'iaina ai le mafaufau lelei ia 'aua ai ne'i faia se filifiliga atamai. O mea uma i le fale pele tupe ua matua faaaogaina e alu ai se vaega tupe matua tele ae leai se toe foi mai, se'i vagana ni tulaga vave mavae e fa'aosofia ai sina fiafiaga puupuu lava. E faamailei tupe maua mai taga a tagata e ala i folafolaga ua faasalalauina, faapea e faatupe ai aoaoga ma isi foi polokalama e ono aoga mo le soifua o tagata. Ae ui i ia faasalalauga, ua tele ni su'esu'ega ua mautinoa ai o tagata pele tupe, e le tele ni tupe maua ma e le tatau ona latou faama'imauina a latou tupe i pepa o le vili. Ua tele na'ua le faatogafiti o faasalalauga faapea e "vave ai ona mauoa" ma ua avea ma faaosoosoga ua le mafai ai e le toatele ona tineia le tu'inanau ae maise i le taimi ua mana'omia ai le tupe. E matua itiiti lava le tupe e maua ina ua malo i nei tulaga, e le taitai ona tala feagai ma le tele o le afaina ua manu'a ai olaga o tagata e toatele.

Atua i le pele tupe ma tulaga uma faapenei: E tele tagata ua fai mai e a na ona o e ta'a'alo i le pele tupe ma mea faapena, ina ia avatu tupe ua malo ai ma le ekalesia, po'o niisi foi itu'aiga faalapotopotoga e aoga iai le tupe. O se mea lelei ia fuafuaga, ae o le mea moni lava e itiiti lava ni nai tagata ua faataunuuina nei ulua'i faamoemoega. Ua maua i su'esu'ega, o le tele o tagata na maua tupe mai nei tulaga ua sili atu lo latou matitiva nai lo le taimi ae le'i maua lea tupe. E to'aitiitii, pe afai foi e tauane ai, ni tupe na foai mo se mea lelei ma le aoga. E le gata i lena, ae e le o mana'omiaina e le Atua a tatou tupe mo lana galuega tala'i i le lalolagi. Fai mai le Faataoto 13:11, "E faaitiiitia le oloa i le fai mea faatauvaa; a o le faaputu mea i galuega, e faateleina ana mea." O le Atua e silisili ese ma o Ia Na te aumaia mea uma o loo mana'omia e le ekalesia e ala i tulaga mama. Pe mata e faaeaina le Atua pe a tatou avatu ia te Ia o ni tupe ua maua mai fualaau faasaina poo tupe sa gaoi mai i se faletupe? E le o mana'omia foi e le Atua se tupe sa "gaoia" mai e matitiva e ala i le faaosoosoga ina ia maua ni oloa.

O loo faapea mai I Timoteo 6:10 ia te i tatou, "Aua o le mana'o i le tupe, o le pogai lea o mea leaga uma lava; ua mananao tele i ai nisi, ona sese ai lava lea o i latou i le upu o le faatuatua, ua tu'ia ai ua ati i latou e i latou i puapuaga e tele." Ua ta'utino mai le Eperu 13:5, "Ia aunoa a outou amio ma le matapeapea; ia gata ia o outou mana'o i mea ua ia te outou; aua ua fetalai mai o ia, Ou te le tuua lava oe, ou te le tuulafoai lava ia te oe." "E leai se na te mafaia ona auauna i alii e toalua; aua e 'ino'ino o ia i le tas, a e alofa atu i le tasi; a le o lea, e faapipii atu ia i le tasi, a e faaleaoga i le tasi. Tou te le mafaia ona auauna i le Atua atoa ma mamone."


Toe taga'i i le itulau ua faaliliuina i le gagana Samoa

O le a le aoaoga a le Tusi Paia e uiga i le pele tupe? O le agasala ea le pele tupe?