settings icon
share icon
Fesili

E ala mai ea le faaolataga i le faatuatua, pe ala mai i le faatuatua ua faaopoopo iai ma galuega?

Tali


O se fesili e sili ona taua lenei i le talitonuga faaKerisiano. O lea fesili na mafua ai le oo mai o le Taimi o Le Faafouina - o le vavaeeseina lea o le lotu Perotesano mai le lotu Katoliko. O lea fesili, o le ki i le eseesega tele na faatu'iese ai Ekalesia Perotesano ma le Lotu Katoliko. O lea foi le ki ua ala ain ona eseese le talitonuga o le Kerisiano e talitonu i tusitusiga a le Tusi Paia ma le tele o gaoioiga "faaKerisiano" i nei ona po. O le faaolataga ea e ala i le faatuatua, poo le faatuatua e faaopoopo iai ma galuega? E na ona le talitonu ia Iesu ou te faaolaina ai, pe tatau ona ou talitonu ia Iesu atoa ma le faia o isi mau mea?

Ua faafaigataina le fesili o le faatuatua poo le faatuatua atoa ma galuega ona o nai isi fuaiupu i le Tusi Paia ua le mafai ona tuu faafeagai. Se'i tuu faafeagai le Roma 3:28, 5:1 ma le Kalatia 3:24 aga'i i le Iakopo 2:24. Ua vaaia e niisi se eseesega i aoaoga a Paulo (faaolataga e ala i le faatuatua) ma Iakopo (faaolataga e ala i le faatuatua atoa ma galuega). O le mea moni, e le o eseese talitonuga o Paulo ma Iakopo i lea mataupu. E tasi lava le mea e foliga ua eseese ai ona o niisi ua manatu e iai se va o mataupu nei, o le faatuatua ma galuega.

E patino lelei tusitusiga a Paulo o loo faatatau i le ta'uamiotonuina i le faatuatua (Efeso 2:8-9) a o Iakopo o loo faaataata mai faapea o le ta'uamiotonuina e ala i le faatuatua atoa ma galuega. E fofoina lea faafitauli i le iloilo lelei o le uiga moni o tusitusiga a Iakopo. O loo faasea Iakopo i le talitonuga faapea e faatuatua le tagata e aunoa ma le fanau mai ai o ni galuega lelei (Iakopo 2:17-18). O loo faatatau tonu le faamatalaga a Iakopo i le atoatoaga o le faatuatua ia Keriso e fanau mai ai se olaga feliua'ina atoa ma galuega lelei (Iakopo 2:20-26). E le o fai mai Iakopo o le ta'uamiotonuina e ala i le faatuatua e faaopoopo iai ma galuega, ae o le tagata ua ta'uamiotonuina moni e ala lea i le faatuatua o loo iai ma galuega lelei i lona olaga. Afai ua ta'utino se tasi o ia o se tagata talitonu, ae le ia te ia ni galuega lelei --- o loo iai la le masalosaloga poo atoatoa lona faatuatua ia Keriso (Iakopo 2:14, 17, 20, 26).

E tutusa lelei le manatu lea ma tusitusiga a Paulo. O fua lelei o loo fua mai i olaga o e talitonu o loo ta'ua i le Kalatia 5:22-23. E mua'i ta'u mai ia te i tatou le faaolaina i le faatuatua, e le o galuega (Efeso 2:8-9), ae mulimuli ane ua faapea mai Paulo ua faia foi i tatou ina ia faia galuega lelei (Efeso 2:10). O loo mana'omia e Paulo ia sili ona fua tele mai le olaga suia e pei foi o la Iakopo, "O lenei, afai o ia Keriso se tasi, o le tagata fou ia; ua mavae mea tuai, faauta, ua faafouina mea uma" (2 Korinito 5:17)! E leai se eseesega o aoaoga a Iakopo ma Paulo i le mataupu o le faaolataga. O le mataupu lava lea e tasi ae ala eseese lona faamatalaina. Ua faamamafaina e Paulo le ta'uamiotonuina i le faatuatua a ua faamamafaina e Iakopo le faatuatua ia Keriso e fanau mai ai galuega lelei.

English



Toe taga'i i le itulau ua faaliliuina i le gagana Samoa

E ala mai ea le faaolataga i le faatuatua, pe ala mai i le faatuatua ua faaopoopo iai ma galuega?
© Copyright Got Questions Ministries