O le a le uiga o lenei olaga?




Fesili: O le a le uiga o lenei olaga?

Tali:
O le a le uiga o lenei olaga? E faapefea ona ou maua le mafua’aga, le ola faatumuliaina, ma le fiafiaga moni i lenei olaga? E ia te a'u ea le agava’a ou te ‘ausia ai le tapula’a o so'o se mea ou te faia ma ou maua ai se taui taua e tumau? O le toatele ia o tagata e le o tutu ma taula’i le vaai i le uiga moni o lenei olaga. Ua latou toe tepa i tua ina ua mavae tausaga e tele ma taumate pe ‘aisea ua malepelepe ai a latou mafutaga ae poo le a foi lea lagona gaogaolia i totonu, a o lea ua ‘ausia le tapula’a o mea sa tausinio iai. E iai se tagata taalo peisipolo sa 'ausia le tulaga e sili ona maualuga o lea taaloga, ae o iina na fesiligia ai o ia pe mata e iai se mea sa tatau ona faailoa atu ia te ia i le taimi faatoa amata ai ona taalo. O lana tali, "Sa tatau ona fai mai se tasi ia te a'u, afai e te ‘ausia le tapula’a o lau taumafaiga, e leai toe iai se mea i luma atu." E tele tagata ua taunuu i le sini o a latou taumafaiga ma iloa ai iina le gaogaolia o le i’uga ua o’o iai, ae ua ma'imau ai le tele o tausaga o tausinio mo tulaga maualuluga.

I lo tatou olaga nei, ua tulituliloa e tagata soo se ituaiga mea, ma le manatu e faatumuliaina ai iina le olaga. O isi nei tulaga ua oo iai sailiga a le toatele: O le faaeaina i pisinisi, o le mauoa, o mafutaga mafana ma isi, o feusua'iga, o fa'afiafiaga eseese, o le faia o mea lelei mo niisi tagata, ma isi lava mea. Ae ua ta'utino le toatele ina ua 'ausia e i latou le tapula'a o a latou sailiiliga o le mauoa, mafutaga eseese, o faafiafiaga, sa lagonaina pea le gaogaolia i totonu – o se faalagona gaogaolia ua foliga e leai lava e faamalieina ai.

E faapea le taumafaiga a le sa tusia le tusi o Failauga e faaupu ai le lagona gaogaolia i totonu o le tagata, "Faatauva’a! Faatauva’a!... E faatauva’a mea uma lava!" E matua tamaoaiga lea tusitala, ae e sili atu foi lona poto nai lo se isi lava tagata, e oo lava i tagata i ona po nei; e silia ma le 100 ana ava, e tele foi ona fale mata'ina ma ana faatoaga sa momoo iai malo uma, sa maua ia te ia o mea taumafa eseese e tele ma uaina e sili ona lelei, atoa ma soo se ituaiga faafiafiaga mo lena lava taimi. Atonu sa iai se taimi e mafai ona fa’apea ai o ia, “ou te maua so’o se mea e momoo iai lo’u loto.” Ae peita'i ua ia vaavaai toto’a i le “olaga i lalo ifo o le la” (o le olaga lea o loo tatou ola ai e foliga e gata mai i mea o loo vaaia ma faalogo iai) E Faatauva'a! Aisea ua iloa ai lea vala tele? Ua fausia e le Atua i tatou ina ia sili atu nai lo mea o loo tatou faia i le taimi lava lenei. O le tala lea a Solomona ina ua Ia malamalama i le Atua, "Ua Ia tuuina le faavavau i loto o tagata." I le taele o o tatou fatu, i le taimi lava lenei, o loo taatia ai se moomooga tele e le mafai ona faamalieina i mea o le tino.

O loo tatou maua i le tusi muamua o le Tusi Paia, o Kenese, na faia e le Atua le tagata i Lona faatusa (Kenese 1:26). O lona uiga e pei lava i tatou o le Atua nai lo se isi mea na Ia fausia (se tasi mea ola). Tatou te maua foi iina niisi mea o le tatou olaga sa faavaeina ae le'i oo ina pa'u le ulua'i tagata ona o le agasala, faapea le faasalaina o le eleele: (1) Sa faia e le Atua le tagata ina ia mafutafuta faatasi (Kenese 2:18-25); (2) Na tofia e le Atua galuega mo le tagata (Kenese 2:15); Sa iai le mafutaga a le Atua ma le tagata (Kenese 3:8); ma le (4) Sa tofia e le Atua le tagata ia pule i le laueleele (Kenese 1:26). O le a la le taua o nei mea? Ou te talitonu sa manatu le Atua ia faatumuliaina o tatou olaga i nei mea uma, ae peita'i o mea uma nei (ae maise lava le mafutaga a le Atua ma le tagata) sa matua afaina ina ua pa'u le tagata i le agasala ua oo mai ai le faasalaga i le eleele (Kenese 3).

I le Faaaliga, le tusi mulimuli o le Tusi Paia, i le iuga o mea uma e o'o mai e pei ona tusia, ua faaali mai e le Atua Lona faaumatiaina le lagi ma le lalolagi nei e pei ona tatou iloa ae aumai ia te i tatou se nu'u fou o le lagi ma le lalolagi fou Na te toe fausia. O iina, Na te faafouina ai Lana mafutaga ma i latou uma ua faamamaina. E iai niisi tagata ua faamasinoina e tusa ma a latou agasala ma ua lafoina i le Lepa Afi (Faaaliga 20:11-15). Ma o iina e mavae atu ai le faasalaga o le agasala; e le toe iai se agasala, loto faavauvau, fa'ama'i, oti, tiga, ma isi lava mea (Faaaliga 21:4). E fai ma e ua talitonu mea uma lava; E mau le Atua ma i latou, ma e fai foi i latou ma Ona atalii (Faaaliga 21:7). O iina e faaatoatoaina ai e le Atua le mafutaga ma Ia e pei ona Ia foafoaina i le amataga; sa agasala le tagata ma ua fa'amuta ai lea mafutaga; Ae ua toe faaauauina e le Atua lea mafutaga e faavavau ma e ua faamamaina e Ia lava. Ma o lou ola i lenei olaga e te maua mea uma sa e naunau ma tausinio iai ae e oti e aunoa ma se fesootaiga ma le Atua e tele atu lona faatauva'a! Ae ua saunia e le Atua se ala ina ia le na ona e maua ai le ola e faavavau (Luka 23:43) ae ia e tausinio ai i se olaga faatumulia atoa ma le fiafia. O lea, po ua e maua ea lea olaga manaia i le taimi lava lenei?

O LE UIGA O LE OLAGA UA TOE FAAFOUINA E ALA IA IESU KERISO

E pei ona tau faamatalaina atu i luga, o le uiga moni o le olaga nei ma le faavavau e maua le i le toe fuata'ina o le mafutaga ma le Atua ua motusia i le taimi o Atamu ma Eva ina ua la'ua pa'u'u atu i le agasala. O nei ona po, o le mafutaga ma le Atua e mafai e ala i Lona lava Alo e toatasi, o Iesu Keriso (Galuega 4:12; Ioane 14:6; Ioane 1:12). E maua e le tagata le ola e faavavau pe a taunu'u o ia i le salamo e tusa ma ana agasala (o le le toe mana'o lea e ola pea i lea olaga leaga ae ua mana'o ia Keriso Na te faia se suiga ma avea ai oe o se tagata fou) ma amata ai iina ona faalagolago ia Iesu Keriso o lou Faaola (taga'i i le fesili "O le a le fuafuaga o le faaolataga; mo niisi manatu e faatatau i lenei lava mataupu).

O lea, o le uiga moni o le tatou olaga e le na ona e talia Iesu ma avea o Ia e fai ma Faaola (o se mea e matua matagofie tele). Ae peita'i, e amata ona e mauaina le ola faatumulia i lenei olaga ina ua fai oe ma so'o e mulimuli ia Keriso, a'oa'o i Ona ala, tulituliloa ou taimi ma Ia i Lana Afioga, le Tusi Paia, feso'ota'i ma Ia e ala i le tatalo, ma savali faatasi ma Ia i lou usiusita'i i Ana Fetalaiga. Afai e le'i avea oe ma tagata talitonu (pe o oe foi o se tagata talitonu fou) e mafai ona e faapea ane ia te oe lava, "E le faatupu lagona fiafia lenei mea ia te a'u!" Ae ia e faitau pea aga'i i lalo. E faapea fetalaiga sa tautalagia e Iesu:

"Ia outou o mai ia te a'u, o outou uma o e tigaina ma mafatia i avega, o a'u foi e malolo ai outou. Ia outou amoina la'u amo, ma ia outou faaa'oa'o ia te a'u, aua o a'u le agamalu ma le loto maulalo; ona maua lea e outou o le malologa mo outou agaga. Aua e avegofie la'u amo, o la'u avega foi e mama ia" (Mataio 11:28-30). "...ua ou sau ina ia latou maua le ola, ia maua atili ai lava" (Ioane 10:10e). "...'Ai se tasi e fia mulimuli mai ia te a'u, aua ne'i usiusitai o ia ia te ia, a ia ave e ia lona satauro, i le mulimuli mai ai ia te a'u. Aua ai se fia faasaogalemuina lona ola, e maumau ai ia te ia; a o le faamaumau lona ola ona o a'u, e maua ai e ia" (Mataio 16:24-25). "Ia e fiafia lava oe ia Ieova, ona foaiina lea e Ia ia te oe o mea e manao i ai lou loto" (Salamo 37:4).

O nei fuaiupu uma o loo tuuina mai ai se avanoa e faia ai le tatou filifiliga. E mafai ona tatou sailiili pea e pulea o tatou lava olaga (e taunuu ai i se olaga gaogaolia) pe tatou te filifili mai le taele o tatou loto e saili le Atua ma Lona finagalo atoa mo o tatou olaga (ona tatou taunuu lea i se olaga faatumulia, ua faafeiloa'iina foi o tatou manaoga, ma maua ai e i tatou le fiafiaga sili). E maua mea uma nei ona o le alofa o Le na fausia i tatou, ma o loo Ia naunau ia tatou maua mea silisili (e le na o se olaga faigofie, ae o se olaga faatumuliaina).

Ou te fia faamatala atu se faatusa sa faia e se tasi o a'u uo faifeau e faa’iu ai lenei talanoaga. Afai o oe o se tagata e fiafia i taaloga ma ua e loto nei e te fia ‘auai i se taaloga fa’a porofesa, e mafai ona e aumaia ni nai tala e totogi ai lou nofoaga e mamao ma pito i luga o le fale taalo, pe e te tago e totogi ni nai selau tala o sou nofoaga latalata e te matamata lelei ai i le taaloga. E faapena le olaga Kerisiano. O le vaai MUAMUA o le Atua mai se nofoaga latalata e le mo Kerisiano na o le Aso Sa. E le’i totogiina e nei tagata le tau. Ae o le vaai MUAMUA i le Atua mai se nofoaga latalata e mo le soo ua avea lona loto atoa ia Keriso ma ua ana le toe sailia ona lava manaoga ina ia sailiili le finagalo o le Atua i lenei olaga. O i LATOU NEI ua totogiina le tau (ua tuuina atoa mea uma ia Keriso ma Lona finagalo); ua latou tofo ma iloa lelei le atoatoa o le olaga, ma ua mafai e i latou ona faafeagai mea uma, mafuta faatasi ma isi, atoa foi ma Le na faia i latou e aunoa ma se mea e faalavelavea ai! Po ua e totogiina ea le tau? O e mana’o e totogi le tau i le taimi nei lava? Afai o lea, e le toe galala lou agaga i le fia taumafa aua o le ‘a fa’atumuliaina oe.


Toe taga'i i le itulau ua faaliliuina i le gagana Samoa

O le a le uiga o lenei olaga?