O le pule i le tino e faamalie ai le tu'inanau -- o se agasala lea i le Tusi Paia?




Fesili: O le pule i le tino e faamalie ai le tu'inanau -- o se agasala lea i le Tusi Paia?

Tali:
E le o iai se tulaga faapitoa i Tusi Paia o lo'o ta'ua ai lea tulaga, poo se agasala pe leai. Ae ui i lea, e le taumate e le o ni tulaga lelei ua ala ai ona pulea e se tasi lona tino ina ia faamalie ai le tu'inanau ua ia faalogoina. E mafua lea tulaga ina ua iai ni mafaufauga, o ni mea faatosina, poo ni ata foi ua faaosofiaina ai le mana'oga e fia faia se feusua'iga. O faafitauli ia e tatau ona faia iai se faiga. Afai ua aveesea ma ua manumalo le tagata i agasala o le tino atoa ma mea leaga faapea -- ona fo'ia ai lea o le faafitauli o le pulea ina ia faamalie ai le tu'inanau.

O loo aoao mai e le Tusi Paia ni tulaga leaga "e 'aua ne'i ta'ua lava" ia te i tatou (Efeso 5:3). Ou te le iloa pe faapefea ona manatu se tasi e tatau ona faatagaina lea tulaga. O isi foi taimi, o le suega lelei lava e iloilo ai se agasala pe afai ua tuufesili ina e se tasi, o lou tago lea e faamatala se mea ua e faia i se tasi tagata, ma vaai pe mafai ona e faamatalaina i lou loto fiafia. Aua afai o se mea e te masiasi ai ina ua silafia e niisi, o iina e te mautinoa ai o le agasala le mea ua e faia. O le isi su'ega lelei e te iloa ai le lelei poo le leaga o se mea o loo e mafaufau e fai, o lou tatalo iai ina ia faamanuiaina e le Atua ma faaaoga mo Lona lava Finagalo. Ou te iloa, e le pasia ai iina lea tulaga o le pule i le tino ina ia faamalieina ai le tu'inanau, aua e le o se mea tatou te "mitamita" ai pe faafetaia ai foi le Atua.

Ua a'oa'oina tatou e le Tusi Paia, "pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua" (I Korinito 10:31). Afai o tula'i mai se avanoa e masalosalo ai le tagata poo fiafia iai le Atua i lea tulaga, e sili pe a lafoa'iina loa. Ou te fai atu, o loo iai le avanoa e masalosalo ai pe 'a tatou vaavaai toto'a i lea tulaga. "O mea uma lava e le ala mai i le faatuatua, o le agasala lea" (Roma 14:23). Ou te le iloa pe faapefea, e tusa ma le Tusi Paia, ona viia le Atua ona ua pulea e le tagata lona tino e faamalieina ai lona tu'inanau. I se vaaiga aga'i i luma, e tatau ona tatou manatua o o tatou tino, e oo i o tatou agaga, ua togiolaina ma ua pulea e le Atua. Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aia foi outou ia te outou? Aua ua faatauina outou i le tau; o lenei, ia outou vivii atu i le Atua i o outou tino ma o outou agaga, o mea a le Atua ia" (I Korinito 6:19-20). O lea upu moni maoa'e e tatau ona mafaufau mamafa iai i tatou i soo se mea e manatu e faia i o tatou tino poo se mea foi tatou te fia o iai. Ona o nei mataupu faavae, ou te faamautuina ai le matua agasala o le pulea e le tagata o lona tino ina ia faamalieina ai le tu'inanau, e tusa ma le Tusi Paia. Ou te le talitonu o lea tulaga e fiafia mai iai le Atua, e le o se tulaga lelei foi, ma e le pasia ai foi le tulaga o loo faamautuina ai, o le Atua lava o Le pule i o tatou tino.


Toe taga'i i le itulau ua faaliliuina i le gagana Samoa

O le pule i le tino e faamalie ai le tu'inanau -- o se agasala lea i le Tusi Paia?