Nasaan si Hesus noong tatlong araw sa pagitan ng Kanyang kamatayan at muling pagkabuhay?

Tanong: "Nasaan si Hesus noong tatlong araw sa pagitan ng Kanyang kamatayan at muling pagkabuhay?"

Sagot: Sinasabi ng 1 Pedro 3: 18-19, “Sapagkat si Kristo’y namatay para sa inyo. Namatay Siya ng dahil sa kasalanan ng lahat – ang walang kasalananan para sa mga makasalanan – upang iharap kayo sa Diyos. Siya’y namatay ayon sa laman at muling binuhay ayon sa Espiritu. Sa kalagayang ito, pinuntahan Niya at inaralan ang mga espiritung nakabilanggo.” Ang talatang, “ayon sa Espiritu,” sa talata 18 ay eksaktong kahalintulad ang pagkakagawa sa talatang, “ayon sa laman.” Kaya nga pinakamainam na iugnay ang salitang “Espiritu” sa salitang “laman.” Ang laman at Espiritu ay ang laman at Espiritu ni Kristo.

Ang mga salitang “binuhay ayon sa Espiritu,” ay tumutukoy sa katotohanang ang pagdadala ng kasalanan at kamatayan ni Kristo ay ang nagdala sa paghihiwalay ng Kanyang pantaong Espiritu mula sa Ama (Mateo 27: 46). Ang kaibahan ay nasa pagitan ng laman at Espiritu, gaya ng sa Mateo 27: 41 at Roma 1: 3-4, at hindi sa pagitan ng laman ni Kristo at ng Banal na Espiritu. Matapos hugasan ni Kristo ang kasalanan, ang Kanyang Espiritu ay nagpatuloy sa pakikipaghalubilo sa Ama na dating nasira o nabasag.

Inilalarawan ng 1 Pedro 3: 18-22 ang kinakailangang tulay sa pagitan ng paghihirap ni Kristo (Talata 18) at ng Kanyang kaluwalhatian (Talata 22). Tanging si Pedro lamang ang nakapagbigay ng partikular na impormasyon kung ano ang nangyari sa pagitan ng dalawang pangyayari. Ang salitang “inaralan” sa talata 19 ay hindi pangkaraniwang salita sa Bagong Tipan na naglalarawan sa pagpapahayag ng Ebanghelyo. Ang tunay na ibig sabihin nito ay ihayag ang mensahe. Si Hesus ay naghirap at namatay sa Krus, ang Kanyang katawan ay pinatay, at ang Kanyang Espiritu ay namatay. Subalit ang Kanyang Espiritu ay muling binuhay at isinuko Niya ito sa Ama. Ayon kay Pedro, sa pagitan ng Kanyang pagkamatay at muling pagkabuhay ginawa ni Hesus ang isang espesyal na proklamasyon sa mga “espiritung nakabilanggo.”

Bilang pag-uumpisa, Tinukoy ni Pedro ang mga tao bilang “kaluluwa” at hindi Espiritu (3: 20) sa bagong Tipan, ang salitang “Espiritu” ay ginagamit para isalarawan ang mga anghel o demonyo, at hindi ang mga tao; at ang talata 22 ay tila nagdadala ng ganitong kahulugan. Hindi rin makikita sa Bibliya na sinasabihan tayong bumisita si Hesus sa impiyerno. Sinasabi sa aklat ng Mga Gawa 2: 31 na pumunta si Hesus sa “Hades”, subalit ang “Hades” ay hindi impiyerno. Ang salitang “Hades” ay tumutukoy sa lugar ng mga namatay, isang temporaryong lugar kung saan hinihintay nila ang muling pagkabuhay.

Binibigay ng aklat ng Pahayag 20: 11-15 ang malinaw na kaibahan sa pagitan ng dalawa. Ang impiyerno ay permanente at ang kahuli-hulihang lugar ng mga hinatulang tao. Ang “Hades” naman ay isang temporaryong lugar. Isinuko ng ating Panginoon ang Kanyang Espiritu sa Ama, namatay, at sa ilang panahon sa pagitan ng Kanyang pagkamatay at muling pagkabuhay, bumisita sa lugar ng mga namatay na kung saan inihatid Niya ang mensahe sa mga Espiritu (maaaring mga itinapong mga Anghel; tingnan ang Hudas 6) na maaaring may kaugnayan sa panahon bago pa ang pagbaha sa panahon ni Noe. Nilinaw ito ng talata 20.

Hindi sinabi sa atin ni Pedro kung ano iprinoklama ni Hesus sa mga espiritung nakabilanggo, pero hindi ito maaaring mensahe ng katubusan sapagkat ang mga anghel ay hindi pwedeng iligtas (Hebreo 2: 16). Maaaring ito ay deklarasyon ng katagumpayan laban kay satanas at sa kanyang mga pulutong (1 Pedro 3: 22; Colossas 2: 15). Tila ipinapakita rin ng aklat ng Efeso 4: 8-10 na si Kristo ay pumunta sa “Paraiso” (Lucas 16: 20; 23: 43) at dinala sa kalangitan ang yaong mga nanampalataya sa Kanya bago pa man Siya namatay. Ang nasabing talata ay hindi nagbibigay ng malaking bilang ng mga detalye kung ano nga ba ang nangyari, subalit karamihan sa mga iskolar ng Bibliya ay sumasang-ayon na ito ang ibig sabihin. Ang masasabi lang, ang Bibliya ay hindi lubusang malinaw sa kung ano ba ang eksaktong ginawa ni Hesus sa tatlong araw sa pagitan ng Kanyang kamatayan at muling pagkabuhay, Tila maaari ring Siya ay naghayag ng katagumpayan sa mga itinapong mga anghel o sa mga hindi mananampalataya. Ang tiyak nating malalaman ay si Hesus ay hindi nagbibigay ng ikalawang pagkakataon para sa kaligtasan. Sinasabi sa atin ng Bibliya na haharap tayo sa paghatol pagkatapos ng kamatayan (Hebreo 9: 27), at wala ng pangalawang pagkakataon. Walang eksakto at tiyak na malinaw na kasagutan kung ano ang ginawa ni Hesus sa panahong nasa pagitan ng Kanyang kamatayan at muling pagkabuhay. Marahil ito ay isa sa mga misteryo na mauunawaan natin kung marating na natin ang kaluwalhatian sa langit.

Balik sa Tagalog Home Page