Ano ang panalangin ng isang makasalanan?

Tanong: "Ano ang panalangin ng isang makasalanan?"

Sagot: Ang panalangin ng isang makasalanan ay panalangin ng isang tao sa Dios kapag naunawaan niyang siya ay isang makasalanan at nangangailangan ng isang Tagapapagligtas. Ang pagbigkas ng panalangin ng isang makasalanan ay walang saysay kung basta lamang ito bibigkasin. Ito’y magiging mabisa lamang kung ito’y bibigkasin nang taos-puso, na alam niya at naniniwalang isa siyang makasalanan na kailangan ng kaligtasan.

Una sa lahat, dapat maunawaan natin na tayo ay makasalanan. Sinasabi sa Roma 3:10, “Walang matuwid wala kahit isa.” Ipinaliliwanag ng Biblia na tayong lahat ay nagkasala. Lahat tayo ay makasalanan na nangangailangan ng awa at kapatawaran ng Dios (Tito 3:5-7). Dahil sa ating mga kasalanan, nararapat lamang na maparusahan tayo ng walang hanggang kaparusahan sa impyerno (Mateo 25:46). Ang panalangin ng isang makasalanan ay ang paghingi ng biyaya sa halip na hatol. Ito’y paghingi ng awa sa halip na galit.

Dapat malaman rin natin ang ginawa ng Dios para sa atin upang mailigtas tayo sa kapahamakan at pagiging makasalanan. Ang Dios ay nagkatawang tao sa katauhan ni Jesu-Cristo (Juan 1:1, 14). Itinuro sa atin ni Jesus ang katotohanan tungkol sa Dios at namuhay siya na isang matuwid at may banal na pamumuhay (Juan 8:46; 2 Corinto 5:21). Pakatapos, namatay siya sa krus alang-alang sa atin. Tiniis niya ang parusang para sana sa atin (Roma 5:8). Muling nabuhay si Jesus upang patunayan na nadaig niya ang kasalanan, kamatayan at impyerno (Colosas 2:15: 1 Corinto 15). Dahil sa lahat ng ito, maaari nang mapatawad ang ating mga kasalanan at maangkin natin ang ipinangakong buhay na walang hanggan at tahanan sa langit – kung itutuon natin ang ating pananampalataya kay Jesu-Cristo. Ang tanging dapat nating gawin ay paniwalaan na si Jesus ay namatay nang dahil sa atin at muli siyang nabuhay mula sa mga patay (Roma 10:9-10). Tayo’y maliligtas sa pamamagitan lamang ng biyaya, at ng ating pananampalataya kay Jesu-Cristo. Sinasabi sa Efeso 2:8 “Dahil sa kagandahang loob ng Dios ay naligtas tayo sa pamamagitan ng ating pananampalataya kay Cristo. At ang kaligtasang ito’y kaloob ng Dios, at hindi galing sa inyo”.

Ang panalangin ng isang makasalanan ay isang simpleng pagpapahayag sa Dios ng kanyang pananampalataya at pagpapasalamat sa kaligtasang ibinigay sa kanya. Alalahanin mo na ang pagbigkas ng panalanging ito ay hindi makapagliligtas sa iyo. Tanging ang pananampalataya at pagtitiwala mo kay Cristo ang makapagliligtas sa iyo. Kung naniniwala kang ikaw ay isang makasalanan at nangangailangan ng kaligtasan sa pamamagitan ni Jesu-Crito, narito ang panalangin ng isang makasalanan na maari mong ipanalangin sa Dios: “O Dios, alam kong nagkasala ako laban sa iyo at nararapat lamang na ako’y parusahan mo. Ngunit inako ni Jesus ang aking kasalanan at tiniis ang parusang dapat ay sa akin. Patawarin mo ako sa aking mga kasalanan. Tinatalikuran ko ang aking mga kasalanan at magtitiwala ako ngayon kay Jesus para sa aking kaligtasan. Tinatanggap ko si Jesus bilang sarili kong tagapagligtas. Salamat po sa iyong kahanga-hangang biyaya at kapatawaran. At salamat din sa buhay na walang hanggan! Amen!”

Ikaw ba ay gumawa ng desisyon para kay Kristo dahil sa iyong mga nabasa dito? Kung Oo, I-Klick ang “Tinanggap ko si Kristo ngayon” sa ibabang kahon

Balik sa Tagalog Home Page