Ano ba ang kaibahan sa pagitan ng kaluluwa at espiritu ng tao?

Tanong: "Ano ba ang kaibahan sa pagitan ng kaluluwa at espiritu ng tao?"

Sagot: Ano ba ang kaibahan sa pagitan ng espiritu at kaluluwa? Ang salitang espiritu, ay tumutukoy lamang sa hindi materyal na aspeto ng tao. Ang sangkatauhan ay may espiritu, subalit hindi tayo espiritu. Gayon man, sa Kasulatan, tanging ang mga mananampalataya lamang o yaong mga pinananahanan ng Banal na Espiritu ang sinasabing buhay pagdating sa espiritwal na aspeto (1 Corinto 2:11; Hebreo 4:12; Santiago 2:26). Ang mga hindi naman mananampalataya ay maituturing na patay pagdating sa espiritwal na aspeto (Efeso 2:1-5; Colossas 2:13). Sa mga isinulat ni Pablo malaki ang ginagampanan ng espiritu sa espiritwal na buhay ng isang mananampalataya (1 Corinto 2:14; 3:1; 15:45; Efeso 1:3; 5:19; Colossas 1:9; 3:16). Ang espiritu ay ang elemento sa tao na nagbibigay sa kanya ng kakayahan na magkaroon ng matalik na relasyon sa Diyos. Sa tuwing ang salitang espiritu ay ginagamit, ito’y tumutukoy sa hindi materyal na bahagi ng tao kasali na ang kanyang kaluluwa.

Ang salitang kaluluwa ay hindi lamang tumutukoy sa hindi materyal na bahagi ng tao subalit tumutukoy rin ito sa materyal na bahagi. Ang tao ay kaluluwa. Ang salitang “kaluluwa” ay nangangahulugang “buhay.” Gayon man ang Bibliya ay nagbigay pa ng ilang mga bahagi at hindi lamang nakatuon sa buhay. Ang isa sa mga bahaging iyon ay ang kagustuhan ng tao na gumawa ng kasalanan (Lucas 12:26). Natural na ang tao ay masama at dahil dito ang kanyang kaluluwa ay may bahid ng kasalanan. Ang aspeto ng buhay ay inalis sa panahon ng pisikal na kamatayan (Genesis 35:18; Jeremias 15:2). Ang “kaluluwa” kasama na ang “espiritu” ay ang sentro ng maraming espiritwal at emosyonal na mga karanasan (Job 30:25; Awit 43:5; Jeremias 13:17). Sa tuwing ang salitang kaluluwa ay ginagamit, maaaring tumutukoy ito sa kabuuan ng isang tao, buhay man o matapos mamatay.

Ang kaluluwa at ang espiritu ay magkapareho sa paraang sila ay ginamit sa espiritwal na buhay ng isang mananampalataya. Magkaiba lang sila pagdating sa kanilang tinutukoy. Napaka-importanteng maunawaan na kapwa ito tumutukoy sa hindi materyal na bahagi ng tao, subalit tanging ang “espiritu” lamang ang tumutukoy sa paglalakad ng tao kasama ang Diyos. Ang “kaluluwa” naman ay tumutukoy sa paglalakad ng tao sa mundo, materyal man o hindi materyal.

Balik sa Tagalog Home Page