Paano malalaman kung ang isang bagay ay kasalanan?

Tanong: "Paano malalaman kung ang isang bagay ay kasalanan?"

Sagot: May dalawang bagay na dapat pagtuunan ng pansin sa tanong na ito Una, ang mga bagay na hayagang tinutukoy ng Bibliya na kasalanan, at pangalawa, ang mga bagay na hindi hayagang tinutukoy ng Bibliya. Ilang mga talata sa Bibliya na hayagang tumutukoy ng mga makasalanang gawain ay matatagpuan sa Mga Kawikaan 6:16-19, Galatia 5:19-21, at I Corinto 6:9-10. Walang kaduda-duda na ang mga talatang ito ay malinaw na nagsasaad ng mga makasalanang gawain, mga bagay na hindi nagbibigay kaluguran sa Diyos. Pagpatay, pangangalunya, pagsisinungaling, at marami pang iba – malinaw na ang mga ito ay hayagang tinutukoy ng Bibliya na kasalanan. Subalit sa mga bagay na hindi hayagang tinutukoy ng Bibliya, paano malalaman kung ang mga ito ay masamang gawain o hindi. Kung hindi binanggit ng Bibliya ang isang usapin o isyu, may ilang mga paraan ayon na rin sa Bibliya upang ito ay masuri.

Una, kung walang talata sa Biblya na tumutukoy sa isang usapin o isyu, mas nararapat na ating itanong kung iyon ba ay magdudulot ng kabutihan kaysa sa tanong na kung ito ba ay magdudulot ng kasamaan. Halimbawa, sabi sa Bibliya, na “mamuhay kayong may karunungan sa kanila …….. at samantalahin ninyo ang panahon.” Ang pansamantala nating pananatili dito sa sanlibutan ay pawang mahalaga at maikli lamang kung itutumbas natin sa walang hanggan kaya nararapat na hindi natin sasayangin ang nalalabing panahon sa mga makasariling gawain, bagkus ito’y “maging kagamit-gamit sa ikatitibay upang ito ay makapagbigay biyaya sa nakikinig. (Efeso 4:29).

Masusuri natin kung mabuti ang isang bagay kung alam natin sa ating puso na ito ay isang bagay na pagpapalain ng Diyos para sa ikasusulong ng Kanyang mabuti at banal na layunin. “Kaya nga, kung kakain kayo, o iinom o anumang gagawin ninyo, gawin ninyo ang lahat ng bagay para sa kaluwalhatian ng Diyos” (1 Corinto 10:31). Subalit kung sa tingin natin na ang isang bagay ay hindi magbibigay kaluguran sa Diyos, marapat dapat na ito ay ating iwasan. “Ang lahat ng bagay na hindi sa pananampalataya ay kasalanan” (Roma 14:23). Kailangan nating malaman na ang ating katawan at ang ating kaluluwa, ay tinubos at pag-aari na ng ating Diyos. “Hindi ba ninyo alam na ang inyong katawan ay banal na dako ng Banal na Espiritu na nasa inyo? Ang inyong katawan ay mula sa Diyos at kayo ay hindi sa inyong sarili. Ito ay sapagkat binili kayo sa halaga. Luwalhatiin nga ninyo ang Diyos sa inyong katawan at espiritu. Ang inyong katawan at espiritu ay sa Diyos (1 Corinto 6:19-20). Sa mga katotohanang ito dapat ang isang mananampalataya ay mamumuhay sa isip at sa gawa.

Bilang karagdagan, kailangan nating suriin ang ating mga kilos hindi lamang sa mga bagay na may kaugnayan sa Diyos, kundi sa mga bagay na may kaugnayan din naman sa ating pamilya, mga mahal sa buhay, mga kaibigan at sa mga tao na ating nakakahalubilo. Maging ang isang bagay na sa atin ay pawang hindi masamang gawin, kung ito ay may masamang maidudulot sa iba, ito ay kasalanan. “Higit na mabuti ang hindi kumain ng laman, o uminom ng alak, o gumawa ng anumang bagay na makakatisod, o makakapagdulot ng pagdaramdam o makakapagpahina sa iyong kapatid…. Tayong malalakas ay dapat magbata ng mga kahinaan ng mga mahihina, at hindi upang bigyan ng kaluguran ang ating mga sarili” (Roma 14:21; 15:1)

At bilang pangwakas, lagi nating katatandaan na si Hesu-Kristo ay Panginoon at Tagapagligtas ng ating buhay, at walang anumang bagay na mas mahalaga sa buhay na ito kundi ang mamuhay ayon sa Kanyang kalooban. Walang pag-uugali o hangarin o mga pang-araw araw na gawain ang siyang dapat na maghahari sa ating buhay, kundi si Kristo lamang ang may ganap na kapangyarihan bilang Panginoon at tagapanguna ng ating buhay.

“Para sa akin, ang lahat ng bagay ay ayon sa kautusan, ngunit hindi lahat ay kapakipakinabang. Ang lahat ng bagay ay maaari kong gawin ngunit hindi ako magpapasakop sa kapamahalaan sa mga bagay na ito (1 Corinto 6:12). “Anuman ang inyong gawin sa salita o sa gawa, gawin ninyo ang lahat sa pangalan ng Panginoong Jesus na may pagpapasalamat sa Diyos Ama sa pamamagitan niya” (Colosas 3:17).

Balik sa Tagalog Home Page