Ano ba ang mga palatandaan ng pagtatapos ng panahon?

Tanong: "Ano ba ang mga palatandaan ng pagtatapos ng panahon?"

Sagot: Binibigyan tayo ng aklat ng Mateo 24:5-8 ng ilang importanteng palatandaan upang malaman natin ang pagdating ng katapusan ng panahon, v “Sapagkat maraming paririto sa aking pangalan at magsasabi, 'Ako ang Mesias!' At marami silang maililigaw. Makaririnig kayo ng alingawngaw ng labanan at ng mga balita tungkol sa digmaan. Huwag kayong mababagabag. Dapat mangyari ang mga ito, ngunit hindi pa ito ang wakas. vSapagkat makikibaka ang bansa laban sa kapwa bansa at ang kaharian sa kapwa kaharian. Magkakagutom at lilindol sa iba't ibang dako. Ang lahat ng ito'y pasimula pa lamang ng mga paghihirap.” Ang pagdami ng bilang ng mga huwad na mesias, ang pagkakaroon ng digmaan, at ang pagkakaroon ng malawakang tag-gutom, mga salot at mga natural na mga trahedya-ang mga ito ay ang “palatandaan” ng malapit na ang katapusan ng panahon. Kahit na sa talatang nabanggit, binibigyan tayo ng babala. Hindi tayo dapat malinlang (Mateo 24:4), sapagkat ang ganitong mga pangyayari ay ang simula pa lamang (Mateo 24:8), at ang katapusan ay paparating pa (Mateo 24:6).

Karamihan sa mga nag-iinterpreta ay nagsasabing ang mga paglindol, kaguluhang politikal, at ang bawat pag-atake sa Israel ay isang tiyak na palatandaan na malapit na ang katapusan ng panahon. Habang ang ganitong mga pangyayari ay tanda ng nalalapit na pagtatapos, hindi naman ang mga ito ang indikasyon na dumating na nga ang katapusan ng panahon. Nagbabala si Pablo na sa katapusan ng panahon ay magkakaroon ng kapansin-pansing pagdami ng mga maling aral. “Maliwanag ang sinasabi ng Espiritu: sa huling panahon, iiwan ng ilan ang pananampalataya. Susundin nila ang magdarayang espiritu at ang mga aral ng diyablo.” (1 Timoteo 4:1). Inilarawan ang katapusan ng panahon bilang “mapanganib na yugto ng panahon” dahil sa lumalaking bilang ng kasamaan ng tao na masiglang nilalabanan ang katotohanan (2 Timoteo 3:1-9; see also 2 Thessalonica 2:3).

Ang iba pang posibleng palatandaan ay ang muling pagpapatayo ng templo ng mga hudyo sa Jerusalem, at ang pagdami ng kalaban ng Israel, at ang pagsulong ng iisang gobyerno sa buong mundo. Ang pinaka-kilalang palatandaan ng katapusan ng panahon ay ang bansang Israel. Noong 1948, kinilala ang Israel bilang isang Malaya at mayroong otoridad na mamunong estado sa unang pagkakataon mula 70 A.D. Ipinangako ng Diyos kay Abraham na mapapasakamay ng kanyang mga angkan ang Canaan bilang “walang hanggang kayamanan o pagmamay-ari” (Genesis 17:8), Ayon naman sa propesiya ni Ezekiel muling bubuhayin ang pisikal at espiritwal na katangian ng Israel (Ezekiel 37). Ang pagkakabuo ng Israel bilang bansa sa sarili nitong lupain ay importante sa propesiya ng pagtatapos ng mundo, dahil sa pagiging prominente ng Israel sa “eschatology.” (Daniel 10:14; 11:41; Pahayag 11:8).

Habang nasa isipan natin ang mga palatandaang ito, maaari tayong maging matalino pagdating sa inaasahan nating katapusan ng panahon. Samantala, hindi naman natin dapat iinterpreta na ang alinman sa mga pangyayaring ito bilang isang malinaw na indikasyon ng nalalapit na pagdating ng katapusan ng panahon. Binigyan tayo ng Diyos ng sapat na impormasyon upang maging handa tayo, subalit hindi sapat na impormasyon upang maging arogante tayo.

Balik sa Tagalog Home Page