Ano ba ang pinagmulan ng iba’t-ibang mga lahi?

Tanong: "Ano ba ang pinagmulan ng iba’t-ibang mga lahi?"

Sagot: Hindi tayo partikular na binibigyan ng Bibliya ng malinaw na pinagmulan ng iba’t-ibang mga lahi o kulay ng balat ng sangkatauhan. Ang katotohanan, mayroon lamang iisang lahi-ang lahi ng mga tao. Sa kabuuan ng lahi ng tao ay mayroong malaking mga pagkakaiba’t-iba sa kulay ng balat at iba pang mga pisikal na katangian. Sinasabi ng ilan na noong binago ng Diyos ang mga lingguwahe ng mga tao sa Tore ng Babel (Genesis 11:1-9), pinasimulan rin Niya ang pagkakaiba’t-iba ng mga lahi. Posibleng binigyan ng Diyos ng pagbabago ang genetic ng sangkatuhan upang manatili silang buhay sa iba’t ibang ekolohiya, tulad nang ang mga Aprikano ay may kakayahang mabuhay sa kabila ng sobrang init ng panahon sa Africa. Ayon sa ganitong pananaw, binago ng Diyos ang lingguwahe, at ito’y nagresulta sa paghihiwalay ng mga tao ayon sa kanilang mga wika, at pagkatapos binago ang genetic ng mga lahi base na rin sa lugar kung saan sila maninirahan. Habang ito’y posible, wala namang malinaw na Biblikal na basehan ang ganitong pananaw. Ang lahi/kulay ng balat ng sangkatauhan ay hindi nababanggit na may koneksiyon sa Tore ng Babel.

Matapos ang pagbaha, noong umiiral na ang iba’t-ibang mga wika, ang mga grupo ng taong nagsasalita ng magkahalintulad na wika ay humiwalay sa iba pang mga grupo ng tao na nagsasalita rin ng ibang wika. Dahil dito, ang Gene Pool ng partikular na grupo ng tao ay lumiit na lamang dahil hindi na ang buong populasyon ng sangkatauhan ang puwede nilang pakisamahan. Ang pakikipag-isang dibdib ng mga magkakalapit na tao ay nangyari, at sa paglipas ng panahon isang partikular na katangian ang lumabas sa mga grupong ito ng tao. Habang patuloy na nakikipag-isang dibdib ang mga tao sa kanilang grupo, lumiit ng lumiit ang Gene pool ng mga ito, hanggang sa puntong ang mga taong mayroong magkahalintulad na wika ay nagkaroon na rin ng magkaparehong pisikal na katangian, at kung mayroon mang ibang katangian na lumalabas ito’y pambihira lamang.

Ang isa pang paliwanag ay si Adan at Eba ay nagmamay-ari ng genes na nagbubunga ng itim, kayumanggi, at puting mga anak. Ito ay kahalintulad ng kung papaano ang magkaibang-lahi ay nag-isang dibdib, kadalasan ang kanilang mga nagiging anak ay hindi magkakahalintulad ang kulay ng balat. Dahil nais ng Diyos na ang sangkatauhan ay mayroong pagkakaiba sa panlabas na kaanyuan, maaaring binigyan ng Diyos ng kakayahan si Adan at Eba na magsilang ng anak na mayroong magkakaibang kulay ng balat. Sa bandang huli, ang tanging mga tao na nakaligtas sa pagbaha ay si Noa at ang kanyang asawa, ang tatlong anak na lalaki ni Noa at ang kanilang mga asawa, walo katao lahat (Genesis 7:13). Maaaring ang asawa ni Shem, Ham at Japhet ay mula sa ibang lahi. Posible ring ang asawa ni Noa ay mula rin sa ibang lahi. Maaaring silang walo ay nagmula sa magkaibang mga lahi, ibig sabihin nagtataglay sila ng genetics na nagbibigay sa kanila ng kakayahang magsilang ng mga anak na magkaibang lahi. Anuman ang paliwanag, ang pinaka-importanteng aspeto ng katanungang ito ay tayo ay nasa iisang lahi lamang, lahat tayo ay nilalang ng iisang Diyos, at nilalang para sa iisang layunin.

Balik sa Tagalog Home Page