Ano ba ang tamang paraan sa pag-aaral ng Bibliya?

Tanong: "Ano ba ang tamang paraan sa pag-aaral ng Bibliya?"

Sagot: Ang pagdedetermina sa kahulugan ng Kasulatan ay isa sa pinaka-importanteng trabaho ng isang mananampalataya sa buhay na ito. Hindi lamang sinasabi sa atin ng Diyos na sapat nang basahin lang natin ang Bibliya. Dapat nating pag-aralan ito, pangalagaan ito ng tama. Isang malaking trabaho ang pag-aaral ng Bibliya. Ang madaliang pagbabasa sa Bibliya ay kung minsan nagreresulta sa maling pagkaka-unawa sa ibig sabihin ng Diyos. Samakatuwid, importanteng maunawaan ang ilang mga prinsipyo tungkol sa kung papaano madetermina ang tamang kahulugan ng Bibliya.

1. Manalangin at hingin sa Banal na Espiritu na bigyan ka ng pang-unawa. Sinasabi sa Juan 16: 13 “Gayon ma'y kung siya, ang Espiritu ng katotohanan ay dumating, ay papatnubayan niya kayo sa buong katotohanan: sapagka't hindi siya magsasalita ng mula sa kaniyang sarili; kundi ang anumang bagay na kaniyang marinig, ang mga ito ang kaniyang sasalitain: at kaniyang ipahahayag sa inyo ang mga bagay na magsisidating.” Si Hesus sa Juan 16 ay nagsasalita ukol sa Banal na Espiritu at sinabing kung Siya ay darating (ang Banal na Espiritu ay dumating noong Pentecost, Mga Gawa 2), gagabayan Niya sila sa lahat ng katotohanan. Kagaya ng paggabay ng Banal na Espiritu sa mga Apostoles sa pagsulat sa Bagong Tipan, gagabayan rin Niya tayo para maunawaan natin ang Kasulatan. Alalahanin, ang Bibliya ay ang Aklat ng Diyos, at kinakailangan nating tanungin Siya kung ano ang ibig sabihin nito. Kung ikaw ay isang Kristiyano, ang sumulat sa Kasulatan, ang Banal na Espiritu, ay nananahan sa iyo…at nais Niyang maunawaan mo kung ano ang Kanyang isinulat.

2. Huwag humugot ng Kasulatan mula sa mga talata na nakapalibot dito at ipalagay na ang kahulugan ng nasabing talata ay hindi nakadepende sa nakapalibot na mga talata. Dapat palagi mong basahin ang mga kalapit na mga talata at kabanata, at may kamalayan sa layunin ng naturang Aklat sa Bibliya. Habang ang lahat ng Kasulatan ay nagmula sa Diyos (2 Timoteo 3:16; 2 Pedro 1:21), ginamit ng Diyos ang tao para isulat ito. Ang mga taong ito ay may mga Tema sa isip, layunin sa pagsulat, isang partikular na isyu o mga isyu na kanilang tinutugunan. Basahin ang pinagmulan ng aklat sa Bibliya na iyong pinag-aaralan upang malaman mo kung sino ang sumulat ng aklat, para kanino ito isinulat, kailan ito isinulat, at kung bakit ito isinulat. Pagkatapos basahin ang mga kabanata na nakasulat bago ang mga talatang iyong pinag-aaralan upang maunawaan mo kung ano nga ba ang paksa na isinusulat ng taong may-akda nito. Dapat ding mag-ingat at hayaang ang mga nakasulat ang siyang magpaliwanag sa kanyang sarili. Minsan ang ibang tao ay ang siyang nagbibigay ng kanilang sariling kahulugan sa mga salita upang makuha nila ang interpretasyon na ninanais nila.

3. Huwag tangkaing lubos na magsarili sa iyong pag-aaral sa Bibliya, Napaka-aroganteng isipin na wala kang makukuhang kaalaman sa buong buhay na trabaho ng iba sa pag-aaral sa Bibliya. Ang ilang tao, sa pagkakamali, binubuksan ang Bibliya taglay ang ideyang magtitiwala lamang sila sa Banal na Espiritu at mauunawaan at madidiskubrehan nila ang nakatagong katotohanan sa Kasulatan. Si Kristo, sa pagbibigay sa Banal na Espiritu, ibinigay Niya ang mga Espiritwal na regalo sa katawan ng mga mananampalataya. Ang isa sa mga Espiritwal na regalong ito ay ang pagtuturo (Efeso 4:11-12; 1 Corinto 12:28). Ang mga gurong ito ay ibinigay ng Diyos upang matulungan tayong maunawaan at masunod ang Kasulatan. Palaging isang matalinong desisyon ang pag-aaral ng Bibliya kasama ang ilang mga mananampalataya, at nagtutulungan sa bawat isa sa pag-unawa at paglalapat ng katotohanan ng Salita ng Diyos.

Balik sa Tagalog Home Page