सुआल
उध्दार दी जोजना/उध्दार दा रस्ता केह़?
जवाब
केह़ तुस भ़ुखे ओ? शरीरिक तौर उप्पर भ़ुखे नेई, केह़ तुंदे जीवने च तुसेंगी कुसे ह़ोर चीजे दी भ़ुख ऐ? केह़ तुंदे मने दी गह़राईये च कोई नेह़ी चीज ऐ जिदे ह़ोने दे बावजूद बी तुसेंगी लगदा ऐ के तुसेंगी संतुष्टि नेई ऐ? जेकर नेह़ा ऐ ता यीशु गै रस्ता ऐ! यीशु ने ग्लाया, "जीवन दी रुट्टी अऊं ऐं : जेका मेरे कश औंदा ऐ ओह कदे भ़ुखा नेई ह़ोग, ते जेका कोई मेरे उप्पर विश्वास करदा ऐ ओह़ कदे प्यासा नेई ह़ोग" (यूहन्ना 6:35)।
केह़ तुस दुबिधा च पेदे ओ? केह़ अपने जीवन आस्ते तुसेंगी कोई रस्ता या मकसद नेई लब्बेया? केह़ इय्यां लगदा ऐ जियां कुसे ने बत्ती साह़ली ओड़दी ह़ोए ते तुस उसी फी बालने आस्ते बटन तुप्पा नेई सक्के करदे ओ? जेकर इय्यां ऐ ता, यीशु गै इक रस्ता ऐ! यीशु ने एलान कित्ता के, "दुनिया दी लोह़ अऊं ऐं, जेका मेरे पिच्छे चले ओह़ न्ह़ेरे च नेई चलग, बल्कि जीवने दी लोह़ ह़ासल करग।" (यूहन्ना 8:12)।
केह़ तुस कदे नेह़ा मह़सूस करदे ओ के तुंदे जीवने दे भ़ित्त बंद ह़ोई गेदे न? केह़ तुसें बड़े सारे भ़ित्तें गी सिरफ एह़ जानने आस्ते खटखटाया ऐ, के उंदे पिछे सिरफ सुनापन ते बेअर्थ ऐ? केह़ तुस भ़रपूरी दे जीवन च दाखल ह़ोने आस्ते उस भ़ित्ते दी तोप च ओ? जेकर इय्यां ऐ ता यीशु गै इक रस्ता! यीशु ने एलान कित्ता के, "भ़ित्त अऊं ऐं, जेकर कोई मेरे च ह़ोईये अंदर औग, ता उध्दार ह़ासल करग, ते अंदर-बाह़र आया जाया करग ते चारा पाग" (यूहन्ना 10:9)।
केह़ दूऐ लोग म्ह़ेशा तुसेंगी नीचा दसदे न? केह़ तुंदे रिश्ते त्रुट्टेदे ते खोखले न? केह़ तुसेंगी इय्यां लगदा ऐ के ह़रेक आदमी तुंदा फायदा चुक्कने दा जतन करे करदा ऐ? जेकर इय्यां ऐ ता यीशु गै रस्ता ऐ! यीशु ने ग्लाया, "खरा गुआलू अऊं ऐं, खरा गुआलू अपनी भ़िड्डें आस्ते अपने प्रान दिंदा ऐ, अऊं अपनी भ़िड्डे गी जानना ऐं ते मेरी भ़िड्डां मिगी जानदियां न" (यूहन्ना 10:11,14)।
केह़ तुस ह़रान ह़ुंदे ओ के जीवन दे बा'द केह़ ह़ोग? केह़ तुस अपने जीवने गी उनें चीजे कन्ने मेल करने आस्ते थक्की गेदे ओ जेकिया सड़दी ते जंग खाई जंदियां न? केई वारी केह़ तुसेंगी शक ह़ुंदा के जीवने दा किश मतलब ऐ बी ऐ के नेई? केह़ तुस अपनी मौत दे बा'द जीना चाह़ंदे ओ? जेकर इय्यां ऐ ता, यीशु गै रस्ता ऐ! यीशु ने एलान कित्ता के, पुनरुत्थान ते जीवन अऊं गै ऐं, जेका कोई मेरे उप्पर विश्वास करदा ऐ, जेकर ओह़ मरी बी जा तां बी जीग। ते जेका कोई जींदा ऐ ते मेरे उप्पर विश्वास करदा ऐ, ओह़ आखर काल तकर बी नेई मरग" (यूहन्ना 11:25-26)।
रस्ता केह़ ऐ? सच केह़ ऐ? जीवन केह़ ऐ? यीशु ने जवाब दित्ता, "रस्ता ते सच ते जीवन अऊं गै ऐं, बगैर मेरे कोई बी पिता कश नेई पुज्जी सकदा" (यूहन्ना 14:6)।
जिस भ़ुख गी तुस मह़सूस करदे ओ ओह़ आत्मक भ़ुख ऐ, ते सिरफ यीशु दे जरिये गै पूरी कित्ती जाई सकदी ऐ। सिरफ इक यीशु गै ऐ जेका न्हेरे गी खतम करी सकदा ऐ। यीशु इक संतुश्ट जीवने दा भ़ित्त ऐ। यीशु इक दोस्त ते गुआलू ऐ जिदी तुस खोज करे करदे हे। यीशु - इस पास्से औने आली दुनिया आस्ते जीवन ऐ। यीशु गै उध्दार दा रस्ता ऐ।
ओह़ बजह़ जिस कन्ने तुस भ़ुख मह़सूस करे करदे ओ, ओह़ बजह़ जिस कन्ने तुसेंगी इय्यां लग्गे करदा ऐ के तुस न्हेरे च जाये करदे ओ, ओह़ वजह़ जिस कन्ने तुस जीवन दा कोई मतलब नेई, मह़सूस करे करदे ओ, एह़ ऐ के तुस परमेसरे शा बख ह़ोई गेदे ओ (सभोपदेशक 7:20, रोमियों 3:23)। जिस सुनेपन गी तुस अपने दिले च मह़सूस करदे ओ ओह़ तुंदे जीवने च परमेसरे दा नेई ह़ोना ऐ। साढ़ी सरिश्टी परमेसरे कन्ने नाता जोड़ीये रखने आस्ते कित्ती गेदी ही। पर साढ़े अपने पापें दी वजह कन्ने अस उस नाते चा बख ह़ोई गेदे न। इदे थवां बी बूरा एह़ ऐ के साढ़ा पाप असेंगी साढ़े इस जीवन ते अगले जीवन च, बी म्ह़ेशा आस्ते परमेसरे कशा बख ह़ोने दी बजह़ बनग (रोमियों 6:23, यूहन्ना 3:36)।
इस समस्या दा ह़ल केह़ ह़ोई सकदा ऐ? यीशु गै रस्ता ऐ! यीशु ने साढ़ा पाप अपने उप्पर लेई लेत्ता (2 कुरिन्थियों 5:21)। यीशु साढी जगह़ उप्पर (रोमियों 5:8), उस सजा गी लेंदे ह़ोए मरी गेया जिदे ह़िस्सेदार अस हे। त्रैं दिनें बा'द यीशु मुरदें चा, पाप ते मौत उप्पर अपनी जीत गी साबत करदे ह़ोए जिंदा ह़ोई गेया (रोमियों 6:4-5)। उन्ने इय्यां कीं कित्ता? यीशु ने अप्पु इस सुआल दा जवाब दित्ता ऐ: "इदे थवां बड्डा इरख कुसे दा नेई के कोई अपनें मित्तरें आस्ते अपने प्रान देयै" (यूहन्ना 15:13) यीशु मरेया तांजे अस जी सकचे। जेकर अस यीशु च अपना विश्वास, उदी मौत गी साढ़े पापें आस्ते चुकाए गेदे मुल्ल गी मन्नीये चलने आं - ता साढ़े सारे पाप माफ कित्ते ते ध़ोई दित्ते जंदे न। ता फी अस अपनी आत्मक भ़ुख दी संतुष्टि गी ह़ासल करी सकगे। अस अपने सच्चे खरे मित्तर ते खरे गुआलुए गी जानगे। अस एह जानी लेगे के मरने दे बा'द बी साढ़े कश जीवन ह़ोग - यीशु दे कन्ने म्ह़ेशा-म्ह़ेशा आस्ते सुर्गे च जींदा ह़ोई गेदा जीवन!
"परमेसरे दुनिया कन्ने इन्ना इरख कित्ता के उनें अपना इक्कै-इक पुत्तर भ़ेजी ओड़ेया, तांजे जेका बी उदे उप्पर विश्वास करे, ओह गर्क नेई ह़ोए बल्कि म्ह़ेशा दा जीवन ह़ासल करे।" (यूहन्ना 3:16)।
किजे जे किश तुसें इत्थे पढ़ेया ऐ उदी बजह़ कन्ने केह़ तुसें मसीह दे पिछे चलने दा फैसला लेत्ता ऐ? जेकर इंय्यां ऐ तां मेह़रबानी करीये ह़ठ दित्ते दे "मैं अज यीशु गी अपनाई लेत्ता ऐ" आले बटन गी दबाओ।
English
उध्दार दी जोजना/उध्दार दा रस्ता केह़?