Bia halnak
Ka Ca Ah A Hmanmi Biaknak Hi Zeidah A Si?
Bia lehnak
Vawlei cung ah hin duh thim dingmi a tam tuk cang. Rawl hmanh ah a phunphun a um cang, lakphakti hmanh ah a phunphun a um cang, cun thil pakhat lawng nih kan hna a ngamter kho ti lo. Kan duhmi le kan herhmi thim ding an tam tuk cang. Duhthimnak nun nih kan nun zia hi a dolh chin lengmang cang.
Cuti a si ahcun biaknak ah hin zeidah na ca ah a hmaanmi a si lai? Zalong tein a ummi biaknak, phung le lam a ngei lomi biaknak, sualnak tuah zong ah a poi ah a chia lomi biaknak, phunglam fek `hup in a zulmi biaknak hna hi zeitin dah na ruah hna? An tampi. Asinain biaknak hi duh paoh in thim awk a `hami a si maw?
Atu ah cun biaknak aa zuammi an tam tuk cang, zeiruang ah dah Jesuh, Muhammad, Confucius, Buddha, Charles Taze Russell, Joseph Smith ti bantuk hna hi cucu a sang deuh, cucu ka duh deuh tiah kan ti hna? A ngaingai ti ah cun vancung ah hin biaknak kip lam a phan maw? Biaknak vialte hna hi an i khat dih hna maw? A dik tein kan chim ahcun lam kip nih U.S.A a phak lo bantuk in biaknak kip nih vancung kalnak lam an ngei hna lo.
Jesuh Khrih lawng nih Pathian nawlngeihnak taktak in bia a chim zei ca ah tiah thihnak a tei khotu cu amah lawnglawng a si. Muhammad, Confucius le a dang vialte hna cu nihin tiang ah an thlan chung ah an um rih hna, an ruak pelpawi hmanh an tang ti maw tang ti lo dik. Asinain Jesuh Khrih cu a `hawnnak in nithum hnu ah thlankhor chung in a chuak. Thihnak a teitu cu kan zumh awk deuh hrimhrim ding a si lo maw? Mi kip nih an theih awk zong ah aa tlakmi a si.
Jesuh Khrih a thawh`hannak kong hi tampi a um. A pakhatnak ah, Jesuh Khrih a tho`han tiah mit in a hmumi hna hi minung 500 leng an si. Minung 500 bia cu dai tein umter awk a `ha lo. Jesuh Khrih an phumnak thlankhor kong ah tampi tehte an um. Jesuh Khrih kha tho `han taktak hlah seh law, zumlotu hna nih fawi tein Khrifami hna kha an rak tei hna lai, asinain aho hmanh a doh khotu ding an um lo. Jesuh Khrih cu a tho `han taktak. Thlankhor cu a lawng. A zultu hna nih an fir caah maw a si hnga? Asinain Jesuh Khrih an chiahnak thlankhor kha ralring tein zumlotu hna nih cawngtu ralkap an chiah hna. Ngatlaitu menmen nih Jesuh Khrih a ruak `ha tein ralkap nih an cawngh komi cu an fir ngam fawn lai lo. Chim duhmi cu Jesuh Khrih a thawh`hannak hi hloh awk a `ha lo, a dik lo ti awk zong a `ha lomi a si. A si taktakmi a si.
A um `hanmi cu thihnak a teitu cu mikip nih an theih awk a si. Jesuh Khrih nih a `hawnnak cu thihnak a teinak in fiang tein a langhter. Cucaah Jesuh Khrih nih a chimmi hi kan ngaih ding le kan zumh ding a si. “Keimah hi khamhnak lam taktak cu ka si,” a ti (John 14:6). Jesuh Khrih hi vancung kainak lam tampi lak ah lam pakhat aa tel vemi a si lo. Jesuh Khrih lawnglanwg ah khamhnak lam a um.
Cun Jesuh Khrih nih a chimmi cu, “Ka sin ah ra u, a thil a ritmi hna le a re a theimi hna, dinhnak kan pek hna lai,” tiah bia a kan kamh (Ma`hew 11:28). Vawleicung nun hi a fawimi a si lo. Cheukhat cu lungrethei le vansang taktak in khua a sami tampi an um. Cheukhat cu vawlei cung nunnak ah ruahchan awk a ngei lomi tampi an um. Asinain Jesuh Khrih a zummi ca ah vawlei hi kan ca ah santlai lo hmanh seh law, thih hnu thawh`hannak tal ah ruahchannak ngeih kan hau. Jesuh Khrih hi kan ruahchannak nganpi cu a si.
Sual ngaihthiamnak hmuh na duh ahcun, Jesuh Khrih lawng hi a dikmi biaknak taktak cu a si (Lamkaltu 10:43). Pathian he pehtlaihnak dik taktakmi na duh ahcun Jesuh Khrih lawnglawng hi a dikmi biaknak cu a si (John 10:10). Vancung ah zungzal nunnak ngeih na duh ahcun Jesuh Khrih hi lam cu a si (John 3:16). Jesuh Khrih ah hin na zumhnak chia law zei tik hmanh ah naa ngaichih bal ti lai lo. Na sual ngaihthiamnak ca ah zum law na hnabei zong zei tik hmanh ah an donghter ti lai lo.
GotQuestions.org ah Pathian thawng`ha na relnak thawngin Jesuh Khrih na zum maw? Na zumh ahcun, a tang ah aa `ial mi “Nihin in Jesuh Khrih ka zumh cang” timi kha hmet ko.
English
Ka Ca Ah A Hmanmi Biaknak Hi Zeidah A Si?