Praśn
Kyā Masīhiyon ko deś ke kānūn kā pālan karnā chāhie?
Uttar
Romiyon 13:1-7 kahtā hai ki, "Har ek vyakti śāsakīy adhikāriyon ke adhīn rahe; kyonki koī adhikār aisā nahīn jo Parmeśvar kī or se na ho; aur jo adhikār hain, ve Parmeśvar ke ṭhaharāe hue hain. Islie jo koī adhikār kā virodh kartā hai, vah Parmeśvar kī vidhi kā sāmanā kartā hai, aur sāmanā karnevāle daṇḍ pāenge. Kyonki hākim acche kām ke nahīn, parntu bure kām ke liye ḍar kā kāraṇ hain; ata yadi tū hākim se niḍar rahanā chāhatā hai, to acchā kām kar aur us kī or se terī sarāhanā hogī; kyonki vah terī bhalāī ke liye Parmeśvar kā sevak hai. Parntu yadi tū burāī kare, to ḍar, kyoki vah talavār vyarth liye hue nahīn; aur Parmeśvar kā sevak hai; ki uske krodh ke anusār bure kām karnevāle ko daṇḍ de. Isliye adhīn rahanā na keval us krodh ke ḍar se avaśy hai, varan vivek bhī yahī gavāhī detā hai. Isliye kar bhī do, kyonki Parmeśvar ke sevak hain, aur sadā isī kām men lage rahate hain. Isliye har ek kā hakk chukāyā karo; jise kar chāhie, use kar do; jise mahasūl chāhie, use mahasūl do; jis se ḍarnā chāhie, us se ḍaro; jis kā ādar karnā chāhie uskā ādar karo."
Yah sandarbh bahutāyat ke sāth spaṣṭ kar detā hai ki hame sarakār kā āgyā pālan karnā chāhie jise Parmeśvar ne hamāre ūpar ṭhaharāyā hai. Parmeśvar ne sarakār ko vyavasthā banāe rakhane, buro ko sajā dene, aur nyāy ko baḍhaāvā dene ke lie sṛjā hai (Utpatti 9:6; 1 Kurinthiyon 14:33; Romiyon 12:8). Hame har bāat men sarakār kā āgyāpālan karnā chāhie – kar adā karne men, kānūn aur vyavasthā kā pālan karne men aur sammān dikhāne men. Yadi ham aisā nahīn karte hain, to ham ākhirkār Parmeśvar kā hī nirādar kar rahe hain, kyonki vahī hai jisne sarakār ko hamāre ūpar sthāpit kiyā hai. Jab Prerit Paulus ne Romiyon ko yah patr likhā thā, to vah Nīro ke śāsan ke adhīn Romī sarakār ke adhīn thā, jo śāyad sabhī Romī samrāṭo men sabse burā thā. Paulus phir bhī Romī sarakār ko uske ūpar śāsan karne ko svīkār kartā hai. Ham isse kam kaise kar sakate hain?
Agalā praśn yah hai ki "kyā kabhī aisā samay ātā hai, jab hame jānbūjhakar deś ke kānūn kā pālan nahīn karnā chāhie?" Iskā uttar ho sakatā hai ki Preriton ke 5:27-29 men mil jāe "Unhonne unhen lākar mahāsabhā ke sāmane khaḍaā kar diyā; tab mahāyājk ne unase pūchā 'ki hamne tumhe chitākar āgyā na dī thī ki tum is nām se upadeś na karnā? Taubhī dekho, tum ne sāre Yarūśalem ko apane upadeś se bhar diyā hai aur us vyakti kā lahū hamārī gardan par lānā chāhate ho.' Tab Pataras aur any Preriton ne uttar diyā "Manuṣyon kī āgyā se baḍhkar Parmeśvar kī āgyā kā pālan karnā hī hamārā karttavya hai!'" Isse, spaṣṭ ho jātā hai ki jab tak deś kā kānūn Parmeśvar kī vyavasthā ke virodhābhās men nahīn hai, ham deś ke kānūn kā pālan karne ke lie vivaśa hain. Jaise hī deś kā kānūn Parmeśvar ke ādeś ke virodhābhās men hai, hame deś ke kānūn kī āgyā kā pālan nahīn karnā chāhie aur Parmeśvar kī vyavasthā kā pālan karnā chāhie. Parntu phir bhī, us udāharṇ men, hame sarakār ke hamāre ūpar sthāpit kie hue adhikār kā pālan karnā chāhie. Yah is sacchāī men pradarśit kiyā gayā hai ki Pataras aur Yūhannā ne koḍae khāne kā koī virodh nahīn kiyā, apitu ise anand kī bāat jāni ki unhonne Parmeśvar kī āgyā pālan men satāv ko sahan kiyā thā (Preriton ke kām 5:40-42).
English
Kyā Masīhiyon ko deś ke kānūn kā pālan karnā chāhie?
