Sabt kis din hotā hai, Sanivār yā Ravivār ko? Kyā Masīhiyon ko Sabt kā din mānanā chāhie?



Praśn: Sabt kis din hotā hai, Sanivār yā Ravivār ko? Kyā Masīhiyon ko Sabt kā din mānanā chāhie?

Uttar:
Nirgaman 20:11 men Sabt aur sṛṣṭi ke bīch sambandh hone ke kāraṇ yah akasar dāvā kiyā jātā hai ki "Parmeśvar ne Sabt ko Adan men sthāpit kiyā thā." Hālānki Parmeśvar ke dvārā Sātve din viśrām kiyā jān (Utpatti 2:3) bhaviṣy men Sabt kī vyavasthā ko diye jāne kā pūrv sanket thā, parntu Bāibal men Ejrāel kī santāno kā Mistr deś ko choḍne se pahale Sabt kā koī likhit varṇan nahīn pāyā jātā hai. Pavitr Sāstr men kahīn par bhī koī sanket nahīn hai ki Sabt ke din kā pālan Adam se lekr Mūsā tak kiyā jātā thā.

Parmeśvar kā vachan bahut adhik spaṣṭ kartā hai ki Sabt ke din kā pālan kiyā jān Parmeśvar aur Ejrāel ke madhy ek viśeṣ chinh thā: ‘‘Islie istrāelī viśrāmdin kā mānā karen, varan pīḍhaī se pīḍhaī men usko sadā kī vāchā kā viṣy jānkar mānā kare. Vah mere aur Isrāelīyon ke bīch sadā ek chinh rahegā, kyonki chah din men Yahovā ne ākāś aur pṛthvī ko banāyā, aur Sātve din viśrām karke apanā jī ṭhaṇḍā kiyā’’ (Nirgaman 31:16-17).

Vyavasthā Vivaraṇ 5 men, Mūsā Istrāelīyon kī agalī pīḍhī ko das āgyāe paḍhakar doharātā hai. Yahān, 12-14 vachano men Sabt ko mānane kī āgyā dene ke bād, Mūsā Ejrāel ke rāṣṭr ko Sabt ke diye jāne kā kāraṇ detā hai: ‘‘Aur is bāat kā smaraṇ rakhanā ki Mistr deś men tū āap dās thā, aur vahāan se terā Parmeśvar Yahovā tujhe balavant hāth aur baḍhaāī huī bhujā ke dvārā nikāl lāyā; is kāraṇ terā Parmeśvar Yahovā tujhe viśrāmdin mānane kī āgyā detā hai’’ (Vyavasthā Vivaraṇ 5:15).

Ejrāel ko Sabt ke diye jāne se Parmeśvar kī uddeśy yah nahīn thā ki vah sṛṣṭi ko smaraṇ rakhenge, parntu yah ki vah apane Mistr ke dāstv aur prabhu ke dvārā chuṭakāre dilāe jāne ko smaraṇ rakhenge. Sabt-ko-manāne ke lie kyā jarūrī thā: ek vyakti jo Sabt kī vyavasthā ke adhīn hotā thā Sabt ke din apane sthān se bāhar nahīn jā sakatā thā (nigarmn 16:29), vah āg nahīn jalā sakatā thā (Nirgaman 35:3), aur na hī vah kisī dūsare se kāry karvā sakatā thā (Vyavasthā Vivaraṇ 5:14). Jo vyakti Sabt kī vyavasthā kā ullanghan kartā thā, use mār ḍālā jātā thā (Nirgaman 31:15; Ginatī 15:32-35).

Naye Niyam ke lekho kī jānch karne se hame chār mahattvapūrṇ bāten dikhāī detī hain: 1) Jab kabhī Masīh apane punarūtthān vāle rūp men pragaṭ hue aur din batāyā gayā, to yah sadaiv saptāh ke pahalā din hotā thā (Mattī 28:1, 9, 10; Marakus 16:9; Lūkā 24:1, 13, 15; Yūhannā 20:19, 21). 2) Preriton ke kām se Prakāśitvākytak keval ek hī bār jis Sabt kā ullekh huā vah Yahūdiyon men susmāchār prachār ke udeśyon se hai aur akasar yah sandarbh Yahūdiyon ke ārādhanālay kā dṛśy hai (Prariton ke kām adhyāy 13 -18). Paulus likhatā hai ki, ‘‘Main Yahūdiyon ke lie Yahūdī banā ki Yahūdiyon ko chudha lāūn’’ (1 Kurinthiyon 9:20). Paulus Yahūdiyon ke ārādhanālay men islie nahī gayā ki unake sāth sangti kare aur santo kī unnati kare, parntu islie ki khoe huon ko nirūttar karen aur bachāyā jāe. 3) Ek bār Paulus ne aisā kahā ki, ‘‘Ab se main anyjātiyon ke pāas jāūngā’’ (Preriton ke kām 18:6), iske uparānt sabt ke din kā phir kahīn bhī ullekh nahīn kiyā gayā hai. Aur 4) Sabt ke din kā pālan karne kī apekṣā, Naye Niyam kā śeṣ bhāag iske viparīt sujhāv detā hai (uparokt 3 nambar ke vākya ke apavād ko choḍkar jo Kulussiyon 2:16 men milatā hai).

Chauthe vākya ko yadi aur adhik dhyān se dekhā jāe to yah pragaṭ kartā hai ki Naye Niyam ke viśvāsiyon ke ūpar Sabt ke din kā pālan kie jāne kī koī bādhyatā nahīn thī, aur yah bhī pratīt hotā hai ki Ravivār ‘‘Masīhī Sabt’’ kā vichār bhī Pavitr Sāstr kī śikṣā ke anurūp nahī hai. Jaise ki ūpar vichār-vimarś kiyā gayā hai, Paulus kā anyjātiyon ke ūpar dhyān kendrit ārambh karne ke bād Sabt kā keval ek hī bār ullekh huā hai, ‘‘Islie khāne-pāne yā parv yā nae chānd, yā Sabt ke viṣy men tumhārā koī phaislā na kare. Kyonki ye sab ānevālī bāton kī chāyā hai par mūl vastuen Masīh kī hain’’ (Kulussiyon 2:16-17). Yahūdī Sabt krūs ke ūpar sāpst ho gayā thā jahāan Masīh ne ‘‘vidhiyon ko vah lekh jo hamāre nām par aur hamāre virodh men thā mitā ḍālā’’ thā (Kulussiyon 2:14).

Yah vichār Naye Niyam men ek bār se adhik doharāyā gayā hai: ‘‘Koī to ek din ko dūsare se baḍhkar mānatā hai, aur koī sab dinon ko ek samān mānatā hai. Har ek apane hī man ke niśchay kar le. Jo kisī din ko mānatā hai, vah prabhu ke liye mānatā hai’’ (Romiyon 14:5-6a). ‘‘Par ab jo tum ne Parmeśvar ko pahachān liyā varan Parmeśvar ne tum ko pahachānā, to un nirbal aur nikammī ādi-śikṣā kī bāton kī aur kyon phirte ho, jinake tum dobārā dās honā chāhate ho? Tum dinon aur mahīno aur niyat samayo aur varṣo ko mānate ho” (Galātiyon 4:9-10).

Parntu kuch log aisā dāvā karte hain ki 321 īsavī san men Konsaṭenṭāin ke ādeś par Sabt ko Sanivār se Ravivār men badal ḍālā gayā. Arambhik Kalīsiyā kis din ārādhanā ke lie ikaṭhṭhī hotī thī? Pavitr Sāstr viśvāsīyo ko Sabt (Sanivār) ke din sangti yā ārādhanā ke lie ektr hone kā kabhī bhī ullekh nahīn kartā hai. Hālānki, kaī aise spaṣṭ sandarbh hain jo saptāha ke pahale din kā ullekh karte hain. Udāharṇ ke lie, Preriton ke kām 20:7 kahtā hai ki ‘‘Saptāha ke pahale din jab ham roṭī toḍane ke lie ikaṭṭhe hue.’’ 1 Kurinthiyon 16:2 men Paulus Kurinthiyon ke viśvāsiyon se āgrah kartā hai ki "Saptāha ke pahale din tum men se har ek apanī āmadanī ke anusār kuch apane pāas rakha choḍā kare ki mere āne par chandā na karnā paḍae." Jabki Paulus 2 Kurinthiyon 9:12 men is chande ko ‘‘sevā’’ kā nām detā hai, is dhan kā ikaṭṭhā kiyā jān avaśy hī Masīh maṇḍalī kī Ravivārīy arādhanā ke sāth sambandhit kiyā gayā hogā. Aitihāsik rūp se sāmānytā Ravivār, na ki Sanivār, Masīhiyon ke lie kalisiyā men milane kā din hotā thā, aur aisā pahalī śatābdī se āj tak chalan men hai.

Sabt kī din kalisiyā ko nahīn varan Istrāelī ko diyā gayā thā. Sabt kā din āj bhī Sanivār hī hai, na ki Ravivār, aur yah kabhī bhī badalā nahīn. Parntu Sabt Purāne Niyam kā hissā hai, aur Masīhī viśvāsī vyavasthā ke bandhan se svatantar hai (Galātiyon 4:1-26; Romiyon 6:14). Sabt ke din kā pālan Masīhiyon ke lie āvaśyak nahīn hai - chāhe vah Sanivār yā Ravivār ho. Saptāha kā pahalā din, arthāt Ravivār, prabhu kā din (Prakāśitvāky1:10) Masīh ke sāth jo hamāre punarūtthān kā pratham phal hai, naī sṛṣṭi ke ūpar anand manānā hai. Ham Mūsā dvārā diye gae Sabt ke din kī vyavasthā - viśrām karne ko pālan karne ke lie bādhya nahīn hai, apitu ab jī uṭhe Masīh kā anusraṇ - sevā karte hue karne ke lie svatantar hai. Prerit Paulus ne kahā hai ki pratyek Masīhī jan ko yah nirṇay svayaṃ karnā hai ki kyā Sabt ke din kā pālan karnā chāhie yā nahīn, "Koī to ek din ko dūsare se baḍhkar mānatā hai, aur koī sab dinon ko ek samān mānatā hai. Har ek apane hī man men niśchay kar le’’ (Romiyon 14:5). Hame Sanivār yā Ravivār hī ko nahī varan Parmeśvar kī pratyek din ārādhanā karnī chāhie.



Hindī ya Roman-Nagari ke mukhya pṛṣṭha par vāpsa jāie



Sabt kis din hotā hai, Sanivār yā Ravivār ko? Kyā Masīhiyon ko Sabt kā din mānanā chāhie?