Yīśu Masīh kā Punarāgman kyā hai?



Praśn: Yīśu Masīh kā Punarāgman kyā hai?

Uttar:
Yīśu Masīh kā Punarāgman arthāt dūsarī bār ānā viśvāsiyon kī vah āśā hai jismen pratyek vastu Parmeśvar ke niyantraṇ men hai, aur vah apanī pratigayaon aur bhāviṣyavāṇiyon ke viṣay men viśvāsyogy hai. Apane pahale āgman men, Yīśu Masīh Baitalaham kī ek gośalā men ek choṭe bālaka ke rūp men is pṛthvī par āe, ṭhīk vaise hī jaise ki bhaviṣyvāṇī kī gaī thī. Yīśu ne apane janm, jīvan, sevakāī, mṛtyu aur jī uṭhane arthāt punarūtthān men Masīh ke viṣay men kī gaī bahut sī bhaviṣyvāṇiyo ko pūrā kar diyā. Yadyapi, abhī bhī Masīh ke viṣay men kuch bhaviṣyvāṇiyā hain jinhen Yīśu ne abhī tak pūrā nahī kiyā hai. Masīh kā Punarāgman arthāt dūsarā āgman Masīh kī śeṣ raha gaī bhaviṣyvāṇiyo ko pūrā karne ke lie vāaps ānā hai. Yīśu apane pahale āgman men dukhon ko sahane vāle ek sevak the. Yīśu apane dūsare āgman men, ek vijayī Rājā honge. Yīśu apane pahale āgman men, bahut hī sādhārṇ aur namr hokar āe the. Yīśu apane dūsare āgman men svarg kī senāo ke sāth āegeṃ.

Purāne Niyam ke bhaviṣyvaktāon ne dono āgmano ke bīch ke Antar ko spaṣṭ nahī kiyā thā. Yah Yaśāyāha 7:14, 9:6-7 aur Jakaryāh 14:4 men dekhā jā sakatā hai. Iske phalasvarūp aisā pratīt hotā hai ki ye bhaviṣydvāṇiyān kisī do vyaktiyon ke bāre men bāat kar rahī hain, islie bahut se Yahūdī vidvān yah mānate the ki dukh sahane vālā ek Masīhā aur ek vijayī Masīhā hogā. Ve is bāat ko nahī samajh pāe the ki keval ek hī Masīh hogā jo dono bhūmikāon ko pūrā karegā. Yīśu apane pahale āgman men dukh sahane vālā ek sevak banā (Yaśāyāha adhyāya 53). Yīśu apane dūsare āgman men, Ejrāel ko chuṭakārā dilāne vālā aur ek Rājā banegā. Jakaryāh 12:10 aur Prakāśitavāky 1:7 Punarāgman kā varṇan karte hue pīche kī or dekhate hai ki Yīśu ko bhedā gayā thā. Ejrāel aur sārā sanār, Yīśu ke prathan āgman par us grahaṇa na karne ke kāraṇ vilāap karenge.

Yīśu ke svarg par chale jāne ke paśchāt, svargdūto ne Preriton ko ghoṣit kiyā ki, “He galīlī ke purūṣo, tum kyon khaḍe ākāś kī or dekha rahe ho? Yahī Yīśu, jo tumhāre pāas se svarg par uṭhā liyā gayā hai, jis rīti se tum ne use svarg ko jāte dekhā hai usī rīti se vah phir āegā” (Preriton ke kām 1:11). Jakaryāh 14:4 Punarāgman ke sthān kī pahachān jaitūn ke pahāḍ ko darśātā hai. Mattī 24:30 ghoṣit kartā hai ki, "Tab manuṣy ke putr kā chinh ākāś men dikhāī degā, aur tab pṛthvī ke sab kulo ke log chātī pīṭenge; aur manuṣy ke putr ko baḍī sāmarthy aur aiśvary ke sāth ākāś ke bādlon par āte dekhen ge." Tītus 2:13 dūsare āgman kā varṇan “mahimā ke sāth pragaṭ honā” kah kar kartā hai.

Prakāśitavāky 19:11-16 men Punarāgman kā varṇan baḍe vistāra se kiyā hai, “Phir maine svarg ko khulā huā dekhā aur dekhatā hūn ki ek śvet ghoḍā hai; aur us par ek savār hai, jo viśvāsyogy aur satya kahlātā hai; aur vah dharm ke sāth nyāy aur yud kartā hai. Uskī ānkhe āg kī jvālā hain, aur uske sir par bahut se rājmukuṭ hain. Us par ek nām likhā hai jise usko choḍ aur koī nahī jāntā. Vah lahū chiḍakā huā vastra pahine hai aur uskā nām Parmeśvar kā vachan hai. Svarg kī senā śvet ghoḍo par savār aur śvet aur śud malamal pahine hue uske pīche pīche hai. Jāti jāti ko mārane ke lie uske munh se ek chokhī talavār nikaltī hai. Vah lohe kā rājdaṇḍ liye hue una par rājy karegā aur sarvaśaktimān Parmeśvar ke bhayānak prakop kī jalajalāhaṭ kī madirā ke kunḍa me dāka rauṃdegā. Uske vastra aur jāngh par yah nām likhā hai : Rājāon kā Rājā aur prabhuon kā prabhu."



Hindī ya Roman-Nagari ke mukhya pṛṣṭha par vāpsa jāie



Yīśu Masīh kā Punarāgman kyā hai?