Saludsod
Siasino kadi ti Espiritu Santo?
Sungbat
Adu ti biddut ti pannakaam-ammo iti Espiritu Santo. Ti pammati dagiti dadduma ket ti Espiritu Santo ket maysa laeng a datdatlag a pannakabalin. Dagiti dadduma met ket mamati a ti Espiritu Santo ket pannakabalin ti Dios nga intedna kadagiti pasurot ni Cristo. Anya kadi ti kunkunaen iti Biblia maipapan iti Espiritu Santo? Kunkunaen ti Biblia nga ti Espiritu Santo ket Dios. Kinuna pay ti Biblia nga ti Espiritu Santo ket maysa a persona nga adda panunot, rikna ken pagayatanna.
Ti kinapudno a ti Espiritu Santo ket Dios ket nalawag nga makita iti adu a versiculo ti Biblia. Sumagmamano kadagitoy ket ti libro ti Dagiti Aramid 5:3-4. Iti daytoy a versiculo, inanawa ni Pedro ni Ananias ken dinamag no apay a nagulbod isuna iti Espiritu Santo ken kinunana ditoy “Saanka a nagulbod iti tao no diket iti Dios.” Daytoy ket nalawag nga sursuro nga ti panagulbod iti Espiritu Santo ket panagulbod iti Dios. Maamoantayo met nga ti Espiritu Santo ket Dios gapu ta addaan met ti kababalin nga makita iti Dios, Kaspangarigan ti kinapudno a ti Espiritu Santo ket adda iti amin a disso iti amin a panawen, daytoy ket makita iti Dagiti Salmo 139:7-8, “Sadino ti papanak tapno malisianka? Sadino ti pagkamangak tapno maadaywanka? No umuliak sadi langit, addaka met sadiay. No agiddaak iti lubong dagiti natay, masarakanka met sadiay.” Iti 1 Taga-Corinto 2:10, makitatayo met nga ammo ti Espiritu Santo dagiti amin a banag. “Nupay kasta, babaen iti Espiritu, impakaammo ti Dios kadatayo ti palimedna. Sukimaten ti Espiritu ti amin a banag, uray dagiti nauneg a panggep ti Dios.”
Ammotayo nga ti Espiritu Santo ket maysa a persona gapu ta addaan Isuna ti panunot, rikna ken pagayatan. Ti Espiritu Santo ket agpanpanunot ken makatarus (1Taga-Corinto 2:10). Ti Espiritu Santo ket agledleddaang (Taga-Efeso 4:30). Ti Espiritu Santo ket agkarkararag para kadatayo (Taga-Roma 8:26-27). Ti Espiritu Santo ket agar-aramid ti keddeng a maiyannatup iti pagayatanna (1Taga-Corinto 12:7-11). Ti Espiritu Santo ket Dios, Ti maikatlo a persona ti Trinidad. Kas Dios, kabaelan a tungpalen ti Espiritu Santo ti pagrebbengan a kas mannangaywan ken mammagbaga nga inkari met ni Jesus nga aramidenna para kadatayo (Juan 14:6, 26; 15:26).
English
Siasino kadi ti Espiritu Santo?
