Saludsod
Ania ti kaipapanan ti agbalin a nayanak manen a Kristiano?
Sungbat
Ti nangayed a bersikulo manipud iti Biblia a mangsungbat iti daytoy a saludsod ket ti Juan 3:1-21. Makisarsarita ni Apo Jesu-Cristo ken ni Nicodemo a maysa a nalatak a Pariseo ken miembro ti Sanhedrin (ti agturturay a gungglo dagiti Judio). Napan ni Nicodemo ken ni Jesus iti rabii nga addaan kadagiti sumagmamano a saludsod.
Kas makisarsarita ni Jesus ken ni Nicodemo, "'Ibagak kenka ti pudno,' kinuna ni Jesus. 'Awan ti makakita iti Pagarian ti Dios malaksid no mayanak manen.' 'Kasano a mayanak manen ti tao a nataenganen?' sinaludsod ni Nicodemo. 'Mabalinna aya ti sumrek iti aanakan ni inana tapno mayanak manen?' 'Ibagak kenka ti pudno,' insungbat ni Jesus. 'Awan ti makastrek iti Pagarian ti Dios malaksid no mayanak iti danum ken iti Espiritu. Ti tao, ipasngayna ti tao; ket ti Espiritu, ipasngayna ti espiritu. Dika masdaaw no kunak kenka, 'Masapul a mayanakkayo manen.'" (Juan 3:3-7).
Ti literal a kaipapanan ti sao a "mayanak manen" ket "mayanak manipud iti ngato." Pudno nga adda kasapulan ni Nicodemo. Kasapulanna ti pannakabalbaliw ti pusona—ti naespirituan a pannakabalbaliw. Ti baro a pannakaypasngay, pannakayanak manen, ket aramid ti Dios a pannakaited ti biag nga agnanayon iti tao a mamati (2 Corinto 5:17; Tito 3:5; 1 Pedro 1:3; 1 Juan 2:29; 3:9; 4:7; 5:1-4, 18). Ipakita ti Juan 1:12, 13 nga ipaay met ti "pannakayanak manen" ti kapanunotan a "panagbalin nga annak ti Dios" babaen iti panagtalek iti nagan ni Jesu-Cristo.
Lohikal nga umay ti saludsod, "Apay a kasapulan ti maysa a tao ti mayanak manen?" Imbaga ni apostol Pablo idiay Efeso 2:1, "Ket pinagbiagnacayo, idinto a nataycayon gapu cadagiti panangsalungasing ken basbasol" (Santa Biblia). Insuratna kadagiti taga-Roma, "Nagbasol amin a tattao ket agkurangda iti kinadayag ti Dios" (Roma 3:23). "Natay" a naespirituan dagiti managbasol; inton maawatda ti naespirituan a biag babaen iti pammati ken ni Cristo, impada daytoy ti Biblia iti pannakayanak manen. Dagiti laeng nayanak manen ti napakawanen ti basbasolna ken addaan iti relasion iti Dios.
Kasano kadi a mapasamak dayta? Ibaga ti Efeso 2:8-9, "Ta gapu iti parabur ti Dios, naisalakantayo babaen iti pammati. Saanyo nga insalakan ti bagiyo gapu iti inaramidyo. Insagut kadakayo ti Dios ti pannakaisalakanyo tapno awan ti mangipasindayag iti daytoy." No maisalakan ti maysa a tao, mayanak manen daytoy, mapabaro a naespirituan, ken maysan nga anak ti Dios babaen iti kalintegan a baro a pannakayanak. Ti panagtalek ken ni Jesu-Cristo, ti nangbayad iti dusa ti basol idi natay Isuna idiay krus, ti wagas a "pannakayanak manen. "Maysa a baro a parsua ti siasinoman a mainaig ken ni Cristo. Naglabasen dagiti daan a banag ket dimtengen dagiti baro." (2 Corinto 5:17).
No saanka pay pulos a nagtalek ken ni Apo Jesu-Cristo kas Mangisalakanmo, ipangagmo kadi ti sagid ti Espiritu Santo kas agtimek Isuna dita pusom? Kasapulam ti mayanak manen. Ikararagmo kadi ti kararag a panagbabawi ken agbalinka a baro a parsua ken ni Cristo ita? "Ngem adda met dagiti immawat ken namati kenkuana, isut' gapuna nga inikkanna ida iti kalintegan nga agbalin nga annak ti Dios. Saanda a nagbalin nga annak ti Dios kas iti gagangay a pannakaipasngay ti tao; ta ti Dios a mismo ti Amada" (Juan 1:12-13).
No kayatmo nga awaten ni Jesu-Cristo kas Mangisalakanmo ken mayanakka manen, adtoy ti pagwadan a kararag. Laglagipem a saannaka a maisalakan ti panangibagam iti daytoy a kararag wenno iti aniaman pay a kararag. Ti laeng panagtalekmo ken ni Cristo ti makaisalakan kenka manipud iti basol. Daytoy a kararag ket maysa laeng a wagas tapno mayebkasmo ti pammatim Kenkuana ken makapagyamanka iti panangipaayna iti pannakaisalakanmo. "Apo Dios, ammok a nagbasolak Kenka ket maikariak a madusa. Ngem inala ni Cristo ti dusa a pakaikariak tapno babaen iti pammati Kenkuana mabalinko ti mapakawan. Agtalekak Kenka para iti pannakaisalakanko. Agyamanak iti nakaskasdaaw a parabur ken pammakawanmo—ti sagut a biag nga agnanayon! Amen!"
Nagdesisyon ka kadi para ken Cristo gapu iti nabasam ditoy? No kasta, maidawat a pindutem iti baba ti "Inawat ko ni Cristo ita nga aldaw".
English
Ania ti kaipapanan ti agbalin a nayanak manen a Kristiano?
