Saludsod
Kasanok a mapagballigian ti basol iti Nakristianoan a panagbiagko?
Sungbat
Iparang ti Biblia ti sumagmamano a wagas a makatulong iti gandattayo a panangparmek iti basol. Iti daytoy a biag, saantayo a mapagballigian a naan-anay ti basol (1 Juan 1:8), ngem daytoy latta koma ti kalattayo. Babaen iti tulong ti Dios, ken babaen iti panangsurottayo kadagiti prinsipio ti Saona, in-inut a mapagballigiantayo ti basol ken in-inut met nga agbalintayo a kas ken ni Cristo.
Ti umuna a wagas a dinakamat ti Biblia tapno mapagballigiantayo ti basol ket ti Espiritu Santo. Inted ti Dios ti Espiritu Santo tapno naballigi ti Nakristianoan a panagbiagtayo. Ingiddiat ti Dios dagiti aramid ti lasag kadagiti bunga ti Espiritu Santo idiay Galacia 5:16-25. Iti dayta a bersikulo naayabantayo a magna iti Espiritu. Addan ti Espiritu Santo kadagiti amin a namati, ngem ibaga daytoy a bersikulo a nasken a magnatayo iti Espiritu ken agpaituraytayo iti panangtengngelna. Ti kaipapanan daytoy ket ti agtultuloy a panangsurot iti pagayatan ti Espiritu Santo para iti biagtayo, imbes a ti panangsurot iti pagayatan ti lasag.
Makita iti biag ni Pedro ti naiduma nga aramid ti Espiritu Santo. Sakbay a napunno iti Espiritu Santo, inlibakna ni Jesus iti tallo a daras—ken sakbay daytoy imbagana pay a surotenna ni Cristo agingga ken patay. Kalpasan ti pannakapunnona iti Espiritu, nabileg ken natured ti panagsaona kadagiti Judio idi aldaw ti Pentecostes.
Magnatayo iti Espiritu no saantayo a paayen ti panangidalanna (kas nadakamat idiay 1 Tesalonica 5:19) ken no tarigagayantayo ti mapunno iti Espiritu (Efeso 5:18-21). Kasano a mapunno ti maysa a tao iti Espiritu Santo? Umuna iti amin, Dios ti agkeddeng iti daytoy kas met laeng iti Daan a Tulag. Agpili Isuna kadagiti tattao a mangaramid kadagiti trabaho a kayatna a mairengpas ken punoenna ida iti Espirituna (Genesis 41:38; Exodo 31:3; Numero 24:2; 1 Samuel 10:10). Adda pammaneknek iti Efeso 5:18-21 ken Colosas 3:16 a pilien ti Dios a punoen dagiti mangpunpunno iti bukodda iti Sao ti Dios. Daytoy ti mangiturong kadatayo iti maikadua a wagas.
Ibaga ti Sao ti Dios, ti Biblia, nga inted ti Dios kadatayo ti Saona tapno patanurennatayo para iti naimbag nga aramid (2 Timoteo 3:16-17). Isuronatayo no kasano ti agbiag ken no ania ti patientayo. Ipakitana kadatayo no kamali ti pinilitayo a dalan, tulongannatayo nga agsubli iti umno a dalan, ken tulongannatayo nga agtalinaed iti dayta a dalan. Ibaga ti Hebreo 4:12 kadatayo a sibibiag ken mannakabalin ti Sao ti Dios, kabaelanna a danunen ti pusotayo tapno paruten ken dadaelenna dagiti kauunegan a basol ti puso ken kababalin. Sinarita ti salmista idiay Salmo 119 ti makabalbaliw iti biag a kinauneg ti pannakabalinna. Nabagaan ni Josue a ti kanayon a panangut-utob ken panagtulnog iti daytoy ti tulbek iti panagballigina a maibusor kadagiti kalabanna. Inaramidna daytoy uray no awan ti pakainaigan ti bilin ti Dios kadagiti wagas ti armada. Daytoy ti tulbek iti panagballigina kadagiti gubat a para iti Naikari a Daga.
Ti Biblia ket maysa a wagas a masansan a laglag-anentayo. Bigbigentayo met daytoy babaen iti panangbitbittayo no mapantayo iti simbaan wenno iti panangbasa iti inaldaw a panagdebosiontayo wenno iti tunggal kapitulo iti inaldaw, ngem mapaaytayo a mangikabesa, mangutob, wenno mangipakat iti biagtayo; mapaaytayo a mangipudno kadagiti basbasoltayo nga iparangna wenno iti panangidayaw iti Dios gapu kadagiti sagsagut nga ipakpakitana kadatayo. No maipapan iti Biblia, masansan a kasla adda sakittayo nga anorexia wenno bulimia. Masansan nga agtaraontayo laeng iti umdas manipud iti Sao tapno agbiagtayo a naespirituan (ngem saantayo met a ngalngalen a nasayaat tapno agsalun-at ken agrampayagtayo koma a Kristiano), wenno masansantayo met nga agtaraon ngem saantayo met nga ut-utoben a nasayaat tapno magun-odtayo koma dagiti naespirituan a nutrinana.
Napateg a ruggiamon nga aramiden no saanmo pay a kadawyan nga ar-aramiden ti inaldaw a panangadal ken panangikabesa iti Sao ti Dios. Mabigbig dagiti dadduma a makatulong ti panagsurat iti jornal. Aramidem a sursuro ti saan a pananglaktaw iti Sao agingga nga awan ti banag a maisuratmo a nagun-odmo manipud iti daytoy. Ilista dagiti dadduma ti kararagda iti Dios, kiddawenda a tulonganna ida a mangbaliw kadagiti paset ti biagda nga impakitana kadakuada. Ti Biblia ket maysa nga alikamen nga usaren ti Espiritu iti biagtayo (Efeso 6:17), napateg daytoy ken maysa kadagiti kangrunaan a paset ti kabal nga inted ti Dios kadatayo iti panangbakaltayo kadagiti naespirituan a gubgubat (Efeso 6:12-18).
Ti maikatlo a napateg a wagas iti pannakidangadangtayo maibusor iti basol ket ti panagkararag. Maysa manen daytoy a wagas a masansan a dakdakamaten dagiti Kristiano ngem manmanoda met nga usaren. Addaantayo kadagiti panagtitipon para iti panagkararag wenno oras ti panagkararag, kdp., ngem saantayo a kas iti damo nga iglesia (Aramid 3:1; 6:4; 13:1-3). Kanayon ti panangdakamat ni Pablo no kasano ti panangikararagna kadagiti pagminministroanna. Nangted ti Dios kadagiti nakaskasdaaw a karkari maipapan iti panagkararag (Mateo 7:7-11; Lucas 18:1-8; Juan 6:23-27; 1 Juan 5:14-15), ken intipon ni Pablo ti panagkararag iti sinuratna maipapan iti panagsagana para iti naespirituan a pannakidangadang (Efeso 6:18).
Kasano kapateg ti panagkararag iti panangparmek iti basol iti biagtayo? Adda kadatayo dagiti sao ni Cristo ken ni Pedro idiay Minuyongan ti Getsemane, sakbay ti panagilibak ni Pedro. Kabayatan nga agkarkararag ni Jesus, matmaturog met ni Pedro. Riniing ni Jesus daytoy ket kunana, “Agridam ken agkararagkayo tapno saankay a matnag iti sulisog. Sisasagana ti espiritu, ngem nakapuy ti lasag” (Mateo 26:41). Datayo, kas met laeng ken ni Pedro, kayattayo nga aramiden ti umno ngem awan bilegtayo. Nasken a surotentayo ti balakad ti Dios nga itultuloytayo ti agsapul, agtuktok, ken agdawat—ket itednanto ti bileg a kasapulantayo (Mateo 7:7). Saan a wagas iti mahika ti panagkararag. Ti panagkararag ket wagas laeng a panangbigbig iti pagpatinggaan ti kabaelantayo ken panangbigbig iti nawadwad a pannakabalin ti Dios. Yaasideg daytoy Kenkuana para iti bileg a mangaramid iti kayatna nga aramidentayo, saan a ti kayattayo nga aramiden (1 Juan 5:14-15).
Ti maikapat a wagas iti panagballigi iti pannakidangadangtayo iti basol ket ti iglesia, ti gimong dagiti dadduma a namati. Idi imbaon ni Jesus dagiti adalanna, imbaonna ida a sagga-dua (Mateo 10:1). Saan a saggaysa a napan dagiti misyonero iti libro a Dagiti Aramid ngem napanda iti grupo a saggadua wenno nasursurok pay. Imbilin ni Jesus a saantayo a liwayan ti panaggigimongtayo ngem usarentayo dayta a tiempo a pangpabileg iti tunggal maysa para iti ayat ken nasayaat nga ar-aramid (Hebreo 10:24). Imbagana nga ipudnotayo dagiti bidduttayo iti tunggal maysa (Santiago 5:16). Iti sursurat ti kinasirib iti Daan a Tulag, naibaga kadatayo a patademen ti landok ti padana a landok, isu a patademen met ti tao ti padana a tao (Proverbio 27:17). Adda bileg iti bilang (Ecclesiastes 4:11-12).
Adu a Kristiano ti mangibaga a makaited iti dakkel a pagsayaatan iti pannakaparmek ti basol ti kaadda iti kaddua a mangbantay kenka. Napateg ti kaadda ti sabali a tao a mangkatungtong, mangikararag, mangpabileg ken uray pay mangtubngar kenka. Gagangay ti sulisog para iti tunggal maysa kadatayo (1 Corinto 10:13). Mabalin a makaited ti kaadda ti kaddua wenno grupo a mangbantay iti pammabileg wenno karit a kasapulantayo iti panangparmek uray kadagiti kabibileganen a basol.
No maminsan nalaka laeng a parmeken ti basol ngem no maminsan narigat met a magun-od ti balligi. Inkari ti Dios a no usarentayo dagiti wagasna, in-inut a yegna ti panagbalbaliw iti biagtayo. Mabalintayo ti agballigi iti gandattayo a panangparmek iti basol agsipud ta ammotayo a napudno Isuna kadagiti karina.
English
Kasanok a mapagballigian ti basol iti Nakristianoan a panagbiagko?
