settings icon
share icon
Saludsod

Ania ti kayat a saoen ti panangawat ken ni Jesus kas personal a Mangisalakanmo?

Sungbat


Inawatmon kadi ni Jesu-Cristo kas personal a Mangisalakanmo? Tapno naan-anay a maawatam daytoy a saludsod, nasken a maawatam pay nga umuna dagiti termino a "Jesu-Cristo," "personal," ken "Mangisalakan."

Siasino ni Jesu-Cristo? Adu a tattao ti mangbigbig ken ni Jesu-Cristo kas maysa a naimbag a tao, naindaklan a manursuro, wenno uray pay kas maysa a profeta ti Dios. Pudno dagitoy a bambanag a maipapan ken ni Jesus, ngem saanda a naan-anay a mailadawan ti pudno a kinasiasinona. Ibaga ti Biblia kadatayo a ni Jesus ket Dios a naglasag, Dios iti porma a tao (kitaen Juan 1:1, 14). Immay ti Dios ditoy daga tapno isuronatayo, agasannatayo, ilintegnatayo, pakawanennatayo—ken matay para kadatayo! Dios ni Jesu-Cristo, ti Namarsua, ti naindaklan nga Apo. Inawatmon kadi daytoy a Jesus?

Ania ti Mangisalakan, ken apay a kasapulantayo ti Mangisalakan? Ibaga ti Biblia kadatayo a nagbasoltayo amin; nakaaramidtayo amin kadagiti nadadakes nga aramid (Roma 3:10-18). Kas supapak ti basoltayo, maikaritayo iti pungtot ken panangukom ti Dios. Ti laeng nalinteg a dusa para kadagiti basol a naaramid maibusor iti naindaklan ken agnanayon a Dios ket ti awan patinggana a pannakadusa (Roma 6:23; Paltiing 20:11-15). Dayta ti rason no apay a kasapulantayo ti Mangisalakan!

Immay ni Jesu-Cristo ditoy daga ken natay para iti lugartayo. Ti pannakatay ni Jesus ti dakkel a bayad para kadagiti basbasoltayo (2 Corinto 5:21). Natay ni Jesus tapno mabayadan ti dusa dagiti basoltayo (Roma 5:8). Binayadan ni Jesus ti dusa tapno saantayon nga agbayad pay. Ti panagungar ni Jesus manipud iti patay ti pammaneknek nga umdas ti pannakatayna kas bayad ti dusa dagiti basoltayo. Daytoy ti rason no apay a ni Jesus ti Mangisalakan ken ti maymaysa a Mangisalakan (Juan 14:6; Aramid 4:12)! Agtaltalekka kadi ken ni Jesus kas Mangisalakanmo?

Ni kadi Jesus ti "personal" a Mangisalakanmo? Adu dagiti tattao ti mangibilang iti Kristianismo kas yaapan iti simbaan, panagaramid kadagiti ritual, ken/wenno saan a panagaramid kadagiti basbasol. Saan a Kristianismo dayta. Ti pudno a Kristianismo ket personal a pannakirelasion ken ni Jesu-Cristo. Ti kayat a saoen ti panangawat ken ni Jesus kas personal a Mangisalakanmo ket ti panangikabil iti personal a pammati ken panagtalekmo Kenkuana. Awan ti maisalakan babaen iti pammati ti sabali. Awan ti mapakawan babaen iti panangaramid kadagiti bambanag. Ti laeng wagas tapno maisalakanka ket ti personal a panangawatmo ken ni Jesus kas Mangisalakanmo, ti panagtalekmo iti ipapatayna kas isu ti bayad para kadagiti basbasolmo ken iti panagungarna kas pammatalgedmo para iti agnanayon a biag (Juan 3:16). Ni Jesus kadi ti personal a Mangisalakanmo?

No kayatmo nga awaten ni Jesu-Cristo kas personal a Mangisalakanmo, ibagam dagitoy sumaganad a sao iti Dios. Laglagipem, saannaka a maisalakan ti panangibagam iti daytoy a kararag wenno iti aniaman pay a kararag. Ti laeng panamati ken ni Jesu-Cristo ken ti nalpasen nga inaramidna para kenka idiay krus ti makaisalakan kenka manipud iti basol. Daytoy a kararag ket maysa laeng a wagas ti panangyebkas iti pammatim iti Dios ken panagyamanmo Kenkuana iti panangipaayna iti pannakaisalakanmo. "Apo Dios, ammok a nagbasolak Kenka ket maikariak a madusa. Ngem patiek nga inalan ni Cristo ti dusa a pakaikariak tapno mabalinko ti mapakawan babaen iti pammati Kenkuana. Awatek ti indiayam a pammakawan ken agtalekak Kenka para iti pannakaisalakanko. Awatek ni Jesus kas personal a Mangisalakanko! Agyamanak iti nakaskasdaaw a parabur ken pammakawanmo—ti sagut a biag nga agnanayon! Amen!"

Nagdesisyon ka kadi para ken Cristo gapu iti nabasam ditoy? No kasta, maidawat a pindutem iti baba ti "Inawat ko ni Cristo ita nga aldaw".

English



Agsubli iti kasangoan a panid ti Ilocano

Ania ti kayat a saoen ti panangawat ken ni Jesus kas personal a Mangisalakanmo?
Facebook icon Twitter icon Pinterest icon Email icon
© Copyright Got Questions Ministries