Penjo
En adier ni Muma en Wach Nyasaye?
Duoko
Duokowa mar penjoni ok bi mana nyiso kaka wakawo Muma gi pek ma wamiye e ngimawa to bende biro bedo gi tuomruok ma nyaka chieng’ e ngimawa. Ka Muma en Wach Nyasaye mar adier, to onego warite maber, wapuonjre kode, watim kaka owacho, kendo wagene chuth. Ka Muma en Wach mar Nyasaye mar adier, kara en e chik mogik mag weche duto mag yie, tim, gi timbe mowinjore. Ka Muma en Wach Nyasaye, koro ka wakwede to wakwedo Nyasaye owuon.
Nyasaye miyowa Muma en adiera mar herane kuomwa. Nyasaye ne onyiso dhano kaka ochal gi kaka onyalo bedo gi winjruok kode. Magi gin gik ma dine ok wang’eyo ka Nyasaye dine ok ofwenyonwagi kuom roho ei Muma. Muma nigi gimoro amora ma dhano didwar ng’eyo kuom Nyasaye mondo obed gi winjruok maber kode.
Ere kaka wanyalo ng’eyo ni Muma en Wach Nyasaye kendo ok en mana buk moro ma ber abera? Ang’o ma kende ei Muma ma opogore gi buge moko ma osendikga? Be nitiere ranyisi ma nyiso ni Muma en Wach Nyasaye? Penjo ma chal kama nyaka non matek. Onge kiawa ni Muma onano ni en Wach Nyasaye. Mae neno e chwak ma ne Paulo ogolo ni Timotheo: “Bende ng’e ni nyaka ia e nyathi isebedo king’eyo weche manie Muma. Manyalo miyi rieko makeloni warruok, ka iyie kuom Kristo Yesu. Weche duto manie Muma wuok kuom much Nyasaye, kendo konyo kuom puonjo ji, kendo kuom kwero gik maricho, kendo kuom rieyo ji, kendo kuom tiego ji obed joma kare, mondo jo-Nyasaye obed molony kendo moikore chuth ni tije mabeyo duto.” (2 Timotheo 3:15-17).
Nitie ranyisi ma iye gi ma oko ni kuom adiera, Muma en Wach Nyasaye.
Ranyisi motegno ma iye ni Muma en Wach Nyasaye
Ranyisi ma iye gin gik ma nitie ei Muma ma golo neno mar charuokne e roho. Ranyisi achiel ma ni adiera Muma en Wach Nyasaye en winjruokne. Kata ka en buge piero auchiel gi auchiel mopogore, ma ondik e pinje adek mopogore, ka itiyo gi dhok adek mopogore, ka okawo kinde ma dirom higni 1,500, gi jondiko mokalo 40 ma ne oa e ngima mopogore opogore, Muma en buk ma nigi riwruok koa e chakruokne nyaka gikone ma onge balruok kata matin. Riwruokni opogore gi buge moko duto kendo en ranyisi mar chakruok wechego e roho eka Nyasaye ne omiyo ji ma ondiko piny.
Ranyisi moro ma iye ma nyiso ni adiera Muma en Wach Nyasaye en koro wach. Muma nigi wach mokor ma owuo kuome malach ma wuoyo kuom ndalo mabiro mag pinje mopogore, boma moko gi e wi kit dhano duto. Koro moko wuoyo e wi biro mar Mesia, Jawar mar ji duto ma nyalo yie kuome. Ka opogore gi koro moko ma iyudo e buge moko mag din kata mag dhano kaka Nostradamus, koro mag muma owuo kuomgi malach ahinya. Nitie weche mokor mokalo mia adek ma wuoyo kuom Yesu Kristo ei Muma Machon. Ok nokor mana anyuolane gi kuma ibiro nyuolee, to kata kaka obiro tho kendo ni jnochier bang’ tho. Onge yo moro mowimnjore ma inyalo pimgo weche mane okor ma otimore mak mana ni ne gin mag roho. Onge bug din moro amora ma nigi weche mokor ma biro timore kaka ma nitie e Muma.
Ranyisi mar adek mar nyiso ni gik ma nitie e Muma owuok kuom roho en telo gi teko ma kende. Kata ka ranyisini neno ka pach ng’ato ka ipime gi ariyo mokwongoka, pod en neno ma nigi teko ni Muma en Wach Nyasaye. Teko mar Muma opogore gi mar buk moro amora. Tekoni neno kaka ngima ma ok kwanre oselok gi teko mar Nyasaye. Jo-nyasore osechang kode, joma oloko kitgi mag chwo gi mon osegony kode, joma onge korgi gi atachgi gi joma piny odhiero bende oselok ma odoko ji, jo-mahundu motegno oseloko kitgi kode, osekwero joricho, kendo oseloko achaye obedo hera. Muma nigi teko mosiko kendo ma kelo lokruok ma nyalore mana nikech en Wach Nyasaye mar adier.
Ranyisi ma neno ma oko ma nyiso ni Muma en Wach Nyasaye mar adier
Bende nitie ranyisi moko ma oko ma neno ma nyiso ni Muma en Wach Nyasaye mar adier. Achiel kuomgi en sigandni mochan ka luwore gi kinde ma ne gitomoree e Muma. Nikech Muma golo nyiriri mag gik ma ne otimore e kinde mokalo, tiend adierane nyaka non mana kaka ndiko moro amora mar sigendni ma chon. Ranyisi moa kuom puonj mar somo gik mosekadho kitiyo gi gik ma yudore ma ne odong’ gi ndiko ma theno Muma miyo obedo buk ma ber mogik ma osendik koa e piny ma chon. Kaka Muma ndiko piny adimba gik ma ne otimore chon ma inyalo yud tiende ma adier mondo ochung adierane ni en e Wach Nyasaye owuon kendo theno geno e wi weche moko ma Muma wuoyoe.
Ranyisi moro ma oko ma neno ma nyiso ni Muma en Wach Nyasaye adier en ratiro mar joma ne ondike. Ka wapuonre koa kuom joma ne ondiko Muma, wayudo ni ne gin jo-ratiro kendo ma inyalo gen. Adiera ni ne giyie tho e yo ma nitie gi lit ni yie margi en neno ni jogo ne oyie gi adiera ni Nyasaye ne owuoyo kodgi. Chwo ma ne ondiko Muma gi miche mag joma oyie moko (1 Jo-Korintho 15:6) ne ong’eyo adiera mar otegi nikech ne gibudho gi Yesu Kristo bang’ ka ne osechier oa kuom joma otho. Neno Kristo ma ne ochier ne omiyogi jing’o. Ne giwuok kuma ne gipondoe gi luoro ma giyie tho ni ote ma ne Nyasaye ne ofwenyonigi. Ngimagi gi thogi en neno ma chungo adiera ni Muma en Wach Nyasaye adier.
Ranyisi moro ma oko ma neno ni Muma en Wach Nyasaye adier en kaka Muma ok pudhre kata ok keth. Muma osekaloe monj mang’eny mager gi temo njawe moloyo buk moro amora chakre chon. Chakre ndalo joloch machon mag Jorumi machon kaka Diocletian, kokaloe jo-ang’enge mag jo-Communist kendo gi joma ok oyie ni Nyasaye nitie, Muma osethiro monj malich mosiko kuom joma ochaye. Kata kamano osetimo kinda kendo en e buk ma igolo mang’eny moloyo e piny e ndalogi.
Chakre e ndalo machon nyaka sani, joma nigi kiawa neno Muma ka gima en sigana mar miriambo to somo mar chien mar dhano e ndalo mokalo osejiwo ni en gima a e ndalo mosekalo. Joma piem osemonjo puonj mar Muma kaka modok chien kendo ma ndalone osekalo , to puonjne mag timbe ma beyo gi chikne osekelo lokruok ma ber ei piny ngima. Pod idhi nyime monje gi jo-sayans mag miriambo, somo mar paro, gi riwruoge mag siasa, to pod en mana adier kendo owinjore kawuono mana kaka ne en ka ne ondike mokwongocha. Ma e ok onego obwogwa. Donge Yesu ne owacho ni, ”Polo gi piny norum. Wechena to ok norum ngang’!” (Mariko 13:31).
Muma, ma en ma kende e kind buge, oseloko ngima ma ok kwanre kendo osenudo kido kod timbe mag ji. Bang’ ng’iyo ranyisi, ng’ato nyalo wacho ma onge kiawa ni Nyasaye osewuoyo kendo ni, ee, Muma en Wach Nyasaye adier.
English
En adier ni Muma en Wach Nyasaye?