Zawhna
Isua hi Pathian a ni em? Isua kha Pathianah a inchhal em?
Chhanna
Lal Isua hi Pathian a ni lo ti a sawitute innghahna chu, amah Isua hian Pathian anih thu hi a sawi ngai lo a ni an ti a. “Pathian ka ni” tia Isuan a sawina tak hi Bible ah hian tarlan a ni lo tih hi a dik a. Amaherawhchu, chu mi avang chuan Lal Isuan Pathian anih thu a sawi ngai lo tihna erawh a ni lo.
Isua hi Pathian a ni em? — Isua hian Pathian a nih thu a sawi a ni.
Johana 10:30 thu hi entirnan lo hmang ta ila, “Kei leh ka Pa chu pumkhat kan ni.” Judaten he thu an hriat a, an chet dan leh rilru put hmang kan en hian Lal Isua hi Pathian a ni ngei a ni tih a inchhal kan ti thei ang. Amah ngei pawh lunga den hlum an tum hial a ni: “Nang, mihring ni si a, Pathiana i inchhal avang hian” (Johana 10:33). Judate hian chiang takin Lal Isua inchhalna, Pathianna hi an hre chiang hle a ni. Lal Isuan, “Kei leh ka Pa chu pumkhat kan ni,” tia a sawi khan, Pa leh Amah chu nihna leh mizia ang khat nei an nih thu a sawi a ni. Johana 8:58 hi entirna dang leh chu a ni a. Lal Isuan, “Tih tak meuhvin ka hrilh a che u, Abrahama awm hma pawhin ka awm!” tiin. He thu hi Exodus 3:14 a Pathian in, “AWMA KA NI” ti a lo sawi nen khan a in ang a ni. He thu lo hre tu Judate chuan lung an chhar a, Pathian sawichhiaa ngaiin den hlum an tum a ni, a chhan chu Mosia danin a sawi vang a ni (Leviticus 24:16).
Isua hi Pathian a ni em? — Amah zuitu ten Pathian a nih thu an sawi.
Johana hian Isua Pathianna hi a sawi nawn a: “Thu (Isua) chu Pathian a ni” tih leh “Thu chu tisaah a lo chang a” (Johana 1:1, 14). Helai bung leh chang a thu hian Lal Isua hi Pathian tisaa lo chang ngei a ni tih a tilang a ni. Tirhkohte Thiltih 20:28 chuan tihian min hrilh, “Pathian kohhranho, ama thisena leite chu chawm turin nangmahni leh in hote zawng zawng chungah chuan fimkhur rawh u, Thlarau Thianghlimin an chunga hotuah a siam che u hi.” Tunge ama thisena kohhrante leitu chu? Lal Isua Krista ngei hi a ni. Tichuan he bung leh chang ngei hian Pathianin ama thisenin kohhrante chu a lei a ni tih a sawi a. Chuvangin Isua hi Pathian a ni.
Isua zirtir zing ami Thoma khan Isua chungchang hi heti hian a sawi a, “Ka Lalpa leh ka Pathian” tiin (Johana 20:28). Lal Isua khan i ti diklo tiin a hrilh hauh lo. Tita 2:13 ah chuan kan Pathian leh chhandamtu, Lal Isua Krista chu lo nghak tlat turin min fuih a nih kha (2 Petera 1:1 chhiar tel la). Hebrai 1:8 ah chuan Pa Pathian in fapa chungchang ti hian a sawi, “Fapa chungchang thu-ah erawh chuan hei hi a sawi a ni, Aw Pathian, i lal\hutphah chu chatuanin a awm tur a ni; Dikna lal tiang pawh chu i ram lal tiang chu a ni.” Pa Pathianin Isua hi Pathian a ni tiin a puang chhuak a ni, Isua hi Pathian chu a ni ngei bawk a ni.
Thupuan bu ah chuan, Vantirhkohin Johana hnenah Pathian chauh hi chibai buk tur a ni tiin a zirtir a (Thupuan 19:10). Vawi tam tak Bible ah hian Lal Isua Krista hian chibai bukna a dawng tih kan hmu a ni (Matthaia 2:11; 14:33; 28:9,17; Luka 24:52; Johana 9:38). Amah chibai an buk avangin tumah a zilhhau ngai lo. Isua kha Pathian ni lo se chuan, amah chibai buktute kha a zilhauin, a hau ngei ang, chibai buk lo tur in a ti ngei bawk ang, vantirhkohten Thupuan a an tih ang chiah khan. Heng lo pawh hi Lal Isua hi Pathian a ni ngei a ni tih hi Bible ah hian hmuh tur tam tak a awm bawk a ni.
Isua hi Pathian a ni em? — Isua hi Pathian a nihna chhante.
Lal Isua hi a nihna chhan pawimawh ber chu Pathian chu ni lo se, a thihna kha khawvel mite sual tlenfai nan hian a tawk zo dawn lo a ni (1 Johana 2:2). Isua hi thil siam pangngai niin, Pathian ni lo se, chu chuan Pathian engkim ti thei a laka kan sualnate min peksak turin a tling tawk lo a ni. Pathian chauhin chutiang chu a ti thei a ni. Pathian chauhin khawvel sual hi a phurin (2 Korinth 5:21), thihpuiin, a thawhlehpui thei a, chu chuan sualna leh thihna chu a hneh ta a ni tih a tilang chiang ta bawk a ni.
Isua hi Pathian a ni em? Aw, ni e. Isua hian Pathian a nih ngeizia a puang chhuak a ni zawk. Amah zuitute pawn Pathian a nihzia an pawm a. Chhandamna buatsaih a nih danah pawh hian Isua hi Pathian a ni ngei a ni tih a chianga hle bawk. Isua hi Pathian, mihringa lo chang a ni a, Alpha leh Omega, A bul leh a tawp (Thupuan 1:8; 22:13), kan chhandamtu chu a ni (2 Petera 1:1).
English
Isua hi Pathian a ni em? Isua kha Pathianah a inchhal em?